04) அகீகா கொடுப்பது

பெயர் சூட்டுவதற்கு என்று எவ்விதச் சடங்குகளும் கிடையாது; குழந்தையைக் கூப்பிடுவதற்கு ஒரு நல்ல பெயரைத் தேர்ந்தெடுத்து அழைக்க வேண்டியதுதான். குழந்தை பிறந்த முதல் நாளிலிருந்தே பெயர் சூட்டலாம்; ஏழாம் நாளைத் தாண்ட விடக் கூடாது. பெயர் சூட்டிய பிறகு, குழந்தைக்குச் செய்ய வேண்டிய அடுத்த கடமை அகீகா கொடுப்பதாகும்.

குழந்தை பிறந்ததற்காக ஓர் ஆட்டை அறுத்து, அதன் இறைச்சியைச் சமைத்தோ பச்சையாகவோ ஏழைகளுக்கும் உறவினர்களுக்கும் வழங்கி, தாமும் உண்டு அந்த மகிழ்ச்சியை வெளிப்படுத்துவதற்கு அகீகா என்று பெயர். மார்க்கத்தில் இதற்கு அனுமதியும் வழிகாட்டலும் உண்டு. குழந்தைக்காக அகீகா கொடுக்க வேண்டும் என்று நபி (ஸல்) அவர்கள் கூறியுள்ளார்கள்.

مَعَ الْغُلاَمِ عَقِيقَةٌ فَأَهْرِيقُوا عَنْهُ دَمًا
ஒவ்வொரு குழந்தையுடனும் அகீகா இருக்கிறது; எனவே அக்குழந்தையின் சார்பாக இரத்தத்தை ஓட்டுங்கள்.
(புகாரி: 5471) ➚

நபி (ஸல்) அவர்கள் இவ்வாறு கூறியிருந்தாலும், அது ஐவேளைத் தொழுகை அல்லது ரமலான் நோன்பு போன்ற கட்டாயக் கடமை அல்ல. ஏனெனில், விரும்பினால் அறுக்கலாம் என்று மற்றொரு நபிமொழியில் கூறப்பட்டுள்ளது.

مَنْ وُلِدَ لَهُ وَلَدٌ فَأَحَبَّ أَنْ يَنْسُكَ عَنْهُ فَلْيَنْسُكْ عَنِ الْغُلاَمِ شَاتَانِ
யாருக்கேனும் ஒரு குழந்தை பிறந்து, அவர் அக்குழந்தையின் சார்பாக பலியிட விரும்பினால், ஆண் குழந்தைக்காக இரண்டு ஆடுகளை பலியிடட்டும்.
(அபூதாவூத்: 2842) ➚

கடமையான காரியங்களுக்கு நபி (ஸல்) அவர்கள் “விரும்பினால் செய்யுங்கள்” என்று கூற மாட்டார்கள். எனவே, அகீகா என்பது கட்டாயக் கடமை அல்ல; ஆண் குழந்தை பிறந்தாலும் பெண் குழந்தை பிறந்தாலும் அந்த மகிழ்ச்சியை வெளிப்படுத்துவதற்காகச் செய்யப்படும் ஒரு சிறந்த நடைமுறையாகும். வசதி உள்ளவர்கள் செய்தால் நன்மையுண்டு, செய்யாவிட்டால் எந்தக் குற்றமும் இல்லை.

அகீகாவை எப்போது கொடுக்க வேண்டும் என்பதற்கு, ஏழாவது நாளில் அறுக்க வேண்டும் என்று நபி (ஸல்) அவர்கள் வழிகாட்டியுள்ளார்கள். குழந்தை பிறந்த உடனேயே ஆடு வாங்குவதற்கும் மருத்துவமனைச் செலவுகளுக்கும் மத்தியில் அதற்கான ஏற்பாடுகளைச் செய்ய முடியாது என்பதால், ஒரு வார கால அவகாசத்தை மார்க்கம் வழங்குகிறது.

يُذْبَحُ عَنْهُ يَوْمَ السَّابِعِ
ஏழாவது நாளில் குழந்தையின் சார்பாக அறுக்கப்பட வேண்டும்.
(திர்மிதி: 1522)

சில நூல்களில் ஏழாம் நாளில் முடியாவிட்டால் பதினான்காம் நாளோ, இருபத்தொன்றாம் நாளோ கொடுக்கலாம் என்ற செய்தி இடம்பெற்றுள்ளது.

تُذْبَحُ لِسَبْعٍ وَلِأَرْبَعَ عَشْرَةَ وَلِإِحْدَى وَعِشْرِينَ
ஏழாம் நாளிலோ, பதினான்காம் நாளிலோ, இருபத்தொன்றாம் நாளிலோ அறுக்கப்படலாம்.
(பைஹகீ: 19076)

இச்செய்தி பைஹகீ, தப்ரானியின் அல்முஃஜமுல் அவ்ஸத் மற்றும் அல்முஃஜமுஸ் ஸகீர் ஆகிய நூல்களில் வந்தாலும், இதன் அனைத்து அறிவிப்பாளர் தொடர்களிலும் மக்காவைச் சேர்ந்த இஸ்மாயீல் பின் முஸ்லிம் என்பவர் இடம்பெற்றுள்ளார். இவரைப் பற்றி யஹ்யா அல்-கத்தான் அவர்கள் குறிப்பிடும்போது, لَمْ يَزَلْ مُخْتَلِطًا (அவர் எப்போதும் குழப்பிக் கொண்டிருப்பவராகவே இருந்தார்) என்று விமர்சித்துள்ளார். மேலும் அவர் நினைவாற்றல் குறைவின் காரணமாக ஒரு செய்தியை ஆளுக்காள் மாற்றி அறிவிப்பவராக இருந்தார்.

كَانَ يُحَدِّثُنَا بِالْحَدِيثِ الْوَاحِدِ عَلَى ثَلَاثَةِ وُجُوهٍ
அவர் ஒரே ஹதீஸை எங்களுக்கு மூன்று விதமாக அறிவிப்பார்.

யஹ்யா பின் ஸயீத் மற்றும் அப்துர் ரஹ்மான் பின் மஹ்தீ ஆகிய இருவரும் لَا يُحَدِّثَانِ عَنْ إِسْمَاعِيلَ الْمَكِّيِّ (இஸ்மாயீல் அல்மக்கீ வழியாக எதையும் அறிவிக்க மாட்டார்கள்) என்று கூறப்பட்டுள்ளது. யஹ்யா பின் மயீன் அவர்கள் لَيْسَ بِشَيْءٍ (இவர் ஒரு பொருட்டே அல்ல) என்றும், அலீ இப்னுல் மதீனீ அவர்கள் لَا أَكْتُبُ حَدِيثَهُ (நான் இவரது ஹதீஸை எழுத மாட்டேன்) என்றும், அபூஹாதsourcesம் அர்-ராஸீ அவர்கள் ضَعِيفُ الْحَدِيثِ (இவர் பலவீனமான ஹதீஸ்களை அறிவிப்பவர்) என்றும் கூறியுள்ளனர். இவ்வாறு ஹதீஸ் கலை அறிஞர்கள் அனைவரும் இவரைப் பலவீனமானவர் என்று நிராகரித்துள்ளதால், பதினான்காம் நாளிலோ இருபத்தொன்றாம் நாளிலோ கொடுக்கலாம் என்ற செய்தி ஆதாரப்பூர்வமானது அல்ல. ஏழாவது நாளில் கொடுப்பதே ஆதாரப்பூர்வமான நடைமுறையாகும்.

அகீகா கொடுப்பதற்கு வசதி இருந்தால் ஏழாவது நாளில் கொடுக்க வேண்டும். அதற்காகக் கடன் வாங்கியோ, வட்டிக்கு வாங்கியோ, எதிர்காலச் செலவுகளுக்கு வழியில்லாத நிலையிலோ தமக்கு மீறிய சுமையை இழுத்துப் போட்டுக் கொள்ளக் கூடாது. எந்த ஓர் ஆத்மாவையும் அதன் சக்திக்கு மேல் அல்லாஹ் சிரமப்படுத்துவதில்லை. எனவே, பொருளாதார வசதி உள்ளவர்கள் மட்டுமே இதைச் செய்ய வேண்டும்.

அகீகாவைக் குழந்தையின் தந்தைதான் கொடுக்க வேண்டும் என்ற கட்டாயமும் இல்லை. தாய், தாய்வழிப் பாட்டனார், தாய்மாமா, பெரியப்பா அல்லது சித்தப்பா என உறவினர்களில் யார் வேண்டுமானாலும் கொடுக்கலாம். நபி (ஸல்) அவர்கள் தமது பேரன்களான ஹஸன், ஹுஸைன் ஆகியோருக்காகத் தாமே அகீகா கொடுத்தார்கள்; தந்தை அலீ அவர்கள் கொடுக்கவில்லை. மேலும் ஹதீஸிலும் يُذْبَحُ عَنْهُ (அவன் சார்பாக அறுக்கப்பட வேண்டும்) என்று செயப்பாட்டு வினையாகவே வந்துள்ளதே தவிர, தந்தைதான் கொடுக்க வேண்டும் என்று வரவில்லை. எனவே யார் கொடுத்தாலும் அந்த நன்மை கிடைத்துவிடும்.

அகீகாவுக்கு ஆண் குழந்தையாக இருந்தால் இரண்டு ஆடுகளும், பெண் குழந்தையாக இருந்தால் ஓர் ஆடும் கொடுக்க வேண்டும். இது ஆண் பெண் பாகுபாட்டிற்காக அல்லாமல், மனிதனின் சுமையை உளவியல் ரீதியாகக் கருத்தில் கொண்டு ஏற்படுத்தப்பட்டதாகும்.

பெண் குழந்தை பிறக்கும்போது சிலர் பொருளாதாரச் சுமையை எண்ணி அஞ்சுகின்றனர். இதனால் அவர்களுக்குள் இயற்கையாகவே மகிழ்ச்சி குறைகிறது. ஆனால் மார்க்கம் இதில் ஓர் உன்னதமான தத்துவத்தை வைத்திருக்கிறது. ஆண் குழந்தை பிறந்தால் இரண்டு ஆடுகளும், பெண் குழந்தை பிறந்தால் ஓர் ஆடும் கொடுக்க வேண்டும் என்று திர்மிதி (1433), நஸயீ (4145), அபூதாவூத் (2451), இப்னு மாஜா (3153, 3154), அஹ்மத் (661, 6695, 23066, 26056, 26057, 26268, 26270, 26271, 26465) போன்ற நூல்களில் கூறப்பட்டுள்ளது. மேலும், கொடுக்கப்படும் ஆடு பெட்டாடாகவோ அல்லது கிடாயாகவோ இருக்கலாம் என்றும் திர்மிதி (1435), நஸயீ (4147), அபூதாவூத் (2452, 2453), அஹ்மத் (26053, 26272) ஆகிய இடங்களில் குறிப்பிடப்பட்டுள்ளது.

சிலரிடம் ஆண் குழந்தைக்கு இரண்டு ஆடுகள் கொடுக்கும் அளவிற்கு வசதி இல்லாமல், ஓர் ஆடு கொடுக்கும் அளவிற்கே வசதி இருக்கலாம். அவ்வாறு ஓர் ஆடு கொடுப்பதற்கும் மார்க்கத்தில் அனுமதி உண்டு. நபி (ஸல்) அவர்கள் தங்களின் பேரன்களான ஹஸன், ஹுஸைன் ஆகியோருக்கு தலா ஓர் ஆட்டையே அகீகாவாகக் கொடுத்தார்கள் என்ற செய்தி அபூதாவூதில் (2458) ஆதாரப்பூர்வமாகப் பதிவாகியுள்ளது. வசதி உள்ளவர்கள் இரண்டு ஆடுகளுக்கு முன்னுரிமை அளிக்க வேண்டும். ஓர் ஆடு மட்டுமே கொடுக்க முடிந்தவர்கள் சிரமப்படாமல் அதை மட்டும் கொடுத்தால் போதுமானது. கடன் வாங்கியோ பிறரிடம் யாசித்தோ இரண்டு ஆடுகள் கொடுக்க வேண்டும் என்ற கட்டாயம் மார்க்கத்தில் இல்லை.

அகீகா கொடுக்கப்படும் ஆட்டின் எலும்புகளை முறிக்கக் கூடாது, சமைக்கும்போதும் பங்கிடும்போதும் எலும்புகளை முழுமையாகவே வைத்திருக்க வேண்டும் என்ற ஒரு தவறான நம்பிக்கை பரவலாக உள்ளது. சில நூல்களிலும் இவ்வாறு எழுதி வைத்துள்ளார்கள். இதற்கு ஆதாரமாக, நபி (ஸல்) அவர்கள் ஹஸன் மற்றும் ஹுஸைன் ஆகியோருக்கு அகீகா கொடுத்தபோது அதன் எலும்புகளை முறிக்காதீர்கள் என்று கூறியதாக அபூதாவூதின் மராசீல் என்ற நூலில் இடம்பெற்றுள்ள ஒரு செய்தி கூறப்படுகிறது. ஆனால், இந்தச் செய்தியை அறிவிக்கும் முஹம்மத் என்பவர் நபி (ஸல்) அவர்களுக்குப் பின் நான்கு தலைமுறைகளுக்குப் பிந்தியவர் ஆவார். நபித்தோழர்களின் தொடர்பு இல்லாமல் அறிவிக்கப்படும் இத்தகைய முர்ஸல் வகைச் செய்திகள் ஆதாரமாக ஏற்றுக்கொள்ளப்பட மாட்டாது. நபி (ஸல்) அவர்கள் சொன்னதாகவோ செய்ததாகவோ சஹாபாக்கள் அறிவித்தால் மட்டுமே அது ஏற்கத்தக்கது. எனவே, எலும்புகளை முறிக்கக் கூடாது என்ற செய்தி ஆதாரப்பூர்வமானது அல்ல.

அகீகாவுக்காக அறுக்கப்படும் பிராணியின் இறைச்சியை நாம் உண்ணக் கூடாது, ஏழைகளுக்கு மட்டுமே கொடுத்துவிட வேண்டும் என்று சிலர் கூறுகின்றனர். ஆனால் அவ்வாறு ஏழைகளுக்கு மட்டுமே கொடுக்க வேண்டும் என்றோ அல்லது நாம் உண்ணக் கூடாது என்றோ எந்த ஆதாரப்பூர்வமான கட்டளையும் இல்லை. மாறாக, உழ்ஹிய்யா எனப்படும் குர்பானி இறைச்சியைப் போன்றே இதையும் நாம் அணுக வேண்டும். குழந்தை பிறந்ததற்கு அல்லாஹ்விற்கு நன்றி செலுத்தும் விதமாக அறுக்கப்படும் இந்த இறைச்சியை நாமும் உண்ணலாம், சொந்தக்காரர்களுக்கும் கொடுக்கலாம், ஏழைகளுக்கும் தர்மம் செய்யலாம்.

பிறந்த குழந்தையின் தலைமுடியை முதன்முதலில் மழிக்கும்போது, அந்தத் தலைமுடியை எடைபோட்டு அதற்கு நிகரான எடையில் வெள்ளி தர்மம் செய்ய வேண்டும் என்றொரு நம்பிக்கை நிலவுகிறது. ஃபாத்திமா (ரலி) அவர்களுக்கு நபி (ஸல்) அவர்கள் இவ்வாறு கட்டளையிட்டதாகக் கூறி ஒரு செய்தியை இதற்கு ஆதாரமாகக் காட்டுகின்றனர்.

اِحْلِقِيْ رَأْسَهُ وَتَصَدَّقِيْ بِزِنَةِ شَعْرِهِ فِضَّةً فَوَزَنْتُهُ فَكَانَ وَزْنُهُ دِرْهَمًا أَوْ بَعْضَ دِرْهَمٍ
அவரது தலையை மழித்து, அவரது முடியின் எடைக்கு வெள்ளியைத் தர்மம் செய்துவிடு. நான் அதை எடைபோட்டுப் பார்த்தபோது, அதன் எடை ஒரு திர்ஹமாக அல்லது ஒரு திர்ஹத்தை விடக் குறைவாக இருந்தது.
(திர்மிதி: 1439)

ஆனால் இந்த ஹதீஸின் கீழ் திர்மிதி இமாம் அவர்களே `وَإِسْنَادُهُ لَيْسَ بِمُتَّصِلٍ` (இதன் அறிவிப்பாளர் வரிசை இணைந்தது அல்ல) என்று குறிப்பிட்டுள்ளார். இதன் அறிவிப்பாளர் வரிசையில் விடுபட்டிருக்கும் وَأَبُو جَعْفَرٍ مُحَمَّدُ بْنُ عَلِيِّ بْنِ الْحُسَيْنِ (அபூ ஜஃபர் முஹம்மத் இப்னு அலி இப்னுல் ஹுஸைன்) என்பவர் அலி (ரலி) அவர்களை நேரில் சந்தித்தவரோ, அவர்களது காலத்தில் வாழ்ந்தவரோ அல்ல. அலி (ரலி) அவர்களின் பேரனான ஹுஸைன் (ரலி) அவர்களின் மகன்தான் அலி. அந்த அலியின் மகன்தான் இந்த முஹம்மத் ஆவார். அலி (ரலி) அவர்களுக்கும் இவருக்கும் இடையில் அறிவிப்பாளர்கள் விடுபட்டிருப்பதால் இந்தச் செய்தி பலவீனமானதாகிறது.

இதே கருத்து முஸ்னத் அஹ்மத் (26106) மற்றும் பைஹகீ ஆகிய நூல்களிலும் இடம்பெற்றுள்ளது. ஆனால் அவற்றில் இடம்பெறும் அப்துல்லாஹ் பின் முஹம்மத் பின் அகீல் என்பவர் நம்பகமான அறிவிப்பாளர் அல்ல. இவரைப் பற்றி சுஃப்யான் மற்றும் இப்னு உயைனா ஆகியோர் `كَانَ فِي حِفْظِهِ شَيْءٌ` (அவரது மனனத்தில் குறைபாடு இருந்தது) என்று கூறியுள்ளனர். இப்னு மயீன் அவர்கள் இவர் `لَيْسَ بِذَاكَ` (பொருட்படுத்தத்தக்கவர் அல்ல) என்றும், `ضَعِيفٌ فِي كُلِّ أَمْرِهِ` (தனது அனைத்து விவகாரங்களிலும் பலவீனமானவர்) என்றும் குறிப்பிட்டுள்ளார். அபூ ஹாத்திம் அர்-ராஸீ அவர்கள் இவரைப் பற்றிக் கூறும்போது `لَيِّنُ الْحَدِيثِ لَيْسَ بِالْقَوِيِّ وَلَا مِمَّنْ يُحْتَجُّ بِحَدِيثِهِ` (ஹதீஸ் துறையில் பலவீனமானவர், பலமானவர் அல்ல; இவரது செய்திகள் ஆதாரத்திற்குரியவை அல்ல) என்று விமர்சித்துள்ளார். இந்த விவரங்கள் அல்-ஜர்ஹு வத்-தஅதீல் போன்ற நூல்களில் விரிவாகப் பதிவு செய்யப்பட்டுள்ளன. எனவே, குழந்தையின் தலைமுடி எடைக்கு வெள்ளி தர்மம் செய்ய வேண்டும் என்ற கருத்து ஆதாரப்பூர்வமானது அல்ல.

ஹஸன் (ரலி) அவர்கள் பிறந்தபோது, அவரது தலைமுடியின் எடைக்கு எடை வெள்ளி தர்மம் செய்ய வேண்டும் என்று நபி (ஸல்) அவர்கள் தம் மகள் பாத்திமா (ரலி) அவர்களிடம் கூறியதாக வரும் செய்தி சரியானதாக இல்லை. இதே கருத்தில் வேறொரு அறிவிப்பாளர் தொடர் வழியாக ஹாக்கிம் நூலிலும் ஒரு செய்தி இடம்பெற்றுள்ளது. அதனை ஹாக்கிம் சரியான செய்தி என்று குறிப்பிட்டிருந்தாலும், அந்நூலுக்கு விளக்கம் எழுதிய தஹபி அவர்கள் ليس بصحيح (இது சரியானது அல்ல) என்று தெளிவுபடுத்துகிறார்.

இச்செய்தியை அலி (ரலி) அவர்கள் கூறியதாக அவர்களது பேரன் அலியுப்னு ஹுசைன் அறிவிக்கிறார். அலி (ரலி) அவர்கள் ஹிஜ்ரி 40-ல் மரணித்தார்கள். அலியுப்னு ஹுசைன் ஹிஜ்ரி 38-ல் பிறந்தவர். அலி (ரலி) அவர்கள் மரணிக்கும்போது இவர் இரண்டு வயதுக் குழந்தையாக இருந்ததால், அலி (ரலி) அவர்களிடமிருந்து இச்செய்தியை இவர் நேரடியாகக் கேட்டிருக்க முடியாது. எனவே இதில் அறிவிப்பாளர் தொடர் முறிந்துள்ளது.

பைஹகீ நூலில் இடம்பெறும் மற்றொரு செய்தியில், பாத்திமா (ரலி) அவர்கள் கூறியதாக அலியுப்னு ஹுசைன் அறிவிப்பதாக வருகிறது. பாத்திமா (ரலி) அவர்கள் நபி (ஸல்) அவர்கள் மரணித்த ஆறு மாதங்களில், அதாவது ஹிஜ்ரி 11-ல் மரணித்துவிட்டார்கள். ஹிஜ்ரி 38-ல் பிறந்த ஒருவர், ஹிஜ்ரி 11-ல் மரணித்தவர் கூறியதாக அறிவிக்க முடியாது என்பதால் இச்செய்தியும் ஏற்கத்தக்கதல்ல.

இக்கருத்தில் வரும் பிற செய்திகளிலும் அறிவிப்பாளர் தொடர் விடுபட்டோ அல்லது பலவீனமான அறிவிப்பாளர்கள் கொண்டோ அமைந்துள்ளன. உதாரணமாக, தப்ரானியின் முஃஜமுல் கபீர் நூலில் அனஸ் (ரலி) அவர்கள் வழியாகவும், பஸ்ஸார் மற்றும் தப்ரானியின் முஃஜமுல் அவ்ஸத் ஆகிய நூல்களிலும் வரும் செய்திகளில் இப்னு லஹீஆ என்பவர் இடம்பெறுகிறார். இவர் பலவீனமான அறிவிப்பாளர் ஆவார். எனவே, குழந்தையின் தலைமுடியை மழித்து அதற்கு எடைக்கு எடை வெள்ளி தர்மம் செய்ய வேண்டும் என்பதற்கு ஆதாரப்பூர்வமான செய்தி எதுவும் இல்லை.

பெற்றோர்கள் அகீகா கொடுக்காத ஒருவர், தமக்கு வசதி வந்த பிறகு தமக்காகத் தாமே அகீகா கொடுக்கலாமா என்றொரு சட்டத்தை சிலர் கூறுகின்றனர். இதற்கு ஆதாரமாக, நபி (ஸல்) அவர்கள் عَقَّ عَنْ نَفْسِهِ بَعْدَ النُّبُوَّةِ (நபித்துவத்திற்குப் பிறகு தமக்காக அகீகா கொடுத்தார்கள்) என்று பைஹகீ நூலில் இடம்பெறும் செய்தியைச் சான்றாகக் காட்டுகின்றனர். ஆனால் இதில் இடம்பெறும் அப்துல்லாஹ் இப்னு முஹர்ரர் என்பவர் மிகவும் பலவீனமானவர் என்பதால் இது நிராகரிக்கப்பட்ட செய்தியாகும்.

இதே செய்தி தப்ரானியின் முஃஜமுல் அவ்ஸத் மற்றும் பஸ்ஸார் நூல்களிலும் வருகிறது. அதில் இடம்பெறும் அப்துல்லாஹ் இப்னுல் முஸன்னா என்பவரும் பலவீனமானவர் ஆவார். அவரைப் பற்றி இப்னு மயீன் அவர்கள் ليس بشيء (இவர் பொருட்படுத்தத்தக்கவர் அல்ல) என்றும், இமாம் நஸஈ அவர்கள் ليس بقوي (இவர் பலமானவர் அல்ல) என்றும், அபூதாவூத் அவர்கள் لا أخرج حديثه (இவரது ஹதீஸை நான் பதிவு செய்ய மாட்டேன்) என்றும் கூறியுள்ளனர். இமாம் நவவி அவர்களும் இது தொடர்பாக வரும் செய்திகள் அனைத்தும் ஆதாரமற்றவை என்று தெளிவுபடுத்தியுள்ளார்.

நபி (ஸல்) அவர்கள் அகீகாவை ஏழாம் நாளில் கொடுக்க வேண்டும் என்றே வழிகாட்டியுள்ளார்கள். பதினான்காம் நாளோ அல்லது இருபத்தோராம் நாளோ கொடுப்பதற்குக் கூட சரியான ஆதாரம் இல்லை. ஏழாம் நாள் கடந்துவிட்டால் தந்தை கூட கொடுக்க முடியாது எனும் போது, நாற்பது ஆண்டுகளுக்குப் பிறகு தமக்காகத் தாமே அகீகா கொடுத்துக் கொள்வதற்கு மார்க்கத்தில் எந்த அடிப்படையும் இல்லை. ஏழாம் நாளில் கொடுக்க முடிந்தால் கொடுக்க வேண்டும்; இயலவில்லை என்றால் அத்துடன் விட்டுவிட வேண்டும் என்பதுதான் சட்டமாகும்.