04) குழந்தைக்கு பாலூட்டுவது

குழந்தை பிறந்த பிறகு நிறைவேற்ற வேண்டிய அடுத்த முக்கிய கடமை பாலூட்டுதலாகும். குழந்தைகளுக்குத் தாய்மார்கள் பாலூட்டுவதை மார்க்கம் கட்டாயக் கடமையாக வலியுறுத்துகிறது. விவாகரத்து ஏற்பட்ட நிலையிலும் கூட, பால்குடிக்கும் குழந்தை இருந்தால் அதற்குரிய பாலூட்டுதல் உரிமையை முழுமைப்படுத்த வேண்டும் என்றும், அதற்காக அந்தப் பெண்ணுக்குரிய உணவையும் உடையும் வழங்குவது தந்தையின் கடமை என்றும் குர்ஆன் கட்டளையிடுகிறது.

وَٱلْوَٰلِدَٰتُ يُرْضِعْنَ أَوْلَـٰدَهُنَّ حَوْلَيْنِ كَامِلَيْنِ لِمَنْ أَرَادَ أَن يُتِمَّ ٱلرَّضَاعَةَ وَعَلَى ٱلْمَوْلُودِ لَهُۥ رِزْقُهُنَّ وَكِسْوَتُهُنَّ
பாலூட்டுவதை முழுமைப்படுத்த விரும்புகிறவருக்குத் தாய்மார்கள் தம் குழந்தைகளுக்கு முழுமையாக இரண்டு ஆண்டுகள் பாலூட்ட வேண்டும்; அவர்களுக்கு உணவும் உடையும் அளிப்பது தந்தையின் கடமையாகும்.
(அல்குர்ஆன்: 2:233)➚

விவாகரத்து ஆகிவிட்ட காரணத்தினால் குழந்தைக்குப் பால் கொடுக்க மாட்டேன் என்று தாய் மறுக்க முடியாது. குழந்தை பிறந்ததிலிருந்து இரண்டு ஆண்டுகள் பாலூட்ட வேண்டும். விவாகரத்து நடக்கும்போது குழந்தைக்கு ஒரு வயது என்றால் மீதமுள்ள ஒரு வருடமும், மூன்று மாதங்கள் என்றால் மீதமுள்ள இருபத்தொரு மாதங்களும் தாய் பாலூட்ட வேண்டும். ஆனால், விவாகரத்தான பிறகு அவள் அதனை இலவசமாகச் செய்ய வேண்டியதில்லை. பாலூட்டும் காலத்தில் தாய்க்கான உணவையும் உடையும் தந்தை வழங்க வேண்டும்; அத்துடன் பாலூட்டுவதற்கான கட்டணத்தையும் அவர் தர வேண்டும்.

இக்கட்டணத்தை நிர்ணயிப்பதில் மார்க்கம் எந்தச் சிரமத்தையும் தருவதில்லை. لَا تُكَلَّفُ نَفْسٌ إِلَّا وُسْعَهَا (எந்த ஆத்மாவும் அதன் சக்திக்குட்பட்டே தவிர சிரமப்படுத்தப்படாது) என்பதே இறைவனின் விதி. குழந்தையின் காரணமாகத் தாயோ لَا تُضَارَّ وَالِدَةٌ بِوَلَدِهَا (ஒரு தாய் தன் குழந்தையின் காரணமாகத் துன்புறுத்தப்படக் கூடாது), தந்தையோ وَلَا مَوْلُودٌ لَّهُ بِوَلَدِهِ (தந்தையும் தன் குழந்தையின் காரணமாகச் சிரமப்படுத்தப்படக் கூடாது) சிரமத்திற்குள்ளாக்கப்படக் கூடாது. எனவே, இருவரின் பொருளாதார வசதியையும் சக்தியையும் கருத்தில் கொண்டு ஜமாஅத் பொறுப்பாளர்கள் பேசி, நேர்மையான முறையில் ஒரு தொகையைத் தீர்மானித்து வழங்க வேண்டும்.

விவாகரத்துக்குப் பிறகு, தான் ஏன் பாலூட்ட வேண்டும் என்று தாயோ, அல்லது விவாகரத்தான பெண்ணிடம் தன் குழந்தைக்குப் பால் கொடுக்கக் கூடாது என்று தந்தையோ மறுத்தால், இருவரும் ஒரு முடிவுக்கு வந்து மற்றொரு பெண் மூலம் பாலூட்டிக் கொள்ளலாம் என்று அல்லாஹ் கூறுகிறான்.

وَإِنْ أَرَدتُّمْ أَن تَسْتَرْضِعُوٓا۟ أَوْلَـٰدَكُمْ فَلَا جُنَاحَ عَلَيْكُمْ إِذَا سَلَّمْتُم مَّآ ءَاتَيْتُم بِٱلْمَعْرُوفِ
நீங்கள் உங்கள் குழந்தைகளுக்கு (செவிலித் தாயைக் கொண்டு) பாலூட்ட நாடினால், முறைப்படி கொடுக்க வேண்டியதை வழங்கிவிட்டால் உங்கள் மீது குற்றமில்லை.
(அல்குர்ஆன்: 2:233)➚

விவாகரத்து ஏற்பட்டு தாய் பாலூட்ட மறுத்தாலும்கூட, فَسَتُرْضِعُ لَهُ أُخْرَىٰ (இன்னொரு பெண் அவனுக்குப் பாலூட்டட்டும்) என்றுதான் அல்லாஹ் கூறுகிறானே தவிர, புட்டிப்பாலையோ அல்லது அக்காலத்தில் தாராளமாகக் கிடைத்த ஆட்டுப்பால், மாட்டுப்பால், ஒட்டகப்பால் போன்ற விலங்கினங்களின் பாலையோ புகட்டுமாறு கூறவில்லை. கூலி கொடுத்தாவது வேறொரு பெண் மூலம் தாய்ப்பாலையே ஊட்ட வேண்டும் என்று வலியுறுத்துகிறது. ஏனெனில், குழந்தையைப் படைத்த இறைவனுக்கு மட்டுமே அதன் வளர்ச்சி, ஆரோக்கியம் மற்றும் நோய் எதிர்ப்பு சக்திக்குத் தாய்ப்பாலே ஆதாரம் என்பது தெரியும்.

இயல்பான குடும்ப வாழ்க்கையில் தாய்மைப் பாசத்தின் காரணமாகப் பாலூட்டுவது தடையின்றி நடந்துவிடும். ஆனால் விவாகரத்தின்போது குழந்தையைப் பகடைக்காயாகப் பயன்படுத்தி ஒருவரை ஒருவர் பழிவாங்கவோ மிரட்டவோ முற்படுவார்கள். குழந்தையின் நலன் பாதிக்கப்பட்டுவிடக் கூடாது என்பதற்காகவே, பிரிந்தாலும் கூட இரண்டு ஆண்டுகள் தாய்ப்பால் ஊட்டுவது கட்டாயம் என்று அல்லாஹ் சட்டமாக்குகிறான். தாய்க்கு நோய் அல்லது பால் சுரக்காத நிலை போன்ற இயலாமை இருந்தால் மட்டுமே செவிலித்தாயைப் பயன்படுத்தலாம். ஆனால் உடல் அழகு குறைந்துவிடும் என்ற காரணத்திற்காகப் பாலூட்டுவதைத் தவிர்ப்பது தவறானது. தாய்ப்பால் கொடுக்காமல் தேங்க விடுவது பெண்களுக்கு மார்பகப் புற்றுநோய் உள்ளிட்ட பல்வேறு நோய்களுக்கு அடித்தளமாக அமைகிறது என்பதையும், பாலூட்டுவது தாயின் கருப்பை சார்ந்த பல பிரச்சினைகளுக்கு நிவாரணமாக அமைகிறது என்பதையும் இன்றைய மருத்துவ அறிவியலும் உறுதிப்படுத்துகிறது.

குழந்தைக்குத் தாய்ப்பால் கொடுக்கும் கால அளவு முழுமையாக இரண்டு ஆண்டுகள் மட்டுமே; மூன்று, நான்கு ஆண்டுகள் என்று நீட்டிக்கக் கூடாது. ஆனால் திருக்குர்ஆனின் மற்றொரு வசனத்தில் இவ்வளவைவிடக் குறைவாக வருவது போன்று தோன்றும்.

وَوَصَّيْنَا ٱلْإِنسَـٰنَ بِوَٰلِدَيْهِ إِحْسَـٰنًا حَمَلَتْهُ أُمُّهُۥ كُرْهًا وَوَضَعَتْهُ كُرْهًا وَحَمْلُهُۥ وَفِصَـٰلُهُۥ ثَلَـٰثُونَ شَهْرًا
மனிதனுக்குத் தன் பெற்றோருக்கு நன்மை செய்யுமாறு நாம் வலியுறுத்தினோம்; அவனுடைய தாய் அவனைச் சிரமத்துடனேயே சுமந்தாள், சிரமத்துடனேயே அவனைப் பெற்றெடுத்தாள்; அவனைச் சுமப்பதும் அவனுக்குப் பால்குடி மறக்கடிப்பதும் முப்பது மாதங்களாகும்.
(அல்குர்ஆன்: 46:15)➚

தாயின் கருவறையில் குழந்தை இருப்பது சுமார் பத்து மாதங்கள் என்றால், முப்பது மாதங்களில் அதைக் கழித்தால் பாலூட்டும் காலம் இருபது மாதங்கள் என்றல்லவா வரும் என்ற சந்தேகம் எழலாம். ஆனால் மற்றொரு வசனத்தில் حَوْلَيْنِ كَامِلَيْنِ (முழுமையான இரண்டு ஆண்டுகள்), அதாவது 24 மாதங்கள் என்று அல்லாஹ் திட்டவட்டமாகக் குறிப்பிடுகிறான். அல்லாஹ்வின் வார்த்தைகளில் எந்த முரண்பாடும் இருக்க முடியாது. பாலூட்டும் காலம் 24 மாதங்கள் என்பதில் ஐயமில்லை என்றால், முப்பது மாதங்களில் அதைக் கழித்த பிறகு மீதமிருப்பது ஆறு மாதங்கள் மட்டுமே.

கருவுற்ற பெண் சுமப்பது மனிதனை என்று அல்லாஹ் குறிப்பிடுகிறான். தாயின் வயிற்றில் கரு உருவாகி வெளிவரப் பத்து மாதங்கள் ஆனாலும், அது மனிதன் என்ற நிலையை அடைவதற்கு மூன்றரை முதல் நான்கு மாதங்கள் தேவைப்படுகின்றன. அதற்கு முன் மற்ற உயிரினங்களின் கருவைப் போன்றே அதுவும் ஒரு சதைப்பிண்டமாகத்தான் வளர்கிறது; மனிதன் என்று கூறுவதற்குரிய எந்த அடையாளமும் அதில் தோன்றுவதில்லை. நான்கு மாதங்களுக்குப் பிறகே இறைவன் அதனை மனித வடிவாக மாற்றுகிறான். எனவே, கருவறையில் மனிதனாக இருக்கும் காலம் ஆறு மாதங்கள்தான். ஆரம்பத்தில் இந்திரியத் துளியாகவும், கருவுற்ற சினைமுட்டையாகவும், சதைக்கட்டியாகவும் இருக்கும் நிலையைக் கடந்து பிறகே மனிதப் படைப்பாக மாற்றம் பெறுகிறது.

فَخَلَقْنَا ٱلْعَلَقَةَ مُضْغَةً فَخَلَقْنَا ٱلْمُضْغَةَ عِظَـٰمًا فَكَسَوْنَا ٱلْعِظَـٰمَ لَحْمًا ثُمَّ أَنشَأْنَـٰهُ خَلْقًا ءَاخَرَ
பின்னர் அந்த அலாக்காவை ஒரு சதைத்துண்டாகப் படைத்தோம்; பின்னர் அந்தச் சதைத்துண்டை எலும்புகளாகப் படைத்தோம்; பின்னர் அந்த எலும்புகளுக்கு மாமிசத்தை அணிவித்தோம்; பின்னர் அதனை வேறொரு படைப்பாக உருவாக்கினோம்.
(அல்குர்ஆன்: 23:14)➚

கருப்பையில் ஆரம்ப நிலையில் இருப்பது வெறும் சதைக்கட்டி மட்டுமே. அது மனிதனாக இருந்தாலும் விலங்காக இருந்தாலும் அந்த ஆரம்பக் கட்டத்தில் சதைக்கட்டியைத் தவிர வேறெந்த அமைப்பும் இருப்பதில்லை. அதனை வேறொரு படைப்பாக மாற்றும் நிலைக்கு நான்கு மாதங்கள் ஆகின்றன. படைத்த அல்லாஹ்வுக்கு எப்போது அது மனிதனாக மாறுகிறது என்பது முழுமையாகத் தெரியும் என்பதால், குர்ஆனில் கருவைச் சுமப்பது என்று குறிப்பிடாமல், மனிதனைச் சுமப்பது என்ற வார்த்தையைப் பயன்படுத்துகிறான்.

இவ்வசனத்தின் மூலம், ஒரு குழந்தைக்கு இரண்டு ஆண்டுகள் பாலூட்ட வேண்டும் என்பது தெளிவாகிறது. மேலும், அந்த இரண்டு ஆண்டுகளுக்குள் பாலூட்டினால் மட்டுமே இஸ்லாத்தில் பாலூட்டுதல் சார்ந்த சட்டமும் உறவுமுறையும் ஏற்படும். பெற்றெடுத்த தாய் எவ்வாறு தாய் என்ற அந்தஸ்தைப் பெறுகிறாளோ, அதேபோன்று வேறொரு பெண் அக்குழந்தைக்குப் பாலூட்டும்போதும் அவள் செவிலித் தாயாக அதே தாய்மை அந்தஸ்தைப் பெறுகிறாள்.

குழந்தைகளுக்கு இரண்டு ஆண்டுகள் வரை பாலூட்டுவதே மார்க்கத்தின் வழிகாட்டலாகும்; அக்காலகட்டத்தில் வேறொரு பெண் பாலூட்டினாலும் அவளும் பெற்ற தாயைப் போன்றே இஸ்லாமியச் சட்டப்படி தாய் என்ற அந்தஸ்தைப் பெறுகிறார்.

இஸ்லாமிய சட்டப்படி, ஓர் அந்நியக் குழந்தைக்கு ஓர் அந்நியப் பெண் பாலூட்டிவிட்டால், அவள் அக்குழந்தைக்குத் தாய் என்ற அந்தஸ்தைப் பெற்றுவிடுகிறாள். தாய் என்ற அந்தஸ்து சொத்துரிமைக்கானது அல்ல; தாய்-பிள்ளைக்கு மத்தியில் இதனால் வாரிசுரிமை ஏற்படாது. மாறாக, திருமணத் தடை சார்ந்த உறவுகளில்தான் இச்சட்டம் நடைமுறைக்கு வருகிறது. பாலூட்டிய தாயை அப்பிள்ளை திருமணம் செய்ய முடியாது. அவள் விதவையானாலும் சரியே. மேலும், பாலூட்டிய காரணத்தினால் அப்பெண்ணின் மூலமாக உருவாகும் அனைத்து உறவுகளும் இவனுக்கும் உரித்தாகிவிடும். உதாரணத்திற்கு, ஒரு பெண் ஒரு குழந்தைக்குப் பாலூட்டினால், அப்பெண்ணின் மகள் இவனுக்குப் பால்குடிச் சகோதரியாகிவிடுவாள். அவளைத் திருமணம் செய்யக் கூடாது. அதேபோன்று, பாலூட்டிய தாயின் சகோதரி இவனுக்குச் சிற்றன்னை அல்லது பெரியன்னை என்ற உறவுமுறையாகி விடுவதால், அவளையும் திருமணம் செய்ய முடியாது. இவ்வாறு இரத்த சம்பந்தத்தினால் எந்தெந்த உறவுகள் திருமணத்திற்கு விலக்கப்பட்டுள்ளனவோ, அந்த உறவுகள் அனைத்தும் பாலூட்டிய தாயின் மூலமாகவும் விலக்கப்பட்டதாக ஆகிவிடும். இந்தச் சட்டம் திருக்குர்ஆனிலும் நபிமொழிகளிலும் தெளிவாகக் கூறப்பட்டுள்ளது.

حُرِّمَتْ عَلَيْكُمْ أُمَّهَـٰتُكُمْ وَبَنَاتُكُمْ وَأَخَوَٰتُكُمْ وَعَمَّـٰتُكُمْ وَخَـٰلَـٰتُكُمْ وَبَنَاتُ ٱلْأَخِ وَبَنَاتُ ٱلْأُخْتِ وَأُمَّهَـٰتُكُمُ ٱلَّـٰتِىٓ أَرْضَعْنَكُمْ وَأَخَوَٰتُكُم مِّنَ ٱلرَّضَـٰعَةِ
உங்களுக்கு உங்களுடைய தாய்மார்களும், மகள்களும், சகோதரிகளும், தந்தையுடன் பிறந்த சகோதரிகளும், தாயுடன் பிறந்த சகோதரிகளும், சகோதரனின் மகள்களும், சகோதரியின் மகள்களும், உங்களுக்குப் பாலூட்டிய அன்னையரும், உங்கள் பால்குடிச் சகோதரிகளும் (திருமணம் செய்ய) விலக்கப்பட்டுள்ளனர்.
(அல்குர்ஆன்: 4:23)➚

இரத்த சம்பந்தத்தின் மூலம் தடை செய்யப்படும் உறவுகள் அனைத்தும் பால்குடி உறவின் மூலமும் தடை செய்யப்படும் என்று நபி (ஸல்) அவர்கள் கூறியுள்ளார்கள்.

يَحْرُمُ مِنَ الرَّضَاعِ مَا يَحْرُمُ مِنَ النَّسَبِ
இரத்த சம்பந்தத்தின் மூலம் எவையெல்லாம் விலக்கப்படுகின்றனவோ, அவை பால்குடி சம்பந்தத்தின் மூலமும் விலக்கப்படுகின்றன.
(புகாரி: 2645) ➚

எனவே, பாலூட்டுதல் என்ற சட்டத்தை விளங்கிக்கொள்வதில் மிகக் கவனமாக இருக்க வேண்டும். உதாரணமாக, ஒரு தாய்மாமாவின் மனைவி தனது கணவரின் தங்கை குழந்தைக்குப் பாலூட்டிவிட்டால், எதிர்காலத்தில் தனது மகளை அக்குழந்தைக்குத் திருமணம் செய்து வைக்கத் திட்டமிட்டிருந்தால் அந்தத் திட்டம் பாதிக்கப்படும். ஏனெனில் அவர்கள் பால்குடிச் சகோதர, சகோதரிகளாக ஆகிவிடுவார்கள். எனவே, பாலூட்டுவதன் மூலம் தாய் மற்றும் சகோதரத்துவ உறவு உண்டாகும் என்பதை உணர்ந்துதான் செயல்பட வேண்டும்.

அதே வேளையில், ஒரு பெண் ஒரு குழந்தைக்குப் பாலூட்டிய உடனேயே அவள் தாய் என்ற நிலைக்கு வந்துவிட மாட்டாள். இதற்கு மார்க்கத்தில் சில விதிமுறைகள் உள்ளன. ஆயிஷா (ரலி) அவர்களிடம் ஒரு மனிதர் இருந்தபோது, அவர் யார் என்று நபி (ஸல்) அவர்கள் கேட்டார்கள். அதற்கு ஆயிஷா (ரலி) அவர்கள், “இவர் என் பால்குடிச் சகோதரர்; இவருக்கு என் தாயார் பாலூட்டியுள்ளார்” என்று கூறினார்கள். அப்போது நபி (ஸல்) அவர்கள், பால் கொடுப்பது என்பது பசியைத் தீர்ப்பதற்காக இருக்க வேண்டும் என்று கூறினார்கள்.

اُنْظُرْنَ مَنْ إِخْوَانُكُنَّ فَإِنَّمَا الرَّضَاعَةُ مِنَ الْمَجَاعَةِ
உங்கள் சகோதரர்கள் யார் என்பதில் கவனமாக இருங்கள்; பசியைத் தீர்ப்பதற்காகப் பாலூட்டப்படுவதே பால்குடி உறவை ஏற்படுத்தும்.
(புகாரி: 3647, 5102) ➚

மேலும், ஒரு குழந்தை ஒருமுறை அல்லது இருமுறை பாலருந்துவதனால் தாய் என்ற உறவு ஏற்பட்டுவிடாது என்றும் நபி (ஸல்) அவர்கள் தெளிவுபடுத்தியுள்ளார்கள்.

لَا تُحَرِّمُ الْمَصَّةُ وَالْمَصَّتَانِ
ஒருமுறை அல்லது இருமுறை உறிஞ்சுவது (பால்குடி உறவை ஏற்படுத்தித் திருமணத்தை) விலக்கப்பட்டதாக ஆக்காது.
(முஸ்லிம்: 2628) ➚

لَا تُحَرِّمُ الْإِمْلَاجَةُ وَالْإِمْلَاجَتَانِ
ஒருமுறை அல்லது இருமுறை பால்குடிப்பது (பால்குடி உறவை ஏற்படுத்தித் திருமணத்தை) விலக்கப்பட்டதாக ஆக்காது.
(முஸ்லிம்: 2629) ➚

குழந்தை அழுகிறது என்பதற்காக ஒன்று அல்லது இரண்டு முறை பால் கொடுப்பதனால் தாய்-பிள்ளை என்ற உறவு ஏற்படாது. குறைந்தபட்சம் ஐந்து வேளைகள் பாலூட்டினால் மட்டுமே தாய் என்ற உறவு ஏற்படும்.

خَمْسُ رَضَعَاتٍ يُحَرِّمْنَ
ஐந்து முறை பாலூட்டுவதே (திருமணத்தை) விலக்கப்பட்டதாக்கும்.
(முஸ்லிம்: 2631) ➚

அடுத்ததாக, உண்மையில் பால் சுரந்து, அக்குழந்தை அதனை அருந்த வேண்டும். பாலே சுரக்காத ஒரு பெண், குழந்தையின் அழுகையை நிறுத்துவதற்காக நூறு தடவை தன் மார்பகத்தை வாயில் வைத்தாலும் அது பால்குடி உறவாகக் கருதப்படாது. குழந்தையின் பசியைத் தீர்க்கும் விதமாகப் பால் சென்று சேர வேண்டும்.

மேலும், அந்தப் பால் தாயின் மார்பகத்திலிருந்து நேரடியாக அருந்தப்பட்டு வயிற்றை நிறைக்க வேண்டும். அவ்வாறு மார்பகத்திலிருந்து நேரடியாக அருந்தினால் மட்டுமே தாய்-பிள்ளை என்ற உறவு ஏற்படும் என்பதை நபி (ஸல்) அவர்கள் தெளிவுபடுத்தியுள்ளார்கள்.

إِلَّا مَا فَتَقَ الْأَمْعَاءَ فِي الثَّدْيِ
மார்பகத்திலிருந்து அருந்தி, குடல்களை நிரப்பியதைத் தவிர மற்றவை (திருமணத்தை) விலக்கப்பட்டதாக ஆக்காது.
(திர்மிதி: 1152)

அடுத்த முக்கிய நிபந்தனை, இந்தப் பாலூட்டுதல் குழந்தையின் இரண்டு வயதிற்குள் நிகழ்ந்திருக்க வேண்டும். குழந்தை இரண்டு வயதைக் கடந்த பிறகு, மூன்று வயதிலோ அல்லது ஐந்து வயதிலோ ஓர் அந்நியப் பெண் அப்பாலகனுக்குப் பாலூட்டினால் தாய்-பிள்ளை என்ற உறவு ஏற்படாது. பால்குடி உறவு ஏற்படுவதற்குரிய பருவ வரம்பு இரண்டு ஆண்டுகள் மட்டுமே ஆகும்.

குழந்தைக்குப் பாலூட்டுதல் என்பது, குழந்தை பால்குடி மறப்பதற்கு முன்பாகவே நிகழ வேண்டும் என்று நபி (ஸல்) அவர்கள் கூறியுள்ளார்கள்.

وَكَانَ قَبْلَ الْفِطَامِ
அது பால்குடி மறக்கடிக்கப்படுவதற்கு முன்பாக இருக்க வேண்டும்.
(திர்மிதி: 1072)

பால்குடி தொடர்பான இந்த மார்க்கச் சட்டத்தை நாம் தெளிவாக விளங்கிக்கொள்ள வேண்டும். குழந்தையின் அழுகையை நிறுத்துவதற்காக ஒன்று அல்லது இரண்டு முறை தாய்ப்பால் கொடுத்தால் தாய்-பிள்ளை என்ற உறவு ஏற்படாது. பாலே சுரக்காதவர்கள் குழந்தையின் அழுகையை நிறுத்துவதற்காகப் பாலூட்டுவது போன்று பாவனை காட்டினாலும் அதன்மூலம் பால்குடி உறவு உருவாகாது. இரண்டு வயது பால்குடிப் பருவத்தைக் கடந்த பின்னர் நூறு முறை பால் கொடுத்தாலும் தாய்-பிள்ளை உறவு ஏற்படாது. அதேபோன்று, பாலைக் கறந்து சங்கில் வைத்து ஊட்டிவிட்டாலும் தாய்-பிள்ளை உறவு ஏற்படாது. மாறாக, இரண்டு வயதிற்கு உட்பட்ட குழந்தைக்கு வயிறு நிறையும் அளவிற்கு ஐந்து முறை நேரடியாகப் பாலூட்டினால் மட்டுமே தாய்-பிள்ளை என்ற உறவு மார்க்க ரீதியாக ஏற்படும். பலரும் இந்தச் சட்டத்தை மேலோட்டமாகப் புரிந்து கொண்டு, சம்பிரதாயத்திற்கு வாயில் வைத்ததற்கெல்லாம் பால்குடி உறவு ஏற்பட்டுவிட்டதாகத் தவறாகக் கருதுகின்றனர்.

அடுத்ததாக, இருவருக்குத் திருமணம் நிச்சயிக்கப்பட்ட பிறகு, ஒரு பெண்மணி வந்து அவ்விருவருக்கும் தாமே பாலூட்டியதாகக் கூறிப் பிரச்சினை எழலாம். ஒரே பெண்ணிடத்தில் வெவ்வேறு காலகட்டங்களில் ஓர் ஆண் குழந்தையும் ஒரு பெண் குழந்தையும் பால் குடித்திருந்தாலும் அவர்கள் இருவரும் சகோதர சகோதரிகளாக ஆகிவிடுவர். அப்படிப்பட்ட சூழலில், பால் கொடுத்த பெண்மணியின் கூற்றே முடிவாக ஏற்றுக்கொள்ளப்படும். அவர் கூறுவது பொய் என்பதை நிரூபிக்கும் தகுந்த ஆதாரம் நம்மிடம் இல்லை என்றால், அவரது கூற்றை ஏற்றுக்கொண்டுதான் ஆக வேண்டும்.

இதற்கு ஆதாரமாக நபி (ஸல்) அவர்கள் காலத்தில் நிகழ்ந்த ஒரு சம்பவத்தைக் குறிப்பிடலாம். உக்பா என்பவர் ஒரு பெண்ணைத் திருமணம் செய்துகொண்டார். திருமணம் முடிந்தவுடன் ஒரு பெண்மணி வந்து, அவ்விருவருக்குமே தாம் பாலூட்டியிருப்பதாகக் கூறினார். உக்பா அவரிடம், “நீர் எனக்குப் பாலூட்டியது எனக்குத் தெரியாது; இதற்கு முன்பும் நீர் என்னிடம் இதைக் கூறவில்லை” என்று கூறிவிட்டு, பின்னர் தெளிவு பெறுவதற்காக மதீனாவிற்கு நபி (ஸல்) அவர்களிடம் வந்தார். நபி (ஸல்) அவர்களிடம் விஷயத்தைக் கூறி, “இப்போது நாங்கள் என்ன செய்வது?” என்று கேட்டார். அதற்கு நபி (ஸல்) அவர்கள், “அவ்வாறு கூறப்பட்டுவிட்ட பிறகு எவ்வாறு நீங்கள் சேர்ந்து வாழ முடியும்?” என்று கேட்டார்கள். உடனே உக்பா அப்பெண்ணைப் பிரிந்துவிட்டார்; அப்பெண்ணும் வேறொருவரைத் திருமணம் செய்துகொண்டாள்.

كَيْفَ وَقَدْ قِيلَ فَفَارَقَهَا عُقْبَةُ وَنَكَحَتْ زَوْجًا غَيْرَهُ
அவ்வாறு கூறப்பட்டுவிட்ட பின் எவ்வாறு சேர்ந்து வாழ முடியும்? உடனே உக்பா அப்பெண்ணைப் பிரிந்துவிட்டார்; அவளும் வேறொரு கணவரை மணந்துகொண்டாள்.
(புகாரி: 88) ➚

அன்றைய அரபுச் சூழலில், குறிப்பாக மக்காவில், குழந்தைகளைப் பாலூட்டுவதற்காக கிராமப்புறச் செவிலித்தாய்களிடம் அனுப்பி வைக்கும் வழக்கம் பரவலாக இருந்தது. நபி (ஸல்) அவர்களுக்கும் அவ்வாறே பாலூட்டப்பட்டது. எனவே, ஒரு பெண்மணி அவ்வாறு கூறும்போது அதை எளிதாக மறுக்க முடியாது. ஆனால் இன்று ஒரு பெண்மணி வந்து அவ்வாறு கூறினால் உடனே ஏற்க வேண்டிய அவசியமில்லை; தங்கள் குடும்பத்தில் செவிலித்தாயிடம் கொடுக்கும் வழக்கமே இல்லை என்ற சான்றுகள் இருந்தால் அதை மறுக்கலாம். எனினும், அப்பெண் கூறுவது பொய் என்று நிரூபிக்க நம்மிடம் எவ்விதச் சான்றும் இல்லை என்றால், அவரது சாட்சியத்தை ஏற்றுக்கொண்டு அவர்களைப் பிரித்துவிட வேண்டும்.

எனவே, மார்க்க வரம்பிற்குட்பட்டு இரண்டு வயதுக்குட்பட்ட குழந்தைக்கு வயிறார ஐந்து முறை பாலூட்ட நேரிட்டால், அந்தத் தகவலைத் தங்களுக்குத் தெரிந்த வட்டாரத்தில் பரப்பி ஆவணப்படுத்தி வைக்க வேண்டும். ஏனெனில் பாலூட்டுவதற்கும் திருமணத்திற்கும் இடையே இருபது அல்லது இருபத்தைந்து ஆண்டுகள் இடைவெளி ஏற்படுவதால் காலப்போக்கில் மக்கள் அதை மறந்துவிடுவர். முன்னரே பலரிடம் சொல்லி வைத்திருந்தால், பிற்காலத்தில் தவறான உறவுமுறை திருமணங்கள் நடப்பதைத் தடுத்து ஹராமான காரியம் நிகழாமல் காத்துக் கொள்ள முடியும்.