பாலைவனக் கப்பல்: ஒட்டகத்தின் வியத்தகு தகவமைப்புகள்

பாலைவனக் கப்பல் என்று அழைக்கப்படும் ஒட்டகம், இயற்கையின் மிகச்சிறந்த ‘Biological Off-road Vehicle’ ஆகும். சுமார் 400 முதல் 600 கிலோ எடை வரையிலும், 7 அடி உயரம் வரையிலும் வளரக்கூடிய இந்த விலங்கின் உடலமைப்பு, பாலைவனத்தின் கடும் வெப்பத்தையும் வறட்சியையும் தாங்கும் வகையில் ஒரு அதிநவீன இயந்திரம் போல வடிவமைக்கப்பட்டுள்ளது.

பலரும் நினைப்பது போல ஒட்டகத்தின் திமில் நீரைச் சேமிப்பதில்லை. மாறாக, அது சுமார் 35 கிலோ வரை கொழுப்பைச் சேமித்து வைக்கிறது. இது ஒரு அவசர கால ஆற்றல் வங்கி (Emergency Power Bank) போன்றது. உணவும் தண்ணீரும் கிடைக்காத போது, உடல் இந்த கொழுப்பை ஆற்றலாகவும், நீராகவும் மாற்றிக்கொள்கிறது. இந்த நீரை வளர்சிதை மாற்ற நீர் (Metabolic water) என்று அழைக்கிறார்கள்.

மனிதர்களின் ரத்த அணுக்கள் வட்ட வடிவில் இருக்கும். ஆனால், ஒட்டகத்தின் ரத்த அணுக்கள் முட்டை வடிவில் நீள்வட்டமாக இருக்கும். கடுமையான நீரிழப்பு (Dehydration) ஏற்படும் போது ரத்தம் கெட்டியானாலும், இந்த வடிவத்தால் ரத்தக் குழாய்களில் எளிதாகப் பாய முடிகிறது. மேலும், தண்ணீர் கிடைக்கும் போது ஒரே நேரத்தில் சுமார் 100 முதல் 150 லிட்டர் தண்ணீரை வெறும் 10 நிமிடங்களில் குடித்துவிடும். இதன் ரத்த அணுக்கள் தங்களின் எடையை விட 240% அளவு பலூன் போல விரிவடையும் தன்மை கொண்டவை.

ஒட்டகம் மூச்சை வெளியே விடும்போது, அதன் நாசித் துவாரங்களில் உள்ள சிறப்பு சவ்வுகள் காற்றில் இருக்கும் ஈரப்பதத்தை உடனே உறிஞ்சித் திரவமாக மாற்றுகின்றன. இதனால் சுவாசத்தின் வழியே உடலில் இருந்து நீர் வீணாவது தடுக்கப்படுகிறது. இதன் கண்களில் இரண்டு அடுக்கு நீண்ட இமைகள் உள்ளன. மேலும், பக்கவாட்டில் நகரும் ஒரு மெல்லிய மூன்றாவது இமை (Nictitating Membrane) உண்டு. மணல் புயல் வீசும்போது, ஒரு கண்ணாடி வைசர் அல்லது நீச்சல் கண்ணாடியை (Swimming goggles) மாட்டிக்கொள்வது போல, இந்த மெல்லிய இமையை மூடிக்கொண்டே ஒட்டகத்தால் வழியைப் பார்க்க முடியும்.

ஒட்டகத்தின் பாதங்கள் ஒரு பெரிய தட்டு அல்லது அகலமான மணல் சக்கரம் (Sand Tire) போல இருக்கும். நடக்கும்போது பாதங்கள் விரிந்து எடையைப் பகிர்ந்தளிப்பதால், மணலில் கால் புதையாமல் எளிதாக வேகமாக நடக்க முடிகிறது. மனிதர்கள் உடலில் 10% முதல் 12% வரை நீர் இழப்பு ஏற்பட்டாலே ஆபத்தாகிவிடும். ஆனால், ஒட்டகங்கள் தங்கள் உடல் எடையில் 40% நீரை இழந்தாலும் எந்தவித உடல் பாதிப்பும் இன்றி சாதாரணமாக வாழக்கூடிய திறன் கொண்டவை.

இத்தகைய துல்லியமான தகவமைப்புகள் ஒட்டகத்தை பாலைவனத்தின் மிகச்சிறந்த உயிர்வாழும் பொறியியல் அற்புதமாக மாற்றுகின்றன. இவையனைத்தும் இறைவன் தனது படைப்புகளில் வைத்துள்ள அளப்பரிய ஞானத்தையும், ஆற்றலையும் நமக்கு உணர்த்துகின்றன.