04) பிராணிகளை வீடுகளில் வளர்ப்பதற்கு அனுமதி உண்டு

சிட்டுக்குருவி, கிளி, மைனா, பூனை போன்ற பிராணிகளை வீடுகளில் வளர்ப்பதற்கு மார்க்கத்தில் அனுமதி உண்டு. நபித்தோழர் அனஸ் (ரலி) அவர்களின் தம்பியான அபூ உமைர் என்ற சிறுவர் ஒரு சிட்டுக்குருவியை வளர்த்து வந்தார். நபி (ஸல்) அவர்கள் வரும்போதெல்லாம் அவரிடமும் அந்தக் குருவியைப் பற்றியும் விசாரிப்பார்கள். ஒருநாள் அந்தக் குருவி இறந்துவிட்டபோது, கவலையோடு அமர்ந்திருந்த அந்தச் சிறுவரிடம் நபி (ஸல்) அவர்கள் அன்போடு விசாரித்தார்கள்.

يَا أَبَا عُمَيْرٍ مَا فَعَلَ النُّغَيْرُ
அபூ உமைரே! உமது சிட்டுக்குருவி என்ன ஆனது?
(புகாரி: 6203) ➚ ➚

உயிரினங்களை வீடுகளில் வளர்க்க மார்க்கம் தடை செய்யவில்லை. ஆனால், அவற்றை வளர்த்தால் உரிய முறையில் உணவளிக்க வேண்டும்; இல்லையெனில், சுதந்திரமாக இரை தேட விட்டுவிட வேண்டும். பூனை ஒன்றைக் கட்டிப்போட்டு, உணவும் அளிக்காமல், வெளியே சென்று இரை தேடவும் விடாமல் பட்டினி போட்டுக் கொன்ற ஒரு பெண் நரகத்திற்குச் சென்ற செய்தியை நபி (ஸல்) அவர்கள் எச்சரித்துள்ளார்கள்.

அபூ கதாதா (ரலி) அவர்கள் தமது மகனின் வீட்டிற்குச் சென்று, உளூச் செய்வதற்காகத் தண்ணீர் கேட்டார்கள். அப்போது அங்கு வளர்க்கப்பட்ட பூனை ஒன்று வந்து அந்தத் தண்ணீரில் வாய் வைத்தது. உடனே அவர்கள் அந்தப் பாத்திரத்தைச் சாய்த்து அப்பூனைக்குத் தண்ணீர் குடிக்கக் கொடுத்தார்கள்; பின்னர் அது குடித்து மிச்சம் வைத்த தண்ணீரிலேயே உளூச் செய்தார்கள். இதைக் கண்ட அவருடைய மருமகள் வியப்புடன் கேட்டபோது, பூனைகள் வீடுகளில் மனிதர்களோடு சுற்றித் திரியக்கூடிய செல்லப் பிராணிகள் என்றும், அவை அசுத்தமானவை அல்ல என்றும் நபி (ஸல்) அவர்கள் கூறியதை நினைவுகூர்ந்தார்கள். இது திர்மிதியில் 85-வது செய்தியாக இடம்பெற்றுள்ளது. உயிரினங்களை வளர்க்கவும், சவாரி செய்யவும், அனுமதிக்கப்பட்டவற்றை உண்ணவும் மார்க்கத்தில் அனுமதி உண்டு; ஆனால் அவற்றை வீணாகச் சித்திரவதை செய்ய அனுமதி இல்லை.