மகன் இறந்த செய்தியை இரவு முழுக்க மறைத்த அபூதல்ஹா (ரலி) துணைவியார்

“இந்த இரவு நடந்தவற்றில் அல்லாஹ் உங்கள் இருவருக்கும் அபிவிருத்தி செய்யக்கூடும்”

அனஸ் இப்னு மாலிக்(ரலி) அறிவித்தார். அபுதல்ஹா(ரலி)வின் மகன் நோயுற்றிருந்தார். ஒரு நாள் அபுதல்ஹா(ரலி) வெளியே சென்றிருந்தபோது குழந்தை இறந்துவிட்டது. இதைக் கண்ட அபூ தல்ஹா(ரலி)வின் மனைவி உடனே கொஞ்சம் உணவைத் தயார் செய்தார். பிறகு மய்யித்தை வீட்டின் ஒரு மூலையில் வைத்தார். வெளியே சென்றிருந்த அபூ தல்ஹா(ரலி) வீடு திரும்பிய உடன் மகன் எவ்வாறுள்ளான்? எனக் கேட்டார் அதற்கு அவரின் மனைவி ‘அமைதியாகிவிட்டான்; நிம்மதி (ஓய்வு) பெற்று விட்டிருப்பான் என்பதே என்னுடைய எதிர்பார்ப்பு’ என பதிலளித்தார்.

அபூ தல்ஹா(ரலி) தம் மனைவி கூறியது உண்மைதான் என்றெண்ணி (நிம்மதியுடன்) தம் மனைவியோடு இரவைக் கழித்தார். பொழுது விடிந்து குளித்துவிட்டுத் (தொழுகைக்காக) வெளியே செல்ல நாடியபோது மகன் இறந்துவிட்டதை மனைவி கூறினார். அபூ தல்ஹா நபி(ஸல்) அவர்களோடு தொழுதுவிட்டுத் தம் வீட்டில் நடந்த சம்பவத்தை அவர்களிடம் கூறினார். அதற்கு நபி(ஸல்) அவர்கள் ‘இந்த இரவு நடந்தவற்றில் அல்லாஹ் உங்கள் இருவருக்கும் அபிவிருத்தி செய்யக்கூடும்’ என்றார்கள். கூறுகிறார்.

இருவருக்கும் ஒன்பது குழந்தைகள் இருப்பதை பார்த்தேன். அவர்கள் அனைவரும் குர்ஆனை ஓதுபவர்களாக இருந்தனர் என மதீனாவைச் சேர்ந்த அன்சாரிகளில் ஒருவர் கூறினார்.

அறிவிப்பவர்: அனஸ் இப்னு மாலிக் (ரலி)

நூல் – (புகாரி: 1301) ➚

கணவர் வெளியே சென்றிருந்த நேரத்தில் மகன் இறந்துவிட்டதை அறிந்தும், அபூதல்ஹா (ரலி) துணைவியார் பதறவில்லை. உணவைத் தயார் செய்து, மய்யத்தை ஒரு மூலையில் மறைத்துவைத்து, கணவர் திரும்பியதும் மகன் நலமா என்று கேட்டதற்கு அமைதியாக இருப்பதாகவே மறைமுகமாகப் பதிலளித்தார். பொய் சொல்லவில்லை; உண்மையை சரியான நேரத்தில் சொல்ல வேண்டும் என்ற முதிர்ச்சியே அதில் தெரிகிறது.

விடிந்தபின், உண்மையை அறிந்த அபூதல்ஹா (ரலி) கோபப்படவோ புலம்பவோ இல்லை; நேராக நபி (ஸல்) அவர்களிடம் சென்று தொழுது, நடந்ததைத் தெரிவித்தார். அந்தப் பொறுமைக்குக் கிடைத்த பரிசைப் பாருங்கள் — ஒன்பது பிள்ளைகள், அனைவரும் குர்ஆனை ஓதியவர்களாக அவர்களுக்குப் பிறந்தார்கள். கடினமான ஒரு இரவை சரியாகக் கையாண்டதன் விளைவை தலைமுறைகள் கடந்தும் அனுபவிக்க முடியும் என்பதற்கு இது ஒரு நேரடி சான்று.