08) தலைமுடி வைப்பது

அடுத்ததாக, தலைமுடி வைப்பது தொடர்பான சட்டங்களை நாம் அறிந்து கொள்ள வேண்டும். இது குழந்தைகளுக்கும் பெரியவர்களுக்கும் பொதுவானதாகும். அக்காலத்தில் தலையை முழுமையாக மொட்டையடித்துக் கொள்வதுதான் நல்ல பிள்ளைக்கு அடையாளம் என்ற எண்ணமும், குழந்தைகள் முடி வெட்டும் முறைகள் குறித்துப் பல்வேறு கருத்துகளும் நிலவின.

நபி (ஸல்) அவர்களின் காலத்தில் தலையில் ஒரு குறிப்பிட்ட பகுதியில் மட்டும் குடுமி போன்று முடியை விட்டுவிட்டு, மற்ற பகுதிகளைச் சிரைத்துவிடும் வழக்கம் இருந்தது. அதாவது தலைமுடியின் ஒரு பகுதியைச் சிரைத்துவிட்டு, மற்றொரு பகுதியைச் சிரைக்காமல் விட்டுவிடுவது மார்க்கத்தில் தடை செய்யப்பட்டுள்ளது. சிலர் தர்காக்களில் உள்ள அவ்லியாக்களுக்கு நேர்த்திக்கடன் செய்துவிட்டு, தலையின் சில பகுதிகளில் மட்டும் முடியை நீண்ட கொம்பு போன்று வளரவிட்டு மற்ற பகுதிகளைச் சிரைத்து விடுகிறார்கள். அவ்லியாக்களுக்காக நேர்த்திக்கடன் வைப்பது இணைவைப்பாகவும் மார்க்கத்தில் இல்லாத பித்அத்தாகவும் மாறுவதுடன், தலைமுடியை இவ்வாறு அமைப்பதும் குற்றமாகும். நேர்த்திக்கடன் இல்லாமல் சாதாரணமாக இப்படிச் செய்வதும் கூட குற்றமேயாகும். இவ்வாறு ஒரு பகுதியைச் சிரைத்துவிட்டு மற்றொரு பகுதியைச் சிரைக்காமல் விடுவதற்கு மார்க்கத்தில் ‘கஸஹ்’ என்று கூறப்படும்; இதனை நபி (ஸல்) அவர்கள் தடை செய்துள்ளார்கள் (புகாரி: 5920) ➚.

நபி (ஸல்) அவர்கள் ஒரு சிறுவனைப் பார்த்தார்கள். அவனது தலைமுடியின் ஒரு பகுதி சிரைக்கப்பட்டும், மற்றொரு பகுதி சிரைக்கப்படாமலும் இருந்தது.

فَنَهَى عَنْ ذَلِكَ إحْلِقُوا كُلَّهُ أَوْ اتْرُكُوا كُلَّهُ
அதை அவர்கள் தடுத்துவிட்டு, “அதை முழுமையாகச் சிரைத்து விடுங்கள்; அல்லது முழுமையாக விட்டுவிடுங்கள்” என்று கூறினார்கள்.
(நஸயீ: 4962,(அபூதாவூத்: 3663) ➚

தலைமுடியைக் குறைப்பதாக இருந்தால் ஒரு பக்கம் சற்று அதிகமாகவும், மற்றொரு பக்கம் குறைவாகவும் வெட்டிக் கொள்வதில் தடையில்லை. ஆனால் சிரைப்பது என்று வந்துவிட்டால், ஒன்று தலை முழுவதையும் மொட்டையடித்து விட வேண்டும் அல்லது முழுமையாக விட்டுவிட வேண்டும். ஒரு பகுதியை மட்டும் சிரைத்துவிட்டு இன்னொரு பகுதியை விட்டுவிடுவது கூடாது.

அதேவேளையில், தலைமுடி முழுவதையும் மொட்டையடிப்பது மட்டுமே சிறந்தது என்றோ, அதுதான் நல்ல முஸ்லிமுக்குரிய அடையாளம் என்றோ கருதுவதும் தவறாகும். கோடைகால வெப்பம் தாங்காமலோ, சளி மற்றும் நீர் கோர்த்துக் கொள்வது போன்ற உடல்நலக் காரணங்களுக்காகவோ மொட்டையடித்துக் கொள்வதில் தவறில்லை. ஆனால் மொட்டையடிப்பதுதான் மார்க்கத்தில் சிறந்தது என்று நம்பினால் அது பிழையாகிவிடும்.

يخرج ناس من قِبَل المشرق (கிழக்குத் திசையிலிருந்து சில மனிதர்கள் தோன்றுவார்கள்) என்று நபி (ஸல்) அவர்கள் கூறினார்கள். அவர்கள் குர்ஆனை ஓதுவார்கள்; ஆனால் அது அவர்களின் தொண்டைக்குழியைத் தாண்டாது என்று குறிப்பிட்ட நபி (ஸல்) அவர்கள், அவர்களின் அடையாளம் سيماهم التَّحْلِيقُ (அவர்களின் அடையாளம் மொட்டையடித்துக் கொள்வது) என்றும் தெரிவித்தார்கள். குர்ஆனை நாவினால் ஓதிக்கொண்டு தீனில் இருப்பது போன்று தங்களைக் காட்டிக் கொள்ளும் அத்தகையோர், மொட்டையடிப்பதைத் தங்களின் அடையாளமாகக் கொண்டிருப்பார்கள். எனவே, மொட்டையடிப்பதை மட்டுமே மார்க்கத்தின் அடையாளமாக ஆக்கிக்கொள்வதும் தவறான அணுகுமுறையாகும்.

தப்லீக் ஜமாஅத்தில் செல்பவர்கள் தங்கள் பிள்ளைகளுக்கு மொட்டை அடித்து விடுவதைப் பார்க்க முடிகிறது. மொட்டை அடிப்பதை மார்க்கத்தில் விரும்பத்தக்க ஒன்றாகக் கருதிச் செய்தால், அது ஒரு குறிப்பிட்ட கூட்டத்தாரின் அடையாளமாக மாறிவிடும் (புகாரி: 7562) ➚. அதேநேரம் சுகாதாரம், பேன், பொடுகு, தண்ணீர் பற்றாக்குறை அல்லது தனிப்பட்ட வசதிக்காக ஒருவர் மொட்டை அடித்துக் கொண்டால் அதில் தவறில்லை. தலையை மழித்தால் முழுமையாக மழிக்க வேண்டும், இல்லையெனில் முழுமையாக விட்டுவிட வேண்டும் என்ற அனுமதி இதற்கு ஆதாரமாகும். ஆனால் மொட்டை அடிப்பதை ஒரு மார்க்க அடையாளமாக ஆக்கக் கூடாது.

நபி (ஸல்) அவர்கள் அதிக அளவில் தலைமுடி வைத்திருந்தார்கள். ஒருவர் தலைமுடியை அதிக அளவில் வளர்ப்பது மார்க்கத்தில் குற்றமல்ல; அதனைப் பராமரிக்கும் முறையில் பராமரித்தால் போதுமானது. தாபியீன்களில் ஒருவர் ஜாபிர் (ரலி) அவர்களிடம், குளிப்பதற்கு எவ்வளவு தண்ணீர் தேவைப்படும் என்று கேட்டார். அதற்கு ஜாபிர் (ரலி) அவர்கள், ஒரு ஸாவு (இரு கைகளாலும் நான்கு முறை அள்ளும் அளவு) தண்ணீர் போதுமானது என்றார்கள். அதற்கு அவர், நான் அதிக முடி வைத்திருக்கும் போது எனக்கு ஒரு ஸாவு எவ்வாறு போதுமாகும் என்று கேட்டார். அதற்கு ஜாபிர் (ரலி) அவர்கள், உன்னை விட அதிக முடி வைத்திருந்த நபி (ஸல்) அவர்களுக்கு அது போதுமானதாக இருந்தது என்று பதிலளித்தார்கள்.

كَانَ يَكْفِي مَنْ هُوَ أَوْفَى مِنْكَ شَعَرًا
உன்னை விட அதிக முடி கொண்ட நபி (ஸல்) அவர்களுக்கு அது போதுமானதாக இருந்தது.
(புகாரி: 252, 256) ➚

நபி (ஸல்) அவர்கள் எந்த அளவுக்கு முடி வைத்திருந்தார்கள் என்றால், சில நேரங்களில் அவர்களது தலைமுடி காது சோனை வரை இருக்கும்; சில நேரங்களில் தோள்பட்டை வரை இருக்கும். இவ்விரு அறிவிப்புகளுக்கிடையே முரண்பாடு இல்லை. முடி வெட்டப்படாமல் வளரும் போது தோள்பட்டை வரை வரும்; பின்னர் வெட்டும் போது காது சோனை வரை இருக்கும். மதரசாவில் ஓதும் மாணவர்கள் அல்லது ஆலிம்கள் என்றால் மொட்டை அடிக்க வேண்டும் என்று சிலர் நினைக்கிறார்கள். ஆனால் நபி (ஸல்) அவர்களே காது சோனை வரையிலும், தோள்பட்டை வரையிலும் தலைமுடி வைத்துள்ளார்கள் (புகாரி: 3551, 5903, 5904) ➚. எனவே தலைமுடியை அதிகமாக வளர்ப்பது குற்றமல்ல.

நபி (ஸல்) அவர்கள் எப்போதும் தலைப்பாகையோ தொப்பியோ அணிந்திருப்பார்கள் என்று சிலர் கற்பனை செய்கிறார்கள். ஆனால் நபி (ஸல்) அவர்கள் தலைமுடிக்கு எண்ணெய் தேய்த்து, அதனை நெற்றியில் படியவிட்டு அழகாக வைத்திருப்பார்கள். இணைவைப்பாளர்கள் தலைமுடியை வகிடு எடுத்து வாரி வந்தார்கள்; வேதமுடையவர்கள் தலைமுடியை நெற்றியில் விழும்படி விட்டிருந்தார்கள். நபி (ஸல்) அவர்கள் வகிடு எடுக்காமல் நெற்றியில் தொங்கவிட்டார்கள். தலைப்பாகை கட்டினால் இத்தகைய சிகை அலங்காரம் சாத்தியப்படாது. எனவே தலைமுடிக்கு எண்ணெய் தேய்த்து அழகாகப் பராமரித்து நேர்த்தியாக இருப்பது மார்க்கத்தில் அனுமதிக்கப்பட்ட, விரும்பத்தக்க ஒரு செயலாகும் (புகாரி: 3558, 3944) ➚.

அதேசமயம் தலைமுடி வளர்ப்பதாக இருந்தால் அதனை ஒழுங்காகப் பராமரிக்க வேண்டும். எண்ணெய் தேய்த்து தலைமுடியைப் படிய வைக்காமல் பறக்கவிட்டோ, பறவைக் கூடு போன்று பரட்டையாகவோ வைத்திருப்பதை நபி (ஸல்) அவர்கள் கண்டித்துள்ளார்கள். ஜாபிர் (ரலி) அவர்கள் அறிவிக்கிறார்கள்: நபி (ஸல்) அவர்கள் எங்களிடம் வந்தபோது, ஒருவர் ثَائِرَ الرَّأْسِ (தலைவிரி கோலமாக) இருப்பதைக் கண்டார்கள்.

أَمَا يَجِدُ هَذَا مَا يُسَكِّنُ بِهِ شَعْرَهُ
தனது தலைமுடியைப் படிய வைப்பதற்கு இவருக்கு ஒன்றுமே கிடைக்கவில்லையா?
(நஸயீ: 5141)

அதேபோன்று, தனக்கு அதிக முடி இருப்பதாகக் கூறி ஒருவர் வழிகாட்டல் கேட்டபோது, அதனை மழித்துவிடாமல் தினமும் தலைவாரிப் பராமரிக்குமாறு நபி (ஸல்) அவர்கள் வழிகாட்டினார்கள்.

فَأَمَرَهُ أَنْ يُحْسِنَ إِلَيْهَا وَأَنْ يَتَرَجَّلَ كُلَّ يَوْمٍ
தனது தலைமுடியை அழகாகப் பராமரிக்குமாறும், நாள்தோறும் சீவி ஒழுங்குபடுத்துமாறும் நபி (ஸல்) அவர்கள் அவருக்குக் கட்டளையிட்டார்கள்.
(நஸயீ: 5142)

எனவே தலைமுடியை மொட்டை அடித்துக் கொள்வது அனுமதிக்கப்பட்டதே தவிர, அது ஒரு விரும்பத்தக்க காரியமோ மார்க்க அடையாளமோ அல்ல. அதனை ஒரு அடையாளமாக ஆக்கினால் குற்றமாகும். அதேபோன்று தலைமுடியைத் தோள்பட்டை வரை வளர்ப்பதும், விரும்பிய அமைப்பில் சீராக வெட்டிக்கொள்வதும் அனுமதிக்கப்பட்டது. தலையின் ஒரு பகுதியில் முடியை மழித்துவிட்டு, மற்றொரு பகுதியில் மழிக்காமல் விடுவதற்கு மட்டுமே மார்க்கத்தில் தடை உள்ளது. மற்றபடி தலையின் ஒரு பகுதியை அதிகமாகக் குறைத்து, மற்றொரு பகுதியைக் குறைவாகக் குறைப்பதற்கோ, குழந்தைகள் மற்றும் பெரியவர்கள் தங்கள் விருப்பத்திற்கேற்ப குறைத்துக் கொள்வதற்கோ தடையில்லை.

மேலும் நபி (ஸல்) அவர்களின் காலத்தில் சிறுவர்களுக்குத் தலைமுடியில் ذُؤَابَة (சடை போன்ற குடுமி) வைக்கும் வழக்கமும் இருந்துள்ளது. இப்னு அப்பாஸ் (ரலி) அவர்கள் சிறுவராக இருந்தபோது மைமூனா (ரலி) அவர்களின் வீட்டில் தங்கியிருந்தார்கள். நபி (ஸல்) அவர்கள் தொழுகையில் நின்றபோது, இப்னு அப்பாஸ் (ரலி) அவர்கள் நபி (ஸல்) அவர்களுக்கு இடதுபுறமாக நின்றார்கள். உடனே நபி (ஸல்) அவர்கள் இப்னு அப்பாஸ் (ரலி) அவர்களின் சடையைப் பிடித்துத் தங்களின் வலதுபுறத்திற்குக் கொண்டு வந்து நிறுத்தினார்கள்.

இப்னு அப்பாஸ் (ரலி) அவர்கள் தம்முடைய சிறிய தாயார் மைமூனா (ரலி) அவர்களின் இல்லத்தில் தங்கியிருந்தபோது நபி (ஸல்) அவர்களுடன் தொழுத நிகழ்வை விவரிக்கிறார்கள். அப்போது அவர்கள் தம்முடைய தலையில் முடியைப் பின்னலிட்டு வைத்திருந்தார்கள். தொழுவதற்காக நபி (ஸல்) அவர்கள் அவருடைய குடுமியைப் பிடித்துத் தங்களின் வலது பக்கத்தில் நிறுத்தினார்கள்.

فَأَخَذَ بِذُؤَابَتِي فَجَعَلَنِي عَنْ يَمِينِهِ
அவர்கள் என்னுடைய குடுமியைப் பிடித்து என்னை தங்களின் வலப்பக்கத்தில் நிறுத்தினார்கள்.
(புகாரி: 5919) ➚

ஆண்கள் தலைமுடியை ஒன்றாகச் சேர்த்துக் கட்டிக்கொள்வதோ பின்னலிட்டுக்கொள்வதோ பெண்களுக்கான முறை மட்டுமே என்று எண்ண வேண்டியதில்லை. வழக்கத்தில் இல்லாததால் பார்ப்பதற்கு அது விசித்திரமாகத் தோன்றினாலும், ஆண்கள் தலைமுடியை அவ்வாறு வைத்துக்கொள்வதற்கு மார்க்கத்தில் எந்தத் தடையும் இல்லை. தலைமுடியைப் பொறுத்தவரை ஆண்கள் தங்களுக்கு விருப்பமான முறையில் வைத்துக் கொள்ளலாம்; ஆனால் அதனைப் பரட்டையாக விட்டுவிடாமல் அழகாகவும் நேர்த்தியாகவும் பராமரிக்க வேண்டும்.

பெண்கள் தலைமுடி வைப்பது தொடர்பாக நிலவும் சில கருத்துக்களையும் நாம் தெரிந்துகொள்ள வேண்டும். பெண்கள் தலைமுடியை வெட்டுவதோ, தோள்பட்டை அளவுக்குக் குறைத்துக் கொள்வதோ கூடாது என்றும், பெண்களின் கூந்தல் தரையைத் தொடும் அளவுக்குத்தான் இருக்க வேண்டும் என்றும் பரவலாக எண்ணுகிறார்கள். ஆனால் பெண்கள் தலைமுடியை வெட்டவே கூடாது என்று நபி (ஸல்) அவர்கள் கூறவில்லை. ஹஜ்ஜை முடிக்கும்போது தலைமுடியைக் கையாள்வது பற்றி مُحَلِّقِينَ أَوْ مُقَصِّرِينَ (தலைமழித்தவர்களாகவோ அல்லது தலைமுடியைக் குறைத்துக் கொண்டவர்களாகவோ) என்று திருக்குர்ஆன் குறிப்பிடுகிறது. இது தொடர்பாகப் பேசும்போது பெண்கள் தலைமுடியை மழிக்கக் கூடாது என்றும், குறைத்துக் கொள்ளத்தான் வேண்டும் என்றும் நபி (ஸல்) அவர்கள் கூறினார்கள்.

لَيْسَ عَلَى النِّسَاءِ الْحَلْقُ وَإِنَّمَا عَلَى النِّسَاءِ التَّقْصِيرُ
பெண்கள் தலைமுடியை மழிக்க வேண்டியதில்லை; மாறாக, அவர்கள் குறைத்துக் கொள்ள வேண்டும்.

ஹஜ்ஜின்போது பெண்கள் தலைமுடியை மழிக்கக் கூடாது, குறைத்துக் கொள்ளத்தான் வேண்டும் என்ற வழிகாட்டல் மட்டுமே வந்துள்ளதே தவிர, பொதுவாகப் பெண்கள் தலைமுடியை வெட்டிக்கொள்ளக் கூடாது என்று மார்க்கத்தில் எங்கும் கூறப்படவில்லை. மார்க்கத்தில் கூடாது என்று சொல்வதாக இருந்தால் அதற்குத் திருக்குர்ஆனிலோ நபி (ஸல்) அவர்களின் வழிகாட்டலிலோ தெளிவான தடை இருக்க வேண்டும். அவ்வாறு எந்தத் தடையும் இல்லாதபோது அது பொதுவாக அனுமதிக்கப்பட்டது என்றே விளங்க வேண்டும். எனவே பேன் தொல்லை, பராமரிப்பில் ஏற்படும் சிரமம், புண், சிரங்கு அல்லது விருப்பமின்மை போன்ற காரணங்களுக்காக ஒரு பெண் தன் தலைமுடியை ஓரளவு குறைத்து வெட்டிக்கொள்வதில் மார்க்க அடிப்படையில் எந்தக் குற்றமும் இல்லை.

அடுத்தபடியாகப் பெண்கள் தலைமுடி விஷயத்தில், தலைமுடிதான் வாழ்க்கை என்பதுபோல கருதுகிறார்கள். தலைமுடி குறைவாக இருந்தால் ஏதோ மிகப்பெரிய இழப்பு ஏற்பட்டுவிட்டதாகக் கருதி, அதிகமாக முடி இருப்பதாகக் காட்டுவதற்காக ஒட்டுமுடி வைத்துக் கொள்ளும் வழக்கம் பெண்களிடம் பரவலாக உள்ளது. பிறருடைய தலைமுடியையோ அல்லது செயற்கை இழை, பிளாஸ்டிக், நைலான் போன்றவற்றால் செய்யப்பட்டு முடி போன்ற தோற்றமுடையவற்றையோ ஒட்டிக்கொள்கிறார்கள். இதற்கு இஸ்லாத்தில் அனுமதி இல்லை.

முஆவியா (ரலி) அவர்கள் ஆட்சியாளராக இருந்தபோது மிம்பரில் ஏறி உரை நிகழ்த்துகையில், ஒரு கொத்து ஒட்டுமுடியை எடுத்துக் காட்டி, أَيْنَ عُلَمَاؤُكُمْ؟ (உங்களுடைய அறிஞர்கள் எங்கே?) என்று கேட்டுவிட்டு, இத்தகைய ஒட்டுமுடி வைப்பதை நபி (ஸல்) அவர்கள் தடுத்துள்ளார்கள் என்பதை மக்களுக்கு நினைவூட்டினார்கள். இஸ்ரவேல் சமுதாயத்துப் பெண்கள் இவ்வாறு ஒட்டுமுடி வைத்துக்கொண்ட பின்னரே அழிந்துபோனார்கள் என்றும் நபி (ஸல்) அவர்கள் எச்சரித்ததாக எடுத்துரைத்தார்கள் (புகாரி: 3468, 5933) ➚. தலையில் ஒட்டுமுடி வைப்பதை நபி (ஸல்) அவர்கள் الزُّورُ (பொய் / போலித்தனம்) என்றும் குறிப்பிட்டார்கள் (புகாரி: 3488) ➚. தன்னிடம் இருப்பதை மட்டுமே ஒருவர் காட்டிக்கொள்ள வேண்டுமே தவிர, இல்லாத ஒன்றை இருப்பதாகக் காட்டி ஏமாற்றக் கூடாது.

ஒரு பெண்மணி நபி (ஸல்) அவர்களிடம் வந்து, தம் மகளுக்குத் தலைமுடி உதிர்ந்துவிட்ட காரணத்தால் ஒட்டுமுடி வைத்துக் கொள்ளலாமா என்று கேட்டபோது, நபி (ஸல்) அவர்கள் அதற்கு அனுமதியளிக்கவில்லை.

إِنَّهُ قَدْ لُعِنَ الْمُوصِلَاتُ
நிச்சயமாக ஒட்டுமுடி வைத்துக்கொள்ளக் கூடியவர்கள் சபிக்கப்பட்டுள்ளார்கள்.
(புகாரி)

இயற்கையான மனித முடியாக இருந்தாலும் சரி, செயற்கை முடியாக இருந்தாலும் சரி, ஒட்டுமுடி வைப்பது முற்றிலும் தவிர்க்கப்பட வேண்டும். இளம் வயதாக இருந்தாலும் சரி, முதிய வயதாக இருந்தாலும் சரி, தலைமுடி குறைந்துவிட்டால் அதனை ஓரளவு வெட்டிச் சரிசெய்து கொள்ளலாமே தவிர ஒட்டுமுடி வைக்கக் கூடாது. ஒட்டுமுடி வைப்பவர்களை நபி (ஸல்) அவர்கள் பல சந்தர்ப்பங்களில் கண்டித்துத் தடுத்துள்ளார்கள்.

வயதாகும்போது தலைமுடியும் தாடியும் நரைத்துவிடுவது இயல்பானது. அவ்வாறு நரைத்துவிட்டால், ஆண் பெண் இருவருமே அந்த நரைமுடியை அப்படியே விட்டுவிட வேண்டுமா அல்லது நிறத்தை மாற்றிக்கொள்ளலாமா என்றால், நபி (ஸல்) அவர்கள் நரையின் நிறத்தை மாற்றுவதையே வலியுறுத்தியுள்ளார்கள்.

إِنَّ الْيَهُودَ وَالنَّصَارَى لاَ يَصْبُغُونَ فَخَالِفُوهُمْ
யூதர்களும் கிறித்தவர்களும் சாயம் பூசுவதில்லை; எனவே அவர்களுக்கு நீங்கள் மாறு செய்யுங்கள்.
(புகாரி: 3462) ➚

அபூபக்ர் (ரலி) அவர்களின் தந்தையான அபூகுஹஃபா அவர்கள் மக்கா வெற்றியின்போது முதிர்ந்த வயதில் இஸ்லாத்தைத் தழுவ நபி (ஸல்) அவர்களிடம் அழைத்து வரப்பட்டார். அவருடைய தலைமுடியும் தாடியும் வெண்மையாக இருந்ததைக் கண்ட நபி (ஸல்) அவர்கள், அதன் நிறத்தை மாற்றுமாறு வழிகாட்டினார்கள்.

غَيِّرُوا هَذَا بِشَيْءٍ وَاجْتَنِبُوا السَّوَادَ
இதை ஏதேனும் ஒன்றைக் கொண்டு மாற்றுங்கள்; மேலும் கறுப்பு நிறத்தைத் தவிர்த்துக் கொள்ளுங்கள்.
(முஸ்லிம்: 3925) ➚

ஒட்டுமுடி வைப்பது எவ்வாறு போலித்தனமோ, அதேபோன்று நரைமுடிக்குக் கறுப்பு நிறச் சாயம் பூசுவதும் நரைக்கவே இல்லை என்பது போன்ற போலித்தோற்றத்தை ஏற்படுத்தும். எனவே மருதாணி அல்லது பழுப்பு போன்ற வண்ணங்களைப் பயன்படுத்தி நரையின் நிறத்தை மாற்றிக்கொள்ள வேண்டும்; கறுப்பு நிறத்தைத் தவிர்க்க வேண்டும். நபி (ஸல்) அவர்கள் நரைமுடிக்குச் சாயம் பூசும்படி பிறருக்குக் கூறினாலும், அவர்கள் தங்களின் நரைமுடிக்குச் சாயம் பூசியிருக்கிறார்களா என்று அனஸ் (ரலி) அவர்களிடம் கேட்கப்பட்டது.

நபி (ஸல்) அவர்கள் தம் நரைமுடிக்கு சாயம் பூசியிருக்கிறார்களா என்று பார்த்தால், சாயம் பூசும் அளவிற்கு அவர்களுக்கு நரைமுடி இருக்கவில்லை. அவர்களுக்கு வயதான பிறகும் கூட ஆங்காங்கே பத்தோ பதினைந்தோ முடிகள் மட்டுமே நரைத்திருந்தன; அந்த நிலையிலேயே மரணித்தார்கள். எனவே அவர்கள் சாயம் பூசும் அளவிற்குத் தேவை ஏற்படவில்லை. ஆங்காங்கே ஓரிரு முடிகள் இருந்தால் அதை அப்படியே விட்டுவிடலாம். ஆனால் தலைமுடி அதிகமாக நரைத்து வெளுத்துப் போனால் சாயம் பூசுவதே நல்லது.

நரை அதிகமாகிவிட்டால் சாயம் பூசாமல் விட்டுவிடுவதை விட, யூதர்களுக்கு மாறுசெய்யும் நோக்கில் நரையின் நிறத்தை மாற்றுமாறு நபி (ஸல்) அவர்கள் வழிகாட்டினார்கள். இது கட்டாயக் கடமை இல்லையென்றாலும், வலியுறுத்தப்பட்ட ஒரு சுன்னத்தாகும். இயற்கையாக இருக்கிறோம் என்று கூறிக்கொண்டு நரையை மாற்றாமல் இருப்பது நல்லது என்று எண்ணிவிடக் கூடாது. அபூபக்கர் (ரலி) அவர்களின் தந்தையைப் பார்த்தபோதும் நபி (ஸல்) அவர்கள் ஒரு பொதுவான வழிகாட்டலாக இதைத் தெரிவித்தார்கள்.

غَيِّرُوا الشَّيْبَ وَلَا تَشَبَّهُوا بِالْيَهُودِ
நரையை மாற்றிக் கொள்ளுங்கள்; யூதர்களுக்கு ஒப்ப நடக்காதீர்கள்.
(திர்மிதி: 1674)

அதேநேரத்தில் நரைக்குக் கருப்புச் சாயம் பூசுவதைத் தவிர்த்துக் கொள்ள வேண்டும். வெண்மையான முடியைக் கருப்பாக மாற்றினால், இளமை திரும்பிவிட்டதுபோல மக்களை ஏமாற்றுவதுபோல் ஆகிவிடும். கருப்பைத் தவிர்த்து பிரவுன், வெளிர் பிரவுன், மஞ்சள், மருதாணி போன்ற பிற வண்ணங்களைப் பூசி நரையை மாற்றிக் கொள்ளலாம். பிற்காலத்தில் ஒரு கூட்டத்தார் தம் முடிகளுக்குக் கண்ணங்கரேல் என்று சாயம் பூசுவார்கள் என்றும், அவர்கள் சொர்க்கத்தின் வாடையைக் கூட நுகர மாட்டார்கள் என்றும் நபி (ஸல்) அவர்கள் கடுமையாக எச்சரித்திருக்கிறார்கள். எனவே கருப்பு நிறத்தைத் தவிர்த்துவிட்டு மற்ற வண்ணங்களைத் தலை, தாடி, மீசைக்குச் சாயமாகப் பூசிக் கொள்வதில் தவறில்லை.

لَا يَرِيحُونَ رَائِحَةَ الْجَنَّةِ
அவர்கள் சொர்க்கத்தின் வாசனையைக்கூட நுகர மாட்டார்கள்.
(அபூதாவூத்: 4212) ➚

பெண்கள் தலைமுடியைப் பின்னி ஒற்றைச் சடை அல்லது இரட்டைச் சடை போடுவதைத் தவறான ஒன்றாகச் சிலர் கருதுகிறார்கள். நபி (ஸல்) அவர்களின் மகள் மரணித்தபோது அவருக்குக் குளிப்பாட்டிவிட்டு, அவரது தலைமுடியை மூன்று பின்னல்களாகப் பின்னினார்கள். எனவே பெண்கள் தலைமுடியைப் பின்னிச் சடை போடுவதில் எந்தத் தடையும் இல்லை.

فَضَفَرْنَا شَعَرَهَا ثَلَاثَةَ قُرُونٍ
நாங்கள் அவரது தலைமுடியை மூன்று ஜடைகளாகப் பின்னினோம்.
(புகாரி: 1254) ➚

குழந்தைகளுக்குத் தலைமுடியை மொட்டையடிப்பது, குடுமி வைப்பது, ஒரு பகுதியை மழித்து மற்றொரு பகுதியை விட்டுவிடுவது போன்ற நம்பிக்கைகள் குறித்தும், பெரியவர்கள் முடி வைப்பது தொடர்பான சட்டங்கள் குறித்தும் பார்த்தோம். மேலும் குழந்தைகளுக்கு அணிகலன்கள் அணிவித்தல், சுன்னத் செய்தல், பெயரிடுதல், பருவமடைதல், காது மூக்கு குத்துதல் ஆகியவற்றைப் பற்றியும் பார்த்தோம்.