தாவரங்களின் முட்களில் உள்ள அறிவியல் என்ன?

தாவரங்களுக்கு முட்கள் இருப்பது, அவற்றை உண்ண வரும் விலங்குகளிடம் இருந்து தங்களைப் பாதுகாத்துக் கொள்ளத்தான். முட்களின் கூர்மையான முனை தோலை எளிதாகக் கிழித்து உள்ளே சென்றுவிடும்.

ஒரு விலங்கு முள்ளின் மீது குறைந்த விசையைக் கொடுத்தாலும், முள்ளின் கூர்மையால் அந்த விசை மிகச் சிறிய பரப்பில் செயல்பட்டு அதிக அழுத்தத்தை உருவாக்குகிறது. இதனால் தோல் கிழிபடுகிறது. இதனால் விலங்குகள் முட்கள் உள்ள தாவரங்களை அதிகம் உண்பதைத் தவிர்க்கின்றன.

பாலைவனப் பகுதிகளில் உள்ள தாவரங்களின் முட்கள், இலைகள் மற்றும் தண்டுகளின் மீது சிறிய நிழல்களை உருவாக்கி, தாவரங்களை வெயிலில் இருந்து பாதுகாக்கின்றன. மேலும், கூர்முனை சூரிய ஒளியைச் சிதறடித்து, வெப்பம் உறிஞ்சப்படுவதைக் குறைக்கிறது.

முட்கள் அடிப்பகுதியை நோக்கி தடிமனாகிக் கூம்பு வடிவில் இருப்பதால், விலங்குகள் இழுக்கும்போது எளிதில் முறிந்து போகாது. சில முட்கள் வளைந்து கொடுக்கும் தன்மையுடன் இருப்பதால், உடைவதைத் தடுக்கிறது.

சப்பாத்திக்கள்ளி போன்ற தாவரங்களின் அடர்த்தியான முட்கள், வேகமாக வீசும் காற்றின் வேகத்தைக் குறைக்கின்றன. இதனால் இலைகளின் மேற்பரப்பில் உள்ள ஈரப்பதக் காற்று அங்கேயே தங்கி, இலைகளில் இருந்து நீர் ஆவியாவதைக் குறைக்கிறது.

பெரும்பாலான தாவரங்களின் முட்கள் செங்குத்தாக இல்லாமல், சாய்வாக (சுமார் 30 முதல் 60 டிகிரி வரை) இருக்கும். இது, விலங்குகள் பக்கவாட்டில் தேய்க்கும்போது முட்களின் மீது ஏற்படும் திருப்பு விசையைக் குறைத்து, முட்கள் எளிதில் உடைவதைத் தடுக்கிறது.

இறைவன் தனது படைப்பில், தாவரங்கள் தங்களைப் பாதுகாத்துக் கொள்ளவும், கடுமையான சூழல்களில் வாழவும் இத்தகைய நுட்பமான அமைப்புகளைக் கொடுத்திருப்பது வியப்பளிக்கிறது. இது இயற்கையின் ஒழுங்கையும், படைப்பின் ஞானத்தையும் காட்டுகிறது.

ஆதாரம்: இந்து தமிழ் திசை