இஸ்லாம் மதமா மார்க்கமா ?

மதம் என்ற சொல்லுக்கு வெறி என்றொரு பொருளும் உண்டு. யானைக்கு மதம் பிடித்தது என்று சொல்வது போல, வெறி என்ற அர்த்தத்தில் பார்த்தால் இஸ்லாம் மதம் அல்ல. மார்க்கம் என்றால் வழி என்று பொருள். இஸ்லாம் என்பது வெறும் வழிபாட்டுடன் நின்றுவிடாமல், மனித வாழ்க்கையின் அனைத்து அம்சங்களிலும் வழிகாட்டக்கூடிய ஒரு முழுமையான வாழ்க்கை நெறியாக இருப்பதாலேயே அது மார்க்கம் என்று அழைக்கப்படுகிறது.

பொதுவாக மதம் என்று சொன்னால் கடவுளை எவ்வாறு வழிபடுவது என்பதை மட்டுமே கற்றுக்கொடுக்கும். ஆனால் இஸ்லாம் ஒரு வாழ்க்கை நெறியாகத் திகழ்வதால், சிறுநீர் மற்றும் மலம் கழிப்பது முதல் படுத்து உறங்குவது வரை அனைத்திற்கும் உரிய ஒழுங்குமுறைகளை வகுத்துள்ளது.

நகம் வெட்டுவது, அக்குள் முடிகளை அகற்றுவது, பல் துலக்குவது போன்ற ஒரு மனிதன் தன்னைத் தூய்மையாகவும் நேர்த்தியாகவும் பராமரித்துக் கொள்ளத் தேவையான அனைத்து விஷயங்களுக்கும் ஒரு சீரான நெறிமுறையையும் நேரத்தையும் இஸ்லாம் கற்றுத் தருகிறது.

தனிநபர் ஒழுக்கம் மட்டுமின்றி கொடுக்கல் வாங்கல், வியாபாரம், விவசாயம், ஆட்சி அதிகாரம், கூட்டு சொந்தங்களோடு பழகுவது, உறவினர்களை நேசிப்பது, விருந்தினர்களை உபசரிப்பது என மனித வாழ்வின் சகல துறைகளிலும் இஸ்லாம் வழிகாட்டுகிறது. வியாபாரம் செய்ய மனிதனுக்கு அனுமதி வழங்கும் இஸ்லாம், விருப்பம்போல் எதையும் விற்றுக்கொள்ளலாம் என்று விட்டுவிடவில்லை.

மனிதனுக்குக் கேடு விளைவிக்கும் சாராயம், ஹெராயின் போன்ற போதைப்பொருள் வியாபாரங்களைச் செய்யக்கூடாது என்று தடை விதிக்கிறது. இறைவனை வணங்காதபோது ஒருவன் எவ்வாறு பாவியாகிறானோ, அதே போன்று மார்க்கம் தடை செய்த இதுபோன்ற தொழில்களைச் செய்தாலும் பாவியாகிவிடுவான்.

மேலும், கலப்படம் செய்வது, பொய் சொல்வது, பொருளின் குறைகளை மறைத்து விற்பது, வெளியில் ஒன்றை வைத்து உள்ளே வேறொன்றை வைத்து ஏமாற்றுவது மற்றும் வட்டி வாங்குவது, கொடுப்பது ஆகிய அனைத்தையும் இஸ்லாம் முற்றாகத் தடை செய்துள்ளது.

செருப்பு அணிவது, ஆடை உடுத்துவது, தன்னை அலங்கரித்துக் கொள்வது என மனித வாழ்வின் ஒவ்வோர் அசைவிலும் இன்னதைச் செய், இன்னதைச் செய்யாதே என்று இஸ்லாம் திட்டவட்டமாக வழிகாட்டுகிறது. இஸ்லாம் எதைச் செய்யச் சொல்கிறதோ அதுவும், எதைத் தவிர்க்கச் சொல்கிறதோ அதுவும் மனித அறிவுக்கு முற்றிலும் பொருத்தமானதாகவே அமைந்திருக்கிறது.

இஸ்லாம் என்பது வெறுமனே ஆலய வழிபாட்டோடு நின்றுவிடாமல், மனித வாழ்வின் அனைத்து நிலைகளிலும் அறிவுக்குப் பொருத்தமான வழிகாட்டலை வழங்கும் ஒரு முழுமையான வாழ்க்கை நெறியாக இருப்பதால், அது ஒரு மதமல்ல; உன்னதமான மார்க்கமாகும்.