பேய் ஓட்டுவதாக ஏமாற்றுவோர் உங்கள் மதத்தில் தானே அதிகமாக உள்ளனர் அது ஏன் ?
சுனாமி போன்ற பேரிடர்களின் போது ஏழை எளிய மக்களும், மகளிர் சுய உதவிக் குழுவினரும், சிறு பிள்ளைகளும் கூட தங்களால் இயன்ற உதவிகளைச் செய்தார்கள் என்பதில் மாற்றுக்கருத்து இல்லை. ஆன்மிகத்தின் பெயரால் மக்களிடம் கோடிக்கணக்கில் வசூலிக்கும் சாமியார்கள் அந்த நேரத்தில் மக்களுக்கு உதவ முன்வரவில்லை என்ற உண்மையையே நாம் சுட்டிக்காட்டினோம்.
தர்காக்களில் நடக்கும் ஏமாற்று வேலைகளை இஸ்லாம் ஒருபோதும் ஏற்பதில்லை. சமாதி மூச்சு விடுகிறது என்ற வதந்தியை ஆய்வு செய்வதற்காக நாங்களே நேரில் சென்று ஆய்வு செய்து அம்பலப்படுத்தினோம். இறந்து புதைக்கப்பட்ட ஒரு உடல் தானாக மூச்சுவிட முடியாது. அங்கு செயற்கையாக பம்ப் போன்ற அமைப்புகளைச் செய்து மக்களை ஏமாற்றிய அந்த மோசடியை ஆதாரங்களுடன் பதிவு செய்து வெளியிட்டுள்ளோம்.
நாகூர் போன்ற தர்காக்களில் தலையில் வைப்பதற்கும், காலணியைத் தொட்டு ஆசி பெறுவதற்கும் கூட பணம் வசூலிக்கும் அவல நிலை உள்ளது. இறந்துபோன மனிதர்களுக்கு ஏதோ அற்புத ஆற்றல் இருப்பதாகக் கூறி மக்களை ஏமாற்றுவதற்கும் இஸ்லாத்திற்கும் எந்தச் சம்பந்தமும் இல்லை. இதனால்தான் நாகூரிலேயே தர்காவுக்கு முன்னால் மேடை அமைத்து, இந்த தர்கா வழிபாடுகளை அப்புறப்படுத்த வேண்டும் என்று பேசி, கடுமையான எதிர்ப்புகளையும் தடியடிகளையும் சந்தித்தோம்.
தர்காக்களில் பேய் ஓட்டுவதாகக் கூறி மக்களிடம் ஆயிரக்கணக்கில் பணம் பறிக்கிறார்கள். உண்மையில் பேய், பிசாசு என்று எதுவும் கிடையாது. இறந்தவர்களின் ஆவி மற்றொரு மனிதர் மீது ஏறுவது சாத்தியமே இல்லை. இது ஒன்று மனநலப் பாதிப்பாக இருக்கும், அல்லது கடன் பிரச்சனை போன்றவற்றில் இருந்து தப்பிப்பதற்காக மனிதர்கள் போடும் வேஷமாக இருக்கும். முஸ்லிம் பெயரில் சிலர் இத்தகைய ஏமாற்று வேலைகளிலும் போலி மந்திர தந்திரங்களிலும் ஈடுபடுவதை இஸ்லாத்தின் பெயரால் நாம் ஒருபோதும் நியாயப்படுத்த மாட்டோம்.
இஸ்லாத்தின் பெயரால் நடக்கும் இத்தகைய மூடநம்பிக்கைகளையும் வரதட்சணை போன்ற தீமைகளையும் முஸ்லிம் சமூக மக்களிடமே எதிர்த்துப் பேசியதால் நாங்கள் பல கொடூரமான தாக்குதல்களுக்கு ஆளானோம். மேடையில் ஏறி அரிவாளால் வெட்டிய தழும்புகள் இன்றும் உடலில் உள்ளன. மக்கள் சூழ்ந்து தாக்கிய போதும் இந்த விழிப்புணர்வுப் பணியை நாங்கள் கைவிடவில்லை. ஆரம்பத்தில் சிலரைக் கொண்டு தொடங்கிய இந்த சீர்திருத்தப் பிரச்சாரத்தின் பலனாக, இன்று வாரந்தோறும் நூற்றுக்கணக்கான ஊர்களில் கூட்டங்கள் நடத்தப்பட்டு, லட்சக்கணக்கான முஸ்லிம்கள் தர்கா வழிபாடுகளைக் கைவிட்டு ஓரிறைக் கொள்கையை ஏற்றுக்கொண்டுள்ளனர்.
தர்காக்களில் நடக்கும் மோசடிகளை அங்கிருப்பவர்களிடமே பேட்டி கண்டு, அவர்கள் பிழைப்புக்காக மக்களை ஏமாற்றுவதை அவர்களது வாயாலேயே ஒப்புக்கொள்ள வைத்து “தர்காக்களில் நடப்பது என்ன?” என்ற ஆவணப்படமாக வெளியிட்டுள்ளோம். பிற மதங்களில் நடக்கும் போலி அற்புதங்களை மட்டுமல்லாமல், இஸ்லாத்தின் பெயரைச் சொல்லிக்கொண்டு தர்காக்களில் மக்களை ஏமாற்றும் மோசடிப் பேர்வழிகளையும் சமரசமின்றி அம்பலப்படுத்துவதே நமது நிலைபாடாகும்.
இஸ்லாத்தின் பெயரால் தர்காக்களில் நிகழ்த்தப்படும் அத்தனை போலி அற்புதங்களும் பேய் ஓட்டும் நிகழ்வுகளும் பிழைப்புக்காகச் செய்யப்படும் ஏமாற்று வேலைகளே தவிர, அவற்றுக்கும் தூய இஸ்லாமிய மார்க்கத்திற்கும் எவ்விதத் தொடர்பும் இல்லை.