எரிப்பது புதைப்பது எது நல்லதா ?

இறந்தவர்களின் உடலை எரிப்பது நல்லதா அல்லது அடக்கம் செய்வது நல்லதா என்ற விவாதத்தில், எரிப்பதனால் இடம் மிச்சமாகும் என்ற வாதம் முன்வைக்கப்படுகிறது. ஆனால் அந்த வாதம் முஸ்லிம்களுக்குப் பொருந்தாது. கிறிஸ்தவர்கள் ஒருவரை அடக்கம் செய்தால் அந்த இடத்தில் நிரந்தரமாகக் கல்லறை கட்டிவிடுகிறார்கள். அது பல ஆண்டுகளுக்கு அவருக்குரிய இடமாகவே நீடிப்பதால் அவர்களுக்குப் புதைப்பதற்கு அதிக இடம் தேவைப்படுகிறது. ஆனால் முஸ்லிம்களைப் பொறுத்தவரை கல்லறைகள் கட்டக் கூடாது.

ஒரு குறிப்பிட்ட பரப்பளவுள்ள மையவாடியில் வரிசையாக அடக்கம் செய்துகொண்டே சென்று, அது முடிந்ததும் மீண்டும் முதலிலிருந்து ஆரம்பிக்கலாம். அடக்கம் செய்யப்பட்டு சில வருடங்கள் கழித்து அந்த இடத்தை மீண்டும் தோண்டினால் உடல் மட்கி ஒன்றுமே இருக்காது என்பதால், அதே இடத்தில் அடுத்த உடலை அடக்கம் செய்துவிட முடியும். இவ்வாறு ஒரே இடத்தில் அடுத்தடுத்து ஆயிரக்கணக்கான உடல்களைக்கூட அடக்கம் செய்ய முடிகிறது. இறந்தவருக்கென்று நிரந்தரமாக இடத்தை ஒதுக்கி வைக்காதவரை இடப்பற்றாக்குறை என்ற பிரச்சனையே வராது.

பொருளாதார ரீதியாகப் பார்த்தாலும் அடக்கம் செய்வதே சிறந்தது. ஒரு மனித உடலை முழுமையாக எரித்து சாம்பலாக்க வேண்டுமென்றால், பாதி செங்கல் சூளை அளவுக்கு அதிகப்படியான விறகுகள் தேவைப்படுகின்றன. மின்சாரச் சுடுகாடாக இருந்தாலும் கூட உடலைச் சாம்பலாக்க பெருமளவு மின்சாரமும் எரிசக்தியும் செலவாகின்றன. ஆனால் அடக்கம் செய்வதற்கு குழி தோண்டி மண்ணைப் போட்டு மூடும் செலவு மட்டுமே தவிர, எந்தவித எரிபொருளும் வீணாவதில்லை. எனவே, பொருளாதார ரீதியாக அடக்கம் செய்வதே மிகவும் சிக்கனமானது.

சுகாதார ரீதியாகப் பார்த்தாலும் உடலை அடக்கம் செய்வதே சிறந்தது. உடலைத் தீயிலிட்டு எரிக்கும்போது அதிலிருந்து வெளிப்படும் நச்சுக்காற்றும் சாம்பல் துகள்களும் காற்றில் கலந்து, அப்பகுதியில் வசிப்பவர்கள் அதைச் சுவாசிக்க நேரிடுகிறது. இது மனித ஆரோக்கியத்திற்குப் பெரும் கெடுதியை ஏற்படுத்தும். ஆனால் மண்ணுக்குள் உடலை வைத்து மூடிவிட்டால் எந்தவிதமான நச்சுக்களும் வெளியே வராது.

மனிதாபிமான அடிப்படையிலும் உடலை அடக்கம் செய்வதே கண்ணியமானது. நம்மை வளர்த்து ஆளாக்கிய தந்தை போன்ற அன்பிற்குரிய ஒருவரது உடலை மண்ணுக்குள் வைக்கும்போது, அது நம் கண்களுக்குத் தெரியாமல் உள்ளுக்குள்ளேயே மட்கிப் போய்விடுகிறது. ஆனால் எரிக்கும்போது தீயின் வெப்பத்தால் நரம்புகள் இழுத்து உடல் அசைவதையும், மண்டை ஓட்டில் அடிப்பதையும் பார்ப்பது தாங்க முடியாத, மனிதாபிமானமற்ற ஒரு வேதனையான காட்சியாக இருக்கிறது.

இறந்த உடல்களை அடக்கம் செய்வதே பொருளாதார ரீதியாகச் சிக்கனமானது; சுகாதாரமானது; சுற்றுச்சூழலைப் பாதுகாப்பதுடன் மனிதாபிமானத்திற்கும் மிகவும் உகந்தது. நிரந்தரக் கல்லறைகள் கட்டாமல் உடல்களை அடக்கம் செய்யும் முறையைக் கையாண்டால் இடப்பற்றாக்குறை என்ற பேச்சிற்கே இடமிருக்காது.