தாவரங்களின் முட்களில் உள்ள அறிவியல் என்ன?

தாவரங்களுக்கு முட்கள் இருப்பது, அவற்றை உண்ண வரும் விலங்குகளிடமிருந்து தங்களைப் பாதுகாத்துக்கொள்ளும் ஒரு வழியாகும். இந்த முட்கள் கூர்மையாக இருப்பதால், அவை விலங்குகளின் தோலை எளிதில் கிழித்து உள்ளே சென்றுவிடும்.

ஒரு விலங்கு முள்ளின் மீது மிகக் குறைவான விசையைச் செலுத்தினால் கூட, முள்ளின் கூர்மையால் அந்த விசை மிகச் சிறிய பரப்பளவில் செயல்பட்டு அதிக அழுத்தத்தை (pressure) உருவாக்குகிறது. இதனால் முள் எளிதாக தோலைக் கிழித்து உள்ளே செல்கிறது. இதன் காரணமாக, விலங்குகள் முட்கள் நிறைந்த தாவரங்களை உண்பதைத் தவிர்க்கின்றன. முட்கள் என்பவை மிகக் குறைந்த எடையுடன் எதிரியைச் சமாளிக்கும் ஒரு கருவியாகும்.

பாலைவனங்கள் போன்ற அதிக வெப்பம் உள்ள பகுதிகளில், தாவரங்களின் இலைகள் மற்றும் தண்டுகளில் உள்ள முட்கள் சிறிய நிழல்களை உருவாக்கி, தாவரங்களை வெயிலில் இருந்து பாதுகாக்கின்றன. மேலும், கூர்மையான முனைகள் சூரிய ஒளியைச் சிதறடித்து, தாவரங்கள் வெப்பத்தை உறிஞ்சுவதைக் குறைக்கின்றன.

முட்கள் மேலிருந்து கீழ்வரை ஒரே தடிமனில் இருப்பதில்லை. மேல் முனை கூர்மையாக இருந்தாலும், அடிப்பகுதியை நோக்கி வரும்போது தடிமன் அதிகமாகி கூம்பு வடிவில் இருக்கும். விலங்குகள் தோலால் முட்களை இழுக்கும்போது, இந்த கூம்பு வடிவம் முட்கள் எளிதில் முறிந்துவிடாமல் தடுக்கிறது. சில தாவரங்களின் முட்கள் வளைந்து கொடுக்கும் தன்மையுடன் (elastic nature) இருப்பதால், அவை எளிதில் உடைவதைத் தடுக்கின்றன.

தண்டுகள் மற்றும் கிளைகளில் உள்ள முட்கள் ‘தோர்ன்ஸ்’ (thorns) என்றும், இலைகளில் அடர்த்தியாக இருக்கும் முட்கள் ‘ஸ்பைன்ஸ்’ (spines) என்றும் அழைக்கப்படுகின்றன. சப்பாத்திக்கள்ளி இலையில் இருப்பது ஸ்பைன் வகையைச் சேர்ந்தது.

இந்த ஸ்பைன்கள் எதிரிகளிடமிருந்து பாதுகாப்பதுடன், சப்பாத்திக்கள்ளியின் மேற்பரப்பில் வேகமாக வீசும் காற்றின் வேகத்தையும் குறைக்கின்றன. முட்கள் இல்லாவிட்டால், இலைகளின் அருகில் உள்ள ஈரப்பதமான காற்று, வீசும் காற்றால் எளிதில் அகற்றப்பட்டு, உலர்ந்த காற்று இலைகளை வந்தடையும். இது இலைகளில் இருந்து நீர் ஆவியாவதை அதிகரிக்கும்.

ஆனால், ஸ்பைன்கள் இருப்பதால் காற்றின் வேகம் குறைக்கப்பட்டு, இலைகளின் மேற்பரப்பில் உள்ள ஈரப்பதமான காற்று அங்கேயே நிலைத்து நிற்கிறது. இந்த ஈரப்பதமான காற்று இலைகளில் இருந்து நீர் ஆவியாவதைத் தடுக்கிறது.

பெரும்பாலான தாவரங்களின் முட்கள் அவை இருக்கும் இடத்திலிருந்து செங்குத்தாக இல்லாமல், சற்று சாய்வாக (தோராயமாக 30 முதல் 60 டிகிரி வரை) இருக்கும். விலங்குகள் முட்களின் மீது பக்கவாட்டில் விசையைச் செலுத்தும்போது, இந்த சாய்வான அமைப்பு திருப்பு விசையை (torque) குறைக்கிறது. திருப்பு விசை குறைவாக இருப்பதால், முட்கள் எளிதில் முறிந்து போவது தடுக்கப்படுகிறது.

இறைவன் தனது படைப்புகளில் ஒவ்வொரு சிறிய அம்சத்திலும் பெரும் ஞானத்தையும் ஒழுங்கையும் வைத்துள்ளான். தாவரங்களின் முட்கள் கூட அவற்றின் பாதுகாப்புக்கும், உயிர்வாழ்வதற்கும் எவ்வாறு உதவுகின்றன என்பதை நாம் சிந்தித்துப் பார்க்கும்போது, படைப்பாளனின் அளவற்ற ஆற்றலையும் நுட்பமான வடிவமைப்பையும் உணர முடிகிறது.

ஆதாரம்: இந்து தமிழ் திசை