எறும்புகளின் நிலத்தடி நகரங்கள்

ஒரு சிறிய எறும்பின் உடல் ஒரு அரிசி தானியத்தை விடச் சிறியது. அதன் மூளை ஒரு மணல் துகளை விடவும் மிகச் சிறியது; சுமார் 250,000 நியூரான்கள் மட்டுமே அதில் உள்ளன. ஆனால், லட்சக்கணக்கான எறும்புகள் ஒன்றாகச் சேரும்போது, அவை மனிதர்களின் சூப்பர் கம்ப்யூட்டரையே மிஞ்சும் அளவுக்கு வியக்கத்தக்க வேலைகளைச் செய்கின்றன.

எறும்புகளின் உலகில் எந்த ஒரு தலைவனும் கிடையாது. ராணி எறும்பு கூட கட்டளைகள் பிறப்பிப்பதில்லை; அது முட்டைகளை மட்டுமே இடுகிறது. ஆனாலும் ஒரு தலைமையோ அல்லது மையக் கட்டுப்பாடோ இல்லாமல் மொத்தக் கூட்டமும் கச்சிதமாக இயங்குவதை அறிவியல் உலகம் பரவலாக்கப்பட்ட கட்டுப்பாட்டு அமைப்பு (Decentralized Control System) என்று அழைக்கிறது. ஒரு தனி எறும்புக்குக் குறைந்த அறிவே இருந்தாலும், கூட்டமாகச் செயல்படும்போது அவை ஒரு தனி உயிரினம் போல மாறுகின்றன. இதனை உயிரியல் சூப்பர் ஆர்கானிசம் (Biological Superorganism) என்கிறோம்.

எறும்புகள் ஒன்றுடன் ஒன்று பேசி உத்தரவுகளைப் பிறப்பிப்பதில்லை. மாறாக, சுற்றுப்புறத்தில் மாற்றங்களை ஏற்படுத்தி அதன் மூலம் தொடர்பு கொள்கின்றன; இதற்கு ஸ்டிக்மெர்ஜி (Stigmergy) என்று பெயர். ஒரு எறும்பு மிட்டாய் துண்டையோ அல்லது சர்க்கரையையோ கண்டறிந்ததும், தன் புற்றுக்குத் திரும்பும் வழியில் தரையில் ஃபெரமோன்கள் (Pheromones) என்ற மணமுடைய வேதிப்பொருளைத் தூவிக்கொண்டே செல்கிறது. அந்த வாசனையை மோப்பம் பிடிக்கும் பிற எறும்புகளும் அதே பாதையைப் பின்பற்றுகின்றன. அதிக எறும்புகள் செல்லச் செல்ல, அந்தப் பாதையின் வாசனை மேலும் அடர்த்தியாகிறது. உணவு தீர்ந்துவிட்டால் எறும்புகள் செல்வது நின்றுவிடும்; வெயிலில் அந்த வேதிப்பொருள் ஆவியாகி மறைந்துவிடும். இதனால் தேவையற்ற பாதைகளில் பிற எறும்புகள் செல்வது தவிர்க்கப்படுகிறது.

கணினி அறிவியலாளர்கள் எறும்புகளின் இந்த உத்தியைப் பார்த்து வியந்து உருவாக்கியதுதான் எறும்பு காலனி மேம்படுத்தல் (Ant Colony Optimization – ACO) அல்காரிதம். கூகுள் மேப்ஸ் மிகக் குறுகிய மற்றும் நெரிசல் இல்லாத வழியைக் காட்டுவதற்கும், இணையத்தில் கோடிக்கணக்கான தகவல்கள் சரியான பாதையில் சென்று சேர்வதற்கும் இந்த எறும்பு அல்காரிதம்கள் உதவுகின்றன. வானில் நூற்றுக்கணக்கான ட்ரோன்கள் ஒன்றுடன் ஒன்று மோதிக்கொள்ளாமல் ஒரே வடிவில் பறப்பதற்கு இந்த திரள் நுண்ணறிவு (Swarm Intelligence) தான் அடிப்படை.

எறும்புகள் மண்ணுக்கு அடியில் அமைக்கும் புற்றுகள் பல அறைகளையும், காற்றோட்ட வசதிகளையும் கொண்டவை. ஒரு எறும்பின் அளவு வெறும் சில மில்லிமீட்டர்தான். ஆனால், அவை பூமிக்கு அடியில் அமைக்கும் சுரங்கங்கள் சுமார் 8 முதல் 25 அடி வரை ஆழம் கொண்டவை. ஒரு எறும்பின் உடலளவோடு அதன் சுரங்கப்பாதையின் ஆழத்தை ஒப்பிட்டுப் பார்த்தால், அது ஒரு மனிதன் உலகின் மிக உயரமான புர்ஜ் கலீஃபா கோபுரத்தைப் போல இரண்டு மூன்று மடங்கு ஆழத்திற்குச் சொந்தமாக ஒரு நகரத்தைக் குடைந்து உருவாக்குவதற்குச் சமம்.

எறும்புகள் தங்கள் நகரத்தில் வெப்பநிலை கட்டுப்பாடு (Thermoregulation) முறையை மிகத் துல்லியமாக நிர்வகிக்கின்றன. வெப்பமான காற்று தானாக வெளியேறும் வகையிலும், குளிர்ந்த காற்று உள்ளே வரும் வகையிலும் காற்றுப் பாதைகளை அமைக்கின்றன. இதனால் வெளிப்புறத்தில் கடுமையான வெயில் அடித்தாலும் அல்லது பனி கொட்டினாலும், நிலத்தடி அறைகளுக்குள் எப்போதும் சீரான வசதியான வெப்பநிலை நிலவுகிறது. மண்ணுக்குள் ஆக்சிஜன் குறையாமல் இருக்கவும், சரியான வெப்பநிலையைப் பராமரிக்கவும் அவை பிரத்யேகக் காற்றோட்டச் சுரங்கங்களை உருவாக்குகின்றன.

ஒரு நவீன அடுக்குமாடி குடியிருப்பில் இருப்பது போலவே, எறும்புப் புற்றிலும் ஒவ்வொரு தேவைக்கும் தனித்தனி அறைகள் உண்டு. முட்டைகள் மற்றும் புழுக்களைப் பராமரிக்கத் தகுந்த ஈரப்பதம் கொண்ட மழலையர் பள்ளி அறைகள், சேகரித்த தானியங்கள் கெட்டுப்போகாமல் பாதுகாக்க உலர்ந்த உணவுக் கிடங்கு அறைகள், நோய்த்தொற்று பரவாமல் இருக்கக் கழிவுகளையும் இறந்த எறும்புகளையும் ஒதுக்கி வைக்க மிகத் தொலைவில் பிரத்யேகக் கழிவு மேலாண்மை அறைகள் அமைக்கப்படுகின்றன.

எறும்புகள் மண்ணைத் தோண்டும்போது, சுவர்கள் இடிந்து விழாமல் இருக்க மண்ணின் துகள்களைத் தங்களின் உமிழ்நீரைக் கொண்டு பிணைத்து, இயற்கை தூண்களை உருவாக்குகின்றன. நிலத்தடி அதிர்வுகளையும் தாங்கும் இந்த கட்டமைப்புத் திட்டமிடல் (Structural Planning) அறிவியலாளர்களையே வியப்பில் ஆழ்த்துகிறது.

இவ்வளவு சிறிய மூளைக்குள் இத்தகைய பரவலாக்கப்பட்ட கணினி முறை மற்றும் ஒருங்கிணைப்பு விதிகள் இயற்கையாகவே பொதிந்திருப்பது இறைவனின் ஆற்றலையும் ஞானத்தையும் காட்டுகிறது. இந்தச் சிறிய உயிரினங்களின் வியக்கத்தக்க அமைப்பு, படைப்பாளனின் மகத்துவத்தை நமக்கு உணர்த்துகிறது.