தேனீக்களின் அதிசய ஜி.பி.எஸ்

நாம் வழியைக் கண்டுபிடிக்கப் பயன்படுத்தும் கூகிள் மேப்ஸ் (Google Maps) அல்லது ஜி.பி.எஸ் (GPS) செயலிகளுக்கு செயற்கைக்கோள்கள், இணையம் மற்றும் நவீன ஸ்மார்ட்போன்கள் தேவைப்படுகின்றன. ஆனால், எந்தவொரு எலக்ட்ரானிக் கருவியும் இல்லாமல், காடுகளிலும் தோட்டங்களிலும் பல கிலோமீட்டர்கள் பறந்து துல்லியமாகத் தன் கூட்டுக்குத் திரும்பும் ஒரு அதிசய உயிரிதான் தேனீ (Honey Bee). தேனீக்களின் இந்தத் திறன் ஒரு தலைசிறந்த உயிரியல் ஜி.பி.எஸ் (Biological GPS) அமைப்பாகும்.

தேனீக்கள் தனியாக ஒரு வழியை மட்டும் நம்பிப் பறப்பதில்லை. அவை பல வழிகளில் திசையறியும் திறனைக் கொண்டுள்ளன. சூரியனின் திசையை வைத்துத் தன் பயணத் திசையைத் தீர்மானிக்கின்றன. மேகமூட்டமாக இருந்தாலும், சூரியனின் புற ஊதாக்கதிர்கள் (Polarized Light) மூலம் திசையை அறிந்துகொள்ளும். மேலும், தேனீக்களின் உடலில் உள்ள நுண்ணிய காந்தத் துகள்கள் பூமியின் காந்தப்புலத்தை உணர்ந்து திசையைக் காட்டுகின்றன. பெரிய மரங்கள், மலைகள், நீர்நிலைகள் போன்ற நில அடையாளங்களை நினைவில் வைத்து, அவற்றை ஒரு வரைபடமாகப் பதிவு செய்துகொள்கின்றன. இந்த மூன்று முறைகளையும் இணைத்துச் செயல்படுவதையே ‘பல-வழி திசையறிதல்’ (Multi-modal Navigation) என்று அழைக்கிறார்கள்.

ஒரு தேனீ நல்ல மலர்த் தோட்டத்தைக் கண்டுபிடித்ததும், உடனே கூட்டுக்குத் திரும்பி மற்ற தேனீக்களுக்கு அந்த இடத்தைப் பகிர்கிறது. அது பேசுவதற்குப் பதிலாக, ‘8’ வடிவத்தில் உடலை அசைத்து ஆடும் ஒரு நடனத்தைப் பயன்படுத்துகிறது. இதற்கு ‘வாகிள் நடனம்’ (Waggle Dance) என்று பெயர். இந்த நடனத்தின் மூலம் மலர்கள் இருக்கும் திசையையும் தூரத்தையும் மற்ற தேனீக்களுக்குத் தெரிவிக்கிறது. தேனீ தன் நடனத்தை நேர் மேல்நோக்கிச் சூரியனை நோக்கி அமைக்கும் கோணம், மலர்கள் இருக்கும் திசையைக் காட்டுகிறது. தேனீ தன் உடலை அசைக்கும் கால அளவு தூரத்தைக் குறிக்கிறது; எடுத்துக்காட்டாக, 1 வினாடி அசைவு சுமார் 1 கிலோமீட்டர் தூரத்தைக் குறிக்கும். இது விண்கலங்கள் அனுப்பும் டெலிமெட்ரி டேட்டா டிரான்ஸ்மிஷன் (Telemetry Data Transmission) மற்றும் வரைபடங்களில் புள்ளிகளைக் குறிக்கும் கோஆர்டினேட் மேப்பிங் (Coordinate Mapping) போன்றது.

ஒரு தேனீயின் மூளை வெறும் 1 மில்லிமீட்டர் அளவு மட்டுமே கொண்டது. அதாவது, நாம் உணவில் சேர்க்கும் ஒரு சிறிய எள் அல்லது ஒரு கடுகு அளவுதான் இருக்கும். மனித மூளையில் சுமார் 8,600 கோடி நியூரான் (Neuron) செல்கள் உள்ளன. ஆனால், தேனீயின் இந்த எள் போன்ற சிறிய மூளையில் இருப்பது வெறும் 10 லட்சம் நியூரான்கள் மட்டுமே. இவ்வளவு சிறிய மூளைக்குள், பெரிய கணிதப் பேராசிரியர்கள் போடும் வெக்டர் கால்குலஸ் (Vector Calculus) மற்றும் ஸ்பேஷியல் மேப்பிங் (Spatial Mapping) போன்ற மிகக் கடினமான கணக்கீடுகள் நொடிப்பொழுதில் நடக்கின்றன. காற்று வீசும் திசை, வேகம் ஆகியவற்றைச் சரிசெய்து, நேர்கோட்டில் பறந்து பூக்களை அடைவது இயற்கையின் இணையற்ற பொறியியல் விந்தையாகும்.

இத்தகைய நுட்பமான வழிசெலுத்தல் திறன்களையும், மிகச் சிறிய மூளையில் நிகழும் சிக்கலான கணக்கீடுகளையும் கொண்ட தேனீக்களைப் படைத்த இறைவனின் அளவற்ற ஞானத்தையும் ஆற்றலையும் நாம் சிந்தித்துப் பார்க்க வேண்டும். இந்தச் சிறிய உயிரினத்தின் ஒவ்வொரு அசைவிலும் இறைவனின் படைப்புத் திறன் வெளிப்படுகிறது.