அகழ்ப்போரில் தந்தையை அடையாளம் கண்ட சிறுவன் இப்னு ஸுபைர் (ரலி)

“என் தந்தையும் என் தாயும் உங்களுக்கு அர்ப்பணம்” — ஸுபைர் (ரலி)க்கு மட்டும் கிடைத்த சிறப்பு

அப்துல்லாஹ் பின் அஸ்ஸுபைர் (ரலி) அவர்கள் கூறியதாவது: அகழ்ப் போரின்போது நானும் உமர் பின் அபீசலமா (ரலி) அவர்களும் பெண்களுடன் (அவர்களுக்குப் பாதுகாப்பாக) “ஹஸ்ஸான்” கோட்டையில் இருந்தோம். அப்போது உமர் பின் அபீசலமா ஒருமுறை எனக்காகத் தலையைத் தாழ்த்துவார். நான் (எதிரிகளின் திசையில்) பார்ப்பேன். மறுமுறை நான் தலையைத் தாழ்த்திக்கொள்வேன். உமர் பின் அபீசலமா (எதிரிகளின் திசையில்) பார்ப்பார். என் தந்தை (ஸுபைர்) அவர்கள் குதிரை மீதமர்ந்து பனூ குறைழா (யூதர்களை) நோக்கி ஆயுதத்துடன் கடந்து சென்றபோது, அவர்களை நான் அறிந்துகொண்டேன்.

அப்துல்லாஹ் பின் உர்வா பின் அஸ் ஸுபைர் (ரஹ்) அவர்களது அறிவிப்பில் பின்வருமாறு காணப்படுகிறது: பின்னர் (ஒரு முறை) அதைப் பற்றி நான் என் தந்தையிடம் பேசியபோது, “அன்பு மகனே! அப்போது என்னை நீ பார்த்தாயா?” என்று கேட்டார்கள். நான் “ஆம்” என்றேன். கவனமாகக் கேள்: அல்லாஹ்வின் மீதாணையாக! அன்றைய தினம் அல்லாஹ்வின் தூதர் (ஸல்) அவர்கள் எனக்காகத் தம் பெற்றோர் இருவரையும் ஒன்றுசேர்த்து, “என் தந்தையும் என் தாயும் உங்களுக்கு அர்ப்பணம்” என்று கூறினார்கள் என்றார்கள்.

இந்த ஹதீஸ் இரு அறிவிப்பாளர்தொடர்களில் வந்துள்ளது. – மேற்கண்ட ஹதீஸ் அப்துல்லாஹ் பின் அஸ் ஸுபைர் (ரலி) அவர்களிடமிருந்தே மற்றோர் அறிவிப்பாளர்தொடர் வழியாகவும் வந்துள்ளது. அதில், “அகழ்ப்போர் தினத்தன்று நானும் உமர் பின் அபீசலமா (ரலி) அவர்களும் பெண்கள் – அதாவது நபி (ஸல்) அவர்களின் துணைவியர்- இருந்த கோட்டையில் இருந்தோம்” என்று ஹதீஸ் ஆரம்பமாகிறது. மற்ற விவரங்கள் மேற்கண்ட ஹதீஸில் உள்ளதைப் போன்றே இடம்பெற்றுள்ளன. அதில் அப்துல்லாஹ் பின் உர்வா (ரஹ்) அவர்கள் தெரிவித்த செய்தி இடம்பெறவில்லை. ஹிஷாம் பின் உர்வா பின் அஸ்ஸுபைர் (ரஹ்) அவர்களது அறிவிப்பிலேயே அந்தக் குறிப்பு இடையில் சேர்க்கப்பட்டுள்ளது.

அறிவிப்பவர்: அப்துல்லாஹ் பின் அஸ்ஸுபைர் (ரலி)

நூல் – (முஸ்லிம்: 4795) ➚

பெண்களுடன் பாதுகாப்பாக ஒளிந்திருந்த சிறுவன் இப்னு ஸுபைர் (ரலி), தம் தந்தையின் துணிச்சலை அந்தச் சிறு வயதிலேயே கவனித்து மனதில் பதித்து வைத்திருந்தார்கள். பெற்றோர் காட்டும் நல்ல முன்மாதிரிகளை குழந்தைகள் மறக்காமல் நினைவில் வைத்திருப்பார்கள் என்பதை இது நமக்குக் காட்டுகிறது.

ஸுபைர் (ரலி)யின் அந்த நாளின் துணிவை நபி (ஸல்) குறைவாக மதிப்பிடவில்லை; அவருக்குக் கிடைத்த சிறப்பான வார்த்தைகளே அதற்குச் சான்று. நம் சுற்றத்திலும் யாராவது நல்லது செய்தால், அதை மனந்திறந்து பாராட்ட நாம் தயங்கக் கூடாது.