அகழ்ப் போரில் மண் சுமந்த நபி (ஸல்) — பாடிக்கொண்டே தோண்டிய அந்த இரவு

“இறைவா! நீ இல்லையென்றால் நாங்கள் நேர்வழி பெற்றிருக்க மாட்டோம்”

பராஉ இப்னு ஆஸிப்(ரலி) அறிவித்தார். நான் இறைத்தூதர்(ஸல்) அவர்களை அகழ்ப் போரின்போது, (அகழ் வெட்டுவதற்காகத் தோண்டிய) மண்ணை (கொட்டுமிடத்திற்கு) எடுத்துச் செல்பவர்களாகக் கண்டேன். எந்த அளவுக்கென்றால் அந்த மண், அவர்களின் மார்பின் முடியை மறைத்து விட்டிருந்தது… மேலும், நபி(ஸல்) அவர்கள் அதிகமான முடியுடையவர்களாக இருந்தார்கள். அவர்கள் (கவிஞரான தம் தோழர்) அப்துல்லாஹ் இப்னு ரவாஹா(ரலி) அவர்களின் பாடலைப் பாடிக் கொண்டிருந்தார்கள்: இறைவா!

நீ (கொடுத்த நேர்வழி) இல்லையென்றால் நாங்கள் நேர்வழி பெற்றிருக்க மாட்டோம்; தருமமும் செய்திருக்க மாட்டோம்; தொழுதிருக்கவும் மாட்டோம். எனவே, எங்களின் மீது அமைதியை இறக்கியருள். நாங்கள் போர்க்களத்தில் எதிரியைச் சந்திக்கும்போது எங்கள் பாதங்களை உறுதிப்படுத்து. பகைவர்கள் எங்களின் மீது வரம்பு மீறி அநீதியிழைத்துவிட்டார்கள். அவர்கள் எங்களைச் சோதிக்க விரும்பினால் அதற்கு நாங்கள் இடம் தர மாட்டோம். இதை நபி(ஸல்) அவர்கள் உரத்த குரலுடன் பாடிக் கொண்டிருந்தார்கள்.

அறிவிப்பவர்: பராஉ இப்னு ஆஸிப் (ரலி)

நூல் – (புகாரி: 3034) ➚

அகழ் தோண்டும் கடின உழைப்பில் நபி (ஸல்) அவர்களும் தம் தோழர்களுடன் சேர்ந்து மண் சுமந்தார்கள் — மார்பில் மண் படியும் அளவுக்கு. உத்தரவிட்டு ஒதுங்கி நிற்காமல், சிரமத்தில் அனைவருடனும் இணைந்திருப்பதே உண்மையான தலைமை.

உழைப்பின் களைப்பைப் பாட்டாக்கி, அதை ஒரு பிரார்த்தனையாக மாற்றினார்கள் அவர்கள். நமக்குக் கிடைத்த நேர்வழியும் நல்லறமும் தொழுகையும் எல்லாம் அல்லாஹ்வின் அருளால் மட்டுமே என்பதை நினைவுகூர்ந்தபடி வேலை செய்தது, கடின உழைப்பையே வணக்கமாக மாற்றும் ஒரு வழியைக் காட்டுகிறது.