கிறித்தவர்களைப் போல் முஸ்லிம்கள் மதத்தைப் பரப்புவதில்லையே ஏன்?

மதப் பிரச்சாரங்களில் இரண்டு வகைகள் உள்ளன. மக்களின் பலவீனங்களைப் பயன்படுத்திக்கொண்டு பொய்யான வாதங்களைக் கூறி ஏமாற்றிச் செய்யக்கூடிய பிரச்சாரம் ஒரு வகை; சரியான கொள்கைகளை எடுத்துக்கூறி மக்களைச் சிந்திக்க வைக்கும் பிரச்சாரம் மற்றொரு வகை. ஏமாற்று வேலைகளை யார் செய்தாலும் அது கண்டிக்கத்தக்கது.

இன்றைக்குச் சில மதப் பிரச்சாரங்களில் குருடர்கள் பார்க்கிறார்கள், செவிடர்கள் கேட்கிறார்கள் என்று மேடைகளில் அற்புதங்கள் நிகழ்த்துவதாகக் காட்டுகிறார்கள். உண்மையில் அத்தகைய அற்புதங்கள் அங்கு நடப்பதில்லை. கண் தெரியாதவரைப் போல ஆட்களை நடிக்க வைத்து மக்களை ஏமாற்றுகிறார்கள். இத்தகைய நிகழ்ச்சிகளின் உண்மைத் தன்மையை ஆய்வு செய்து, அங்கு நடக்கும் ஏமாற்று வேலைகள் ஆதாரப்பூர்வமாக நிரூபிக்கப்பட்டுள்ளன. மேடையில் நின்ற உடனே பார்வை வந்துவிடும் என்றால் கண் மருத்துவமனைகளே தேவையில்லை. ஆனால், அத்தகைய பிரச்சாரங்களைச் செய்பவர்களே மருத்துவமனைகளையும் நடத்துகிறார்கள். மேடையில் அற்புதங்களை நிகழ்த்துவதாகக் கூறும் மத போதகர்களுக்கு நோய் வரும்போது அவர்களும் மருத்துவமனைகளில்தான் சிகிச்சை பெறுகிறார்கள். இல்லாத ஒன்றை இருப்பதாகக் காட்டி மக்களை ஏமாற்றும் இத்தகைய போலிப் பிரச்சாரங்களை இஸ்லாம் ஒருபோதும் அனுமதிப்பதில்லை.

இஸ்லாத்தைப் பொறுத்தவரை ஒருவர் தன் மனதால் உணர்ந்து, சிந்தித்து, இதுதான் சரியான கொள்கை என்று விளங்கி ஏற்றுக்கொண்டால் மட்டுமே அவர் முஸ்லிமாக முடியும். ஒருவருக்குப் பணமோ, இலவச மருத்துவ சிகிச்சையோ, பள்ளி மற்றும் கல்லூரிக் கட்டணச் சலுகையோ அல்லது வேறு ஏதேனும் உலக ஆதாயங்களையோ வழங்கி மதம் மாற்றினால், இறைவனிடம் அவர் முஸ்லிமாக ஏற்றுக்கொள்ளப்பட மாட்டார். ஆதாயங்களைக் காட்டி மதமாற்றம் செய்வதற்கு இஸ்லாத்தில் தடை இருக்கிறது.

இஸ்லாமியப் பிரச்சாரம் என்பது மனிதனின் அறிவை நோக்கிப் பேசக்கூடியது. மார்க்கத்தின் கொள்கைகளைச் சிந்தித்துப் பார்த்து, சரியெனப்பட்டால் ஏற்றுக்கொள்ளுங்கள் என்றுதான் நாங்கள் கூறுகிறோம். இதற்காகப் பிரம்மாண்டமான மேடைகள் அமைத்து வித்தைகளைக் காட்டுவது, கையை அசைத்து மக்களை விழ வைப்பது, பேய்களை விரட்டுவதாக நாடகமாடுவது போன்ற செயல்களை நாங்கள் செய்வதில்லை. மாறாக, தனிநபர் சந்திப்புகள், துண்டுப் பிரசுரங்கள் மற்றும் பொதுக்கூட்டங்கள் மூலமாகவே உண்மையான கொள்கைகளை மக்களிடம் எடுத்துரைக்கிறோம்.

இவ்வாறு கொள்கைகள் அறிவுப்பூர்வமாக எடுத்துரைக்கப்படுவதன் காரணத்தினாலேயே, பலர் சிந்தித்துப் பார்த்து சுயமாக இஸ்லாத்தை ஏற்றுக்கொண்டு வருகிறார்கள். எனவே, இஸ்லாத்தில் பிரச்சாரம் நடக்கவில்லை என்பது தவறான பார்வை; பிறரை ஏமாற்றாமல், மார்க்கக் கொள்கைகளை மட்டும் அறிவுப்பூர்வமாக எடுத்துரைக்கும் பிரச்சாரமே இஸ்லாத்தில் செய்யப்படுகிறது.

மக்களை ஏமாற்றி உலக ஆதாயங்களின் அடிப்படையில் மதமாற்றம் செய்வதை இஸ்லாம் முற்றிலுமாக நிராகரிக்கிறது; சுயமாகச் சிந்தித்து, உண்மையை மனதார உணர்ந்து நேர்வழி அடைவதையே அது வலியுறுத்துகிறது.