07) குழந்தைகளுக்கு நகை அணிவிப்பது

அடுத்ததாக, குழந்தைகளுக்கு நகை அணிவிப்பது குறித்த விஷயம். குறிப்பாக ஆண் குழந்தைகளுக்குச் சிறு வயதிலேயே தங்க நகைகளையும் மோதிரங்களையும் அணிவிக்கிறார்கள். சிறு குழந்தைகள் என்பதால் எந்தச் சட்டமும் பொருந்தாது என்ற எண்ணத்தில் இவ்வாறு செய்கிறார்கள். இதற்கு முன்னதாகத் தங்கம் அணிவது பற்றிய பொதுவான மார்க்கச் சட்டத்தைப் புரிந்து கொள்ள வேண்டும்.

நபி (ஸல்) அவர்கள் தங்க மோதிரம் அணிவதைத் தடுத்ததாக பராஉ பின் ஆஸிப் (ரழி) அவர்கள் குறிப்பிடுகிறார்கள்:

وَنَهَانَا عَنْ تَخَتُّمٍ بِالذَّهَبِ
தங்க மோதிரம் அணிவதை விட்டும் நபி (ஸல்) அவர்கள் எங்களைத் தடுத்தார்கள்.
(புகாரி: 5635) ➚

இங்கு “எங்களைத் தடுத்தார்கள்” என்பது ஒட்டுமொத்தச் சமுதாயத்தையுமா அல்லது ஆண்களை மட்டுமா என்பதைக் குறிக்கும் ஹதீஸ் சுனன் நஸயீயில் 5055-வது எண்ணில் சரியான அறிவிப்பாளர் தொடருடன் பதிவு செய்யப்பட்டுள்ளது.

நபி (ஸல்) அவர்கள் பட்டையும் தங்கத்தையும் தம் இரு கைகளிலும் ஏந்தி, இவ்விரண்டும் தம் சமுதாயத்து ஆண்களுக்கு விலக்கப்பட்டவை என்று குறிப்பிட்டார்கள்.

أَنَّ النَّبِيَّ صَلَّى اللَّهُ عَلَيْهِ وَسَلَّمَ أَخَذَ حَرِيرًا فَجَعَلَهُ فِي يَمِينِهِ وَأَخَذَ ذَهَبًا فَجَعَلَهُ فِي شِمَالِهِ
நபி (ஸல்) அவர்கள் பட்டை எடுத்துத் தம் வலது கையிலும், தங்கத்தை எடுத்துத் தம் இடது கையிலும் வைத்துக்கொண்டு, இவ்விரண்டும் தம் சமுதாயத்து ஆண்களுக்குத் தடுக்கப்பட்டவை என்று கூறினார்கள்.
(நஸயீ 5055)

எனவே ஆண்கள் தங்க மோதிரம், தங்கச் சங்கிலி, தங்கக் காப்பு, தங்கக் கடிகாரம் போன்ற எந்தவொரு தங்க நகையையும் அணிவது முற்றிலும் தடைசெய்யப்பட்டுள்ளது. தங்க முலாம் பூசப்பட்ட அல்லது தங்க நிறத்திலான கவரிங் நகைகள் உண்மையான தங்கம் அல்ல என்பதால் அவை இந்தத் தடையின் கீழ் வராது. அசல் தங்கத்தை ஆண்கள் பயன்படுத்துவதையே நபி (ஸல்) அவர்கள் தடுத்துள்ளார்கள்; பெண்களுக்கு அதை அணிவதற்கு அனுமதி உண்டு.

அதேபோன்று, மோதிரம் அணிவதிலும் நபி (ஸல்) அவர்கள் ஒரு ஒழுங்குமுறையைத் தடுத்துள்ளார்கள். ஆண்கள் அணியும் வெள்ளி மோதிரமாக இருந்தாலும் சரி, பெண்கள் அணியும் தங்க மோதிரமாக இருந்தாலும் சரி, ஆட்காட்டி விரலிலும் நடுவிரலிலும் மோதிரம் அணிவதை நபி (ஸல்) அவர்கள் தடுத்துள்ளார்கள்.

نَهَانِي رَسُولُ اللَّهِ صَلَّى اللَّهُ عَلَيْهِ وَسَلَّمَ أَنْ أَتَخَتَّمَ فِي إِصْبَعِيَ فِي إِصْبَعِي هَذِهِ أَوْ هَذِهِ فَأَوْمَأَ إِلَى الْوُسْطَى وَالَّتِي تَلِيهَا
நபி (ஸல்) அவர்கள் நடுவிரலையும் அதற்கு அடுத்த விரலையும் சுட்டிக்காட்டி, இவ்விரண்டிலும் மோதிரம் அணிவதை எனக்குத் தடுத்தார்கள்.
(முஸ்லிம்: 3911) ➚

ஆண்கள் எந்த விரலிலும் தங்க மோதிரம் அணியவே கூடாது; அவர்கள் விரும்பினால் எந்த வயதினரும் வெள்ளி மோதிரம் அணிந்துகொள்ளலாம். பெண்கள் தங்க மோதிரம் அணியலாம் என்றாலும், ஆண்கள் மற்றும் பெண்கள் ஆகிய இருசாராருமே இரு கைகளிலும் உள்ள நடுவிரலையும் ஆட்காட்டி விரலையும் தவிர்த்துக் கொள்ள வேண்டும். தற்பெருமைக்காகப் பிறருக்குக் காட்டிக்கொள்வதைத் தடுக்கும் வகையிலேயே நபி (ஸல்) அவர்கள் இவ்விரு விரல்களிலும் மோதிரம் அணிவதைத் தடுத்துள்ளார்கள்.

பெரியவர்களுக்கு இந்தச் சட்டம் தெளிவாக உள்ள நிலையில், பருவ வயதை அடையாத ஆண் குழந்தைகளுக்குத் தங்கச் சங்கிலி போன்ற நகைகளை அணிவிக்கலாமா என்ற கேள்வி எழுகிறது.

ஆண்கள் தங்கம் அணிவது முற்றாகத் தடுக்கப்பட்டுள்ளதுடன், மோதிரம் அணியும்போது நடுவிரலையும் ஆட்காட்டி விரலையும் தவிர்த்து மற்ற விரல்களிலேயே அணிய வேண்டும்.

சிறு குழந்தைகளுக்கு ஹலால், ஹராம் என்ற சட்டங்கள் கிடையாது என்று எண்ணிக்கொண்டு, சில ஊர்களில் ஆண்குழந்தைகளுக்குக் கத்னா (சுன்னத்) செய்யும்போதும் பிற நேரங்களிலும் தங்க நகைகளை அணிவிப்பதை வழக்கமாக வைத்திருக்கிறார்கள். மார்க்கச் சட்டம் தெரியாத காரணத்தால் பெரியவர்களுக்கும், குறிப்பாகத் திருமணத்தின்போது மாப்பிள்ளைக்கும் கூட தங்க நகைகளை அணிவிக்கிறார்கள். ஆனால், தங்க ஆபரணங்கள் பெண்களுக்கு மட்டுமே அனுமதிக்கப்பட்டுள்ளன; ஆண்களுக்கு அவை முற்றிலுமாகத் தடை செய்யப்பட்டுள்ளன.

மார்க்கத்தில் தடை செய்யப்பட்ட விஷயங்களைப் பொறுத்தவரை, சிறுவர்களாக இருந்தாலும் அவர்களை அத்தவறுகளில் இருந்து தடுத்துப் பழக்க வேண்டும் என்பதையே நபி (ஸல்) அவர்களின் வாழ்க்கை நமக்குக் காட்டுகிறது. நபி (ஸல்) அவர்களின் காலத்தில் ஜகாத்தாக வந்த பொருட்கள் மஸ்ஜிதுந் நபவீ பள்ளிவாசலில் குவிக்கப்பட்டிருந்தன. அப்போது அவர்களின் பேரக்குழந்தையான ஹஸன் (ரலி) அல்லது ஹுசைன் (ரலி) அதிலிருந்த ஒரு பேரீச்சம்பழத்தை எடுத்து வாயில் போட்டார்கள். அதைக்கண்ட நபி (ஸல்) அவர்கள் உடனே அதைத் துப்புமாறு கூறினார்கள். மற்றொரு அறிவிப்பில், குழந்தையின் வாயில் விரலை விட்டு அதை வெளியே எடுத்தார்கள். அத்தோடு நிற்காமல், ஜகாத் பொருட்களை நாம் உண்ணக்கூடாது என்பது உனக்குத் தெரியாதா என்றும் கேட்டார்கள்.

أَمَا عَلِمْتَ أَنَّا لا نَأْكُلُ الصَّدَقَةَ
ஸதகாப் பொருட்களை நாம் உண்ண மாட்டோம் என்பது உனக்குத் தெரியாதா?
(புகாரி: 1491) ➚

நபி (ஸல்) அவர்களின் குடும்பத்தாருக்கு ஜகாத் மற்றும் சதகா பொருட்கள் தடை செய்யப்பட்டுள்ளன. நபி (ஸல்) அவர்கள், அவர்களின் மனைவியர், பிள்ளைகள், பேரப்பிள்ளைகள் மற்றும் மறுமை நாள் வரை வரக்கூடிய அவர்களின் வழித்தோன்றல்கள் எவரும் அவற்றை உண்ணக்கூடாது. சிறு குழந்தைதானே என்று நபி (ஸல்) அவர்கள் அதை அலட்சியமாக விட்டுவிடவில்லை; குழந்தையையும் தடுத்தார்கள். எனவே, மார்க்கத்தில் தடை செய்யப்பட்டவற்றைச் சிறுவயதிலேயே குழந்தைகளுக்குச் சொல்லிக் கொடுத்துப் பழக்க வேண்டும். அப்போதுதான் விவரம் தெரிந்த பிறகும் அவர்களால் அவற்றைத் தவிர்த்துக் கொள்ள முடியும். எனவே, சிறுவர்களாக இருந்தாலும் ஆண் குழந்தைகளுக்குப் பெண் குழந்தைகளைப் போன்று தங்க ஆபரணங்களை அணிவித்து அழகுபடுத்துவதைத் தவிர்க்க வேண்டும்.

அதே நேரத்தில், தங்கத்தைத் தவிர்த்து பிற உலோகங்கள் அல்லது பொருட்களாலான ஆபரணங்களை ஆண்களும் ஆண் குழந்தைகளும் அணிந்து கொள்வதில் தவறில்லை. நபி (ஸல்) அவர்கள் தம் மகள் பாத்திமா (ரலி) அவர்களின் வீட்டிற்குப் பேரக்குழந்தையைப் பார்க்கச் சென்றார்கள். அப்போது பாத்திமா (ரலி) அவர்கள் குழந்தையைச் சுத்தப்படுத்தி, முத்து அல்லது பவளத்தினால் ஆன ஒரு மாலையைக் குழந்தையின் கழுத்தில் அணிவித்து அனுப்பி வைத்தார்கள். ஹுசைன் (ரலி) அவர்கள் அந்த மாலையை அணிந்து வந்தபோது, நபி (ஸல்) அவர்கள் அக்குழந்தையை வாரி அணைத்து முத்தமிட்டார்கள் என்று புகாரியில் 5854 மற்றும் 5884 ஆகிய எண்களில் பதிவாகியுள்ளது.

கழுத்தில் மாலை அணிந்திருந்ததற்காக நபி (ஸல்) அவர்கள் அதைக் கண்டிக்கவில்லை. ஏனெனில் அது தங்க மாலை அல்ல. ஆண்களுக்குத் தங்கம் மட்டுமே தடுக்கப்பட்டுள்ளது. எனவே, ஆண் குழந்தைகளுக்கோ பெரிய ஆண்களுக்கோ பிளாஸ்டிக், வெள்ளி அல்லது மணிகளாலான மாலைகளை அணிவிப்பது குற்றமாகாது.