02) உயிரினங்களைப் பட்டினி போடுவது கூடாது

உணவு, சவாரி போன்ற மனிதத் தேவைகளுக்காக ஆடு, மாடு, ஒட்டகம், குதிரை போன்ற பிராணிகளை வளர்ப்பதற்கும், அவற்றின் மூலம் வேலை வாங்கிக்கொள்வதற்கும் மார்க்கத்தில் அனுமதி உண்டு. ஆயினும், அவ்வாறு பயன்படுத்தப்படும் உயிரினங்களைப் பட்டினி போடுவது கடுமையான குற்றமாகும். ஒருமுறை நபி (ஸல்) அவர்கள் வயிறு ஒட்டி, விலா எலும்புகள் வெளியே தெரியும் அளவுக்குப் பட்டினியால் மெலிந்திருந்த ஓர் ஒட்டகத்தைக் கண்டார்கள். அதன் உரிமையாளர் யார் என்று விசாரித்தபோது, ஓர் அன்சாரித் தோழர் வந்து அது தமக்குரியது என்றார். அப்போது நபி (ஸல்) அவர்கள், தம் கட்டுப்பாட்டில் ஒப்படைக்கப்பட்டுள்ள அந்த வாயில்லா ஜீவனின் விஷயத்தில் அல்லாஹ்வை அஞ்ச வேண்டாமா என்று அவரிடம் கேட்டு, அதனைப் பட்டினி போட்டு வதைத்ததற்காக அவரைக் கண்டித்தார்கள்.

أَفَلَا تَتَّقِي اللَّهَ فِي هٰذِهِ الْبَهِيمَةِ الَّتِي مَلَّكَكَ اللَّهُ إِيَّاهَا
அல்லாஹ் உனக்குக் கைவசப்படுத்தித் தந்திருக்கும் இந்த வாயில்லா ஜீவனின் விஷயத்தில் நீ அல்லாஹ்வை அஞ்ச மாட்டாயா?
அபூதாவூத்

பிராணிகளை அடக்கி ஆளும் பலத்தை அல்லாஹ் மனிதனுக்கு வழங்கியிருக்கிறான். அந்த அருளை உணர்ந்து, அவற்றுக்கு உரிய நேரத்தில் உணவளித்துப் பராமரிக்கும் வசதியும் சக்தியும் உள்ளவர்கள் மட்டுமே அவற்றை வளர்க்க வேண்டும். உணவளிக்க இயலாதவர்கள் அவற்றை விற்றுவிட வேண்டுமே தவிர, பட்டினி போட்டுப் பாவம் செய்யக்கூடாது.

மற்றொரு முறை, ஒட்டி உலர்ந்த வயிற்றுடன் இருந்த ஓர் ஒட்டகத்தின் மீது ஒருவர் சவாரி செய்து செல்வதைக் கண்ட நபி (ஸல்) அவர்கள், வாய் பேச முடியாத அந்த உயிரினங்களின் விஷயத்தில் அல்லாஹ்வை அஞ்சிக்கொள்ளுமாறு எச்சரித்தார்கள்.

اتَّقُوا اللَّهَ فِي هٰذِهِ الْبَهَائِمِ الْمُعْجَمَةِ فَارْكَبُوهَا صَالِحَةً وَكُلُوهَا صَالِحَةً
வாய் பேச முடியாத இந்த ஜீவன்கள் விஷயத்தில் அல்லாஹ்வை அஞ்சுங்கள்; அவை நல்ல நிலையில் இருக்கும்போது சவாரி செய்யுங்கள்; நல்ல நிலையில் இருக்கும்போது உண்ணுங்கள்.
அபூதாவூத்

மனிதர்களுக்குப் பசி ஏற்படுவதைப் போன்றே பிராணிகளுக்கும் பசி ஏற்படுகிறது. மனிதர்களைப் போன்று குறிப்பிட்ட வேளைகளில் மட்டுமே உண்ணாமல், தொடர்ந்து மேய்ந்து உண்ணும் இயல்புடைய பிராணிகளும் உண்டு. எனவே, நாம் வளர்க்கும் கால்நடைகளாக இருந்தாலும், சவாரிக்குரிய வாகனங்களாக இருந்தாலும், உணவுக்காகப் பயன்படுத்தும் பிராணிகளாக இருந்தாலும் அவற்றுக்குத் தேவையான உணவை உரிய நேரத்தில் வழங்கிப் பராமரிக்க வேண்டும். மனிதன் தன் தேவைக்காக ஓர் உயிரினத்தை அறுத்து உண்பதற்கு அனுமதி இருந்தாலும், வாழும் காலத்தில் அதனைச் சித்திரவதை செய்து பட்டினி போடுவதை இஸ்லாம் வன்மையாகத் தடுக்கிறது.