12) மனித குலத் தோற்றம் குறித்து இஸ்லாம்

மனிதன் எவ்வாறு தோன்றினான் என்பதில் நாம் எடுக்கக்கூடிய முடிவில்தான் மனிதகுலத்தின் நன்மையும் அமைந்திருக்கிறது. ஆன்மீகவாதிகள் சிலர் மனிதனைப் படைப்பின் அடிப்படையிலேயே பிரிக்கிறார்கள்; இறைவனின் தலையிலிருந்து சிலர், தோளிலிருந்து சிலர், தொடையிலிருந்து சிலர், காலிலிருந்து சிலர், அந்த காலிலும் இடமில்லாமல் பஞ்சமர்கள் என்று பிறப்பின் இடத்திலேயே ஏற்றத்தாழ்வுகளைக் கற்பிக்கிறார்கள். இதனால் தலையில் பிறந்தவர் உயர்ந்தவர், மற்றவர்கள் அடுத்தடுத்த நிலைகள் என்ற சமூகப் பிரிவினைகளும் அநீதிகளும் உருவாகின்றன.

இன்னொருபுறம், மனிதன் ஒரு தனிப்படைப்பே அல்ல, குரங்கிலிருந்து பரிணாம வளர்ச்சி அடைந்து உருவானவன் என்று டார்வினியவாதிகள் வாதிடுகிறார்கள். ஆனால் இஸ்லாம், மனிதன் மற்ற உயிரினங்களைப் போலவே இறைவனால் நேரடியாகப் படைக்கப்பட்ட தனிப்படைப்பு என்று கூறுகிறது. ஓர் ஆணையும், அவனுக்கு இணையாக ஒரு பெண்ணையும் படைத்து, அவ்விருவர் மூலமாகவே ஒட்டுமொத்த மனிதகுலமும் பல்கிப் பெருகியது என்ற வரலாற்று உண்மையை இஸ்லாம் முன்வைக்கிறது.

இந்தக் கோட்பாடே ஒட்டுமொத்த மனிதகுலமும் ஒரே குடும்பம், அனைவரும் சகோதரர்கள் என்ற சமத்துவ உணர்வை நிலைநாட்டுகிறது. ஒரே தாய் தந்தைக்குப் பிறந்த பிள்ளைகள் நிறத்திலோ, அறிவிலோ, திறமையிலோ, கொள்கையிலோ மாறுபட்டாலும் அவர்களுக்கு இடையிலான சகோதரத்துவம் மாறுவதில்லை. அதுபோலவே, உலகில் வாழும் மனிதர்கள் எந்த மொழி, நாடு, இனம், மதத்தைச் சார்ந்தவர்களாக இருந்தாலும், அவர்கள் அனைவரும் ஆதாம், ஏவாள் என்ற முதல் தாய் தந்தையரின் வழித்தோன்றல்களே என்பதை இஸ்லாம் தெளிவுபடுத்துகிறது.

يَـٰٓأَيُّهَا ٱلنَّاسُ إِنَّا خَلَقْنَـٰكُم مِّن ذَكَرٍ وَأُنثَىٰ
மனிதர்களே! உங்களை ஓர் ஆண், ஒரு பெண்ணிலிருந்தே நாம் படைத்தோம்.
(அல்குர்ஆன்: 49:13)➚

இந்தச் சமத்துவக் கோட்பாட்டை இஸ்லாம் வணக்க வழிபாடுகளிலும் நடைமுறைப்படுத்திக் காட்டியது. அன்றைய சமூகத்தில் தாழ்த்தப்பட்டவராகக் கருதப்பட்ட அபீசீனியக் கறுப்பரான பிலால் அவர்களை, பள்ளிவாசலில் தொழுகைக்கு அழைக்கும் முதல் பாங்கு சொல்லும் பொறுப்பில் நபி (ஸல்) அவர்கள் அமர்த்தினார்கள். அன்றைய அரபுச் சமூகத்தில் மிக உயர்ந்த குலமாகக் கருதப்பட்ட குறைஷி குலத்தில் பிறந்த நபி (ஸல்) அவர்களே, “நானும் அவரும் சமம்தான்” என்று தங்களை எளிய மக்களோடு சமப்படுத்திக் கொண்டார்கள்.

அறியாமைக் காலத்தில், கஅபாவை வழிபட வரும் குறைஷி உயர்குடியினர் முஸ்தலிஃபா என்ற தனி இடத்திலும், ஏனைய எளிய மக்கள் அரஃபா என்ற மைதானத்திலும் தங்குவதற்கென ஏற்றத்தாழ்வு கற்பிக்கப்பட்டிருந்தது. இந்த பாகுபாட்டை உடைத்தெறியுமாறு அல்லாஹ் நபி (ஸல்) அவர்களுக்குக் கட்டளையிட்டான்.

ثُمَّ أَفِيضُوا۟ مِنْ حَيْثُ أَفَاضَ ٱلنَّاسُ
பின்னர் மக்கள் எங்கிருந்து புறப்படுகிறார்களோ, அங்கிருந்தே நீங்களும் புறப்படுங்கள்.
(அல்குர்ஆன்: 2:199)➚

இதன்மூலம், உயர்குடியினர் தங்களை மற்றவர்களிடமிருந்து பிரித்துக் கொள்ளும் பழக்கம் ஒழிக்கப்பட்டு, அனைவரும் சமமாக ஒரே இடத்திலிருந்து புறப்பட வேண்டும் என்ற நிலை உருவானது (புகாரி: 4520) ➚.

அவ்வாறே, தங்களின் 23 ஆண்டுகாலப் பிரச்சாரத்தின் சாராம்சமாக அமைந்த வரலாற்றுச் சிறப்புமிக்க இறுதிப் பேருரையில் நபி (ஸல்) அவர்கள் மனிதகுலச் சமத்துவத்தை உலகிற்குப் பிரகடனப்படுத்தினார்கள்.

لاَ فَضْلَ لِعَرَبِيٍّ عَلَى عَجَمِيٍّ
அரபியருக்கு அரபி அல்லாதவரை விட எந்தச் சிறப்பும் இல்லை; அவ்வாறே அரபி அல்லாதவருக்கு அரபியரை விடவும் எந்தச் சிறப்பும் இல்லை. வெள்ளையருக்குக் கறுப்பரை விடவோ, கறுப்பருக்கு வெள்ளையரை விடவோ எந்தச் சிறப்பும் இல்லை.

தங்களை மிகவும் உயர்ந்தவர்களாகக் கருதிக்கொண்டிருந்த அரபியர்களிடம், அவர்களின் தாய்மொழியும் தங்களுக்கு அருளப்பட்ட திருக்குர்ஆனின் மொழியுமான அரபியிலேயே பேசி, “அரபு மொழி பேசுபவனுக்கு அரபு அல்லாத பிற மொழி பேசுபவனை விட எந்தச் சிறப்பும் இல்லை; நீங்களும் அவர்களும் சமமே” என்று நபி (ஸல்) அவர்கள் பிரகடனம் செய்தார்கள். மனித குலத்தின் தோற்றம் குறித்த தெளிவான கொள்கை இருந்ததால்தான் அவர்களால் இதைத் திட்டவட்டமாகச் சொல்ல முடிந்தது. ஆதம், ஹவ்வா என்ற ஒரே தாய், தந்தையிலிருந்து உருவான வழித்தோன்றல்கள்தான் நாம் அனைவரும் என்ற உண்மை உள்ளத்தில் ஆழமாகப் பதிந்திருப்பதால்தான், இன்றளவும் முஸ்லிம்களால் இந்தச் சகோதரத்துவத்தைப் பேண முடிகிறது.

மறுபுறம், அறிவியல் என்ற பெயரில் டார்வின் முன்வைத்த பரிணாம வளர்ச்சிக் கோட்பாட்டை இறைமறுப்பாளர்கள் தூக்கிப் பிடித்தார்கள். ஒரு செல் பிராணியாகத் தொடங்கி, பல கட்டங்களைத் தாண்டி, குரங்கிலிருந்து மனிதன் உருவானான் என்று சொன்னால் இறைவனை மறுக்கலாம் என்பதற்காகவே அதை ஆதரித்தார்கள். ஆனால், அந்த முதல் செல்லில் உயிர் எவ்வாறு உருவானது என்பதற்கோ, அது தானாகவே எப்படித் தோன்றியது என்பதற்கோ அவர்களால் எந்த அறிவியல் ஆதாரத்தையும் தர முடிவதில்லை.

அவர்கள் சொல்வதுபோல் குரங்கிலிருந்துதான் மனிதன் தோன்றினான் என்றால், அது ஒரு குரங்கிலிருந்து மட்டுமே நிகழ்ந்திருக்க முடியாது. பல கோடி குரங்குகள் படிப்படியாக மனிதர்களாக மாறியிருக்க வேண்டும். அப்படிப் பார்த்தால் மனித குலத்திற்குப் பல கோடித் தந்தையர் இருக்க வேண்டும். அவ்வாறாயின், பிறப்பின் அடிப்படையில் குலம், கோத்திரம், ஜாதி போன்ற ஏற்றத்தாழ்வுகள் இருப்பது நியாயமாகிவிடும். என் ஆதித் தந்தையும் உன் ஆதித் தந்தையும் வேறு என்று ஆகிவிட்டால் சகோதரத்துவம் என்பது சாத்தியமில்லாமல் போய்விடும். மாற்றுக் கொள்கைகள் இருந்தாலும் நாம் அனைவரும் ஒரே தாய், தந்தையின் பிள்ளைகள், சகோதரர்கள் என்ற உணர்வு ஏற்பட வேண்டுமானால், மனித குலம் ஒரேயொரு ஜோடியிலிருந்துதான் தோன்றியது என்பதை அனைவரும் ஒப்புக்கொள்ள வேண்டும்.

டார்வினின் கோட்பாட்டில் உண்மைத்தன்மை இருந்ததால் அவர்கள் அதை ஏற்கவில்லை; இறைவனை மறுப்பதற்காக மட்டுமே கையில் எடுத்தார்கள். சில படிமங்களையும் உருவ ஒற்றுமையையும் மட்டுமே அடிப்படையாக வைத்துச் சொன்னார்களே தவிர, அதற்கு எந்த அறிவியல் நிரூபணமும் இல்லை. பரிணாம வளர்ச்சியால் மனிதன் உருவானான் என்றால், வரலாறு தொடங்கிய காலத்திலிருந்து இன்றுவரை எந்தக் குரங்காவது மனிதனாக மாறியிருக்கிறதா? அந்தப் பரிணாம வளர்ச்சியைத் தடுத்து நிறுத்தியது யார் என்ற கேள்விக்கு அவர்களிடம் பதில் இல்லை. மேலும், குரங்கின் இரத்தமும் மரபணுவும் மனிதனுக்கு மிக நெருக்கமாக இல்லை; மாறாக, பன்றி போன்ற விலங்குகளின் கூறுகளே மனிதனுக்கு நெருக்கமாக இருப்பதாக ஆய்வுகள் தெரிவிக்கின்றன. எனவே, குரங்கிலிருந்து மனிதன் வந்திருக்க முடியாது என்பதுதான் அறிவியல் பூர்வமான முடிவாக உள்ளது.

இன்றைய மரபணு (ஜீனோம்) ஆய்வுகள் மனித குலத்தின் தோற்றத்தைக் குறித்து ஆராய்ந்தபோது, மனித குலம் முழுவதும் ஓர் ஆப்பிரிக்கத் தாய் மற்றும் ஓர் ஆப்பிரிக்கத் தந்தை வழியாகவே தோன்றியது என்ற முடிவுக்கு வந்திருக்கின்றன. உலகெங்கிலும் உள்ள பல்வேறு மனிதர்களிடமிருந்து மாதிரிகளை எடுத்து ஆய்வு செய்த பிறகே இந்த முடிவை எட்டியுள்ளார்கள். இது பரிணாம வளர்ச்சியாக இருந்திருந்தால், லட்சக்கணக்கான தாய்மார்களும் தந்தையரும்தான் மூலமாக இருந்திருக்க முடியும்; ஒரேயொரு தாய், தந்தையாக இருக்க முடியாது. எனவே, ஒரே ஜோடியிலிருந்துதான் மனித இனம் பல்கிப் பெருகியது என்ற இஸ்லாத்தின் கூற்றையே இன்றைய மரபணு ஆய்வுகள் மெய்ப்பிக்கின்றன.

பகுத்தறிவாளர்கள் நடத்தும் ‘விடுதலை’ நாளிதழில் 28-07-2007 அன்றும், ‘உண்மை’ இதழிலும், அதேபோல ‘தினமணி’ நாளிதழில் அக்டோபர் 22, 1988 அன்றும் மனித குலத் தோற்றம் ஓர் ஆப்பிரிக்கத் தாய், தந்தையிலிருந்துதான் தொடங்கியது என்பதை இந்த மரபணு ஆய்வுகளை மேற்கோள்காட்டி கட்டுரைகளாக வெளியிட்டுள்ளனர். எனவே, டார்வினின் கோட்பாடு என்பது அறிவியல் சோதனைகளால் நிரூபிக்கப்பட்ட உண்மை அல்ல; அது வெறும் அனுமானத்தின் அடிப்படையில் உருவான ஒன்று மட்டுமே. அந்த அனுமானத்தின்படி, ஒரு பிராணி எதற்காக முயற்சி செய்கிறதோ அந்தத் தன்மை அடுத்த தலைமுறைக்குக் கடத்தப்படும் என்று கருதினார்கள்.

பரிணாமக் கொள்கையாளர்கள் ஒட்டகச்சிவிங்கியின் நீண்ட கழுத்துக்குக் கூறும் விளக்கம் எந்த வகையிலும் அறிவியலாக ஏற்க முடியாத ஒன்றாகும். மரங்களின் உயரமான கிளைகளை எட்டிப் பார்த்ததால் கழுத்தை நீட்ட வேண்டும் என்ற எண்ணம் ஏற்பட்டு, அது அடுத்தடுத்த தலைமுறைகளுக்குக் கடத்தப்பட்டு படிப்படியாகக் கழுத்து நீண்டது என்று விசித்திரமான வாதங்களை முன்வைக்கின்றனர். அப்படியானால், கங்காருவின் வயிற்றில் குட்டியைச் சுமக்கும் பை எப்படி வந்தது? அது விரும்பியதால் உருவானதா? யானைக்குத் தும்பிக்கை ஏன் வந்தது? நுகர்வதற்காக மூக்கை நீட்ட முயன்று அது நீண்டதா? இவற்றுக்கெல்லாம் அவர்களிடத்தில் எவ்விதப் பதிலும் இல்லை. இறைவன் தன் படைப்புகளைப் பல்வேறு வகைகளில் படைத்திருக்கிறான் என்ற உண்மையை மறைத்து, இறைமறுப்பை நிலைநிறுத்துவதற்காகவே இத்தகைய கற்பனைக் கதைகள் அறிவியல் என்ற பெயரில் பரப்பப்படுகின்றன.

உலக மனிதர்கள் மதம், மொழி, சாதி என எவ்வகையில் வேறுபட்டிருந்தாலும் அவர்கள் அனைவரும் மனித இனம் என்ற ஒரே இனத்தைச் சேர்ந்தவர்களே. மொழி, நிறம், குலம் மற்றும் கோத்திரங்களின் அடிப்படையில் மனிதர்கள் தங்களைப் பிரித்துக் கொள்வது தாங்களாகவே உருவாக்கிக் கொண்ட கற்பனையே அன்றி வேறில்லை. மொழி என்பது மனிதன் பிறந்த பிறகு பழகிக் கொள்ளும் ஒன்றே தவிர, பிறவியிலேயே அவனோடு வருவதல்ல. எனவே, மொழியை வைத்து மனிதர்களைத் தனித்தனி இனங்களாகப் பிரிப்பது தவறானது. மனிதர்கள் அனைவருடைய அறிவும் உடலமைப்பும் ஒரே மாதிரியாகவே இருக்கின்றன. மனிதர்களுக்கு மத்தியில் உள்ள வேற்றுமைகள் ஒருவரையொருவர் அடையாளம் கண்டுகொள்வதற்காக மட்டுமே தவிர, உயர்வு தாழ்வு கற்பிப்பதற்காக அல்ல.

மனித குலத்தின் சமத்துவத்திற்கும் அமைதிக்கும் எந்தக் கோட்பாடு சிறந்தது என்பதைச் சிந்தித்துப் பார்க்க வேண்டும். மனிதன் குரங்கிலிருந்து வந்தான் என்ற பரிணாமக் கொள்கையோ, அல்லது மனிதர்கள் உடலின் வெவ்வேறு உறுப்புகளிலிருந்து பிறந்தார்கள் எனக் கூறித் தீண்டாமையையும் உயர்வு தாழ்வையும் கற்பிக்கும் வாதங்களோ மனித குலத்துக்கு ஒருபோதும் நன்மையைத் தராது. மனிதர்கள் அனைவரும் ஒரே தாய் தந்தையிலிருந்தே படைக்கப்பட்டார்கள் என்ற இஸ்லாமியக் கோட்பாடு மட்டுமே தீண்டாமையை வேரறுத்து, மனிதர்களிடையே உண்மையான சமத்துவத்தையும் உலகளாவிய சகோதரத்துவத்தையும் நிலைநாட்டக்கூடிய காலத்தை வென்ற அறிவுபூர்வமான கொள்கையாகும்.

மனிதர்கள் அனைவரும் ஒரே தாய் தந்தையின் வழித்தோன்றல்களே என்ற இஸ்லாமியக் கோட்பாட்டை ஏற்றுக்கொள்வதே தீண்டாமையை ஒழித்து, உலகில் உண்மையான சமத்துவத்தை நிலைநிறுத்துவதற்கான ஒரே வழியாகும்.