ஹுனைனில் தீரமாகப் போரிட்ட வீரர் — ‘அவர் நரகவாசி’ என்றே சொன்னார்கள் நபி (ஸல்)

“இறந்துவிட்டாரே!” என்றபோதும் “அவர் நரகத்திற்குத்தான்” என்றார்கள் நபி (ஸல்)

அபூஹுரைரா (ரலி) அவர்கள் கூறியதாவது: அல்லாஹ்வின் தூதர் (ஸல்) அவர்களுடன் நாங்கள் ஹுனைன் போரில் கலந்து கொண்டோம்.அப்(போரின்)போது அல்லாஹ்வின் தூதர் (ஸல்) அவர்கள் (தம்முடன்) இருந்த முஸ்லிம் என்று கருதப்பட்ட ஒருவரைப் பற்றி “இவர் நரகவாசிகளில் ஒருவர்” என்று கூறினார்கள். போரிடும் நேரம் வந்தபோது அந்த நபர் கடுமையாகப் போரிட்டார். அதனால் அவருக்குக் காயங்கள் ஏற்பட்டன. அப்போது (நபி (ஸல்) அவர்களிடம்) “அல்லாஹ்வின் தூதரே! தாங்கள் யாரைப் பற்றி “இவர் நரகவாசிகளில் ஒருவர்” என்று சொன்னீர்களோ அவர் இன்றைய தினம் கடுமையாகப் போரிட்டு இறந்துவிட்டார்” என்று கூறப்பட்டது.

அப்போது நபி (ஸல்) அவர்கள் “அவர் நரகத்திற்குத்தான்” என்றார்கள். உடனே முஸ்லிம்களில் சிலர் (நபி (ஸல்) அவர்களின் இக்கூற்றை) சந்தேகப்படும் அளவுக்குச் சென்றுவிட்டார்கள். நிலைமை இவ்வாறிருக்க, “அந்த மனிதர் (போரில்) இறக்கவில்லை. அவருக்குக் கடுமையான காயம்தான் ஏற்பட்டது” என்று கூறப்பட்டது. பின்னர் இரவு வந்தபோது அவரால் வலி பொறுக்க முடியாமல் தற்கொலை செய்துகொண்டார். இச்செய்தி நபி (ஸல்) அவர்களுக்குத் தெரிவிக்கப்பட்டது. அப்போது அவர்கள், “அல்லாஹ் மிகவும் பெரியவன்.

நான் அல்லாஹ்வின் அடியானும் அவனுடைய தூதரும் ஆவேன் என்று நான் உறுதி கூறுகிறேன்” என்றார்கள். பிறகு பிலால் (ரலி) அவர்களிடம் “(துன்பங்களை எல்லா நிலைகளிலும் சகித்துக்கொண்டு அடிபணிந்து வாழ்ந்த) முஸ்லிமான மனிதர்தாம் சொர்க்கத்தில் நுழைவார். மேலும், அல்லாஹ் இந்த மார்க்கத்திற்குப் பாவியான மனிதனின் மூலமும் வலுவூட்டுகிறான்” என்று மக்களிடையே அறிவிப்புச் செய்யுமாறு கூறினார்கள். அவ்வாறே பிலால் (ரலி) அவர்கள் மக்களிடையே அறிவிப்புச் செய்தார்கள்.

அறிவிப்பவர்: அபூஹுரைரா (ரலி)

நூல் – (முஸ்லிம்: 178) ➚

கடுமையாகப் போரிட்டு காயப்பட்ட ஒருவரை நரகவாசி என்று நபி (ஸல்) சொன்னதைக் கேட்டு தோழர்களே சந்தேகப்பட்டார்கள் — வெளியே தெரிவது எப்போதும் உள்ளத்தில் உள்ளதை முழுமையாகக் காட்டாது. போர்க்களத்தில் தீரமும் வலியைத் தாங்கும் திறனும் மட்டும் ஒருவரை நல்லவராக்கிவிடாது; அவற்றின் பின்னணியில் இருக்கும் நோக்கமும் இறுதி முடிவும்தான் மதிப்பிடப்படும்.

செயல்கள் மதிப்பிடப்படுவது அவற்றின் முடிவைக் கொண்டே என்பதை இந்தச் சம்பவம் நமக்கு அழுத்தமாக நினைவூட்டுகிறது. வலியைத் தாங்கமுடியாமல் அந்த வீரர் தன்னைத்தானே முடித்துக்கொண்ட கணமே அவருடைய போர் முழுவதையும் வீணாக்கிவிட்டது. இன்று நாம் செய்யும் ஒவ்வொரு நல்ல செயலும் கடைசி வரை நிலைத்திருக்கவும், நம் முடிவு நல்லதாக அமையவும் இறைவனிடம் தொடர்ந்து பிரார்த்திப்பதே இதிலிருந்து நாம் கற்கும் பாடம்.