விடைபெறும் ஹஜ்ஜில் இஹ்ராமை விட்ட தோழர்கள் — “செவியேற்று கீழ்ப்படிந்தோம்”

“இதை முன்பே அறிந்திருந்தால் குர்பானிப் பிராணியை நான் கொண்டுவந்திருக்கமாட்டேன்”

ஜாபிர் இப்னு அப்தில்லாஹ்(ரலி) அவர்கள் தம்முடன் இருந்த மக்களிடையே அறிவித்தார். (‘விடைபெறும்’ ஹஜ்ஜின்போது) இறைத்தூதர்(ஸல்) அவர்களின் தோழர்களான நாங்கள் உம்ராவைச் சேர்க்காமல் ஹஜ்ஜுக்காக மட்டும் இஹ்ராம் கட்டினோம். நபி(ஸல்) அவர்கள் துல்ஹஜ் மாதம் நான்காவது நாள் காலையில் (மக்கா) வந்து சேர்ந்தார்கள். நாங்கள் (உம்ரா முடித்து) வந்தவுடன் இஹ்ராமிலிருந்து விடும்படி எங்களுக்கு உத்தரவிட்ட நபி(ஸல்) அவர்கள், ‘இஹ்ராமிலிருந்து விடுபட்டுவிடுங்கள்; (உங்கள்) துணைவியருடன் தாம்பத்திய உறவு கொள்ளுங்கள்’ என்றார்கள்.

ஆனால், அதைக் கட்டாயமாகச் செய்தாக வேண்டும் என்று எங்களுக்குக் கட்டளையிடவில்லை. மாறாக, தாம்பத்திய உறவு கொள்ளலாம் என எங்களுக்கு அனுமதியளித்தார்கள். ‘நாம் அரஃபாவை அடைய இன்னும் ஐந்து நாட்களே உள்ள நிலையில் நம் துணைவியருடன் நாம் தாம்பத்திய உறவுகொள்ளும்படி நபியவர்கள் நமக்குக் கட்டளையிட்டார்களே! அப்படியானால், நாம் தாம்பத்திய உறவு கொண்ட கையோடா அரஃபா செல்ல வேண்டும்?’ என்று நாங்கள் பேசிக் கொள்வதாக நபி(ஸல்) அவர்களுக்குச் செய்தி எட்டியது.

—‘நாம் தாம்பத்திய உறவு கொண்ட கையோடா?’ என்று சொல்லும்போது ஜாபிர்(ரலி) அவர்கள், ‘இப்படி’ என்று சைகை செய்து கை அசைத்தார்கள். உடனே இறைத்தூதர்(ஸல்) அவர்கள் எழுந்து, ‘நானே உங்களில் அல்லாஹ்வுக்கு அதிகம் அஞ்சுபவனும், உங்களில் அதிகம் வாய்மையானவனும், உங்களில் அதிகமாக நற்செயல் புரிபவனும் ஆவேன் என்று நீங்கள் அறிந்துள்ளீர்கள். என்னுடைய குர்பானிப் பிராணி (என்னுடன்) இல்லாமலிருந்தால் உங்களைப் போன்றே நானும் இஹ்ராமிலிருந்து விடுபட்டிருப்பேன்.

எனவே, நீங்கள் இஹ்ராமிலிருந்து விடுபட்டுக் கொள்ளுங்கள். நான் பின்னால் தெரிந்து கொண்டதை முன்பே அறிந்திருந்தால் குர்பானிப் பிராணியை என்னுடன் கொண்டு வந்திருக்கமாட்டேன்’ என்றார்கள். எனவே, நாங்கள் இஹ்ராமிலிருந்து விடுபட்டோம். நபி(ஸல்) அவர்களின் கட்டளையைச் செவியேற்று கீழ்ப்படிந்தோம். 103

அறிவிப்பவர்: ஜாபிர் இப்னு அப்தில்லாஹ் (ரலி)

நூல் – (புகாரி: 7367) ➚

ஹஜ்ஜுக்காக மட்டும் இஹ்ராம் கட்டியவர்களிடம், உம்ரா முடித்து இஹ்ராமிலிருந்து விடுபடும்படி கட்டளை வந்தது. மனத்தில் தயக்கம் இருந்தது — அது இயற்கை. ஆனால் கட்டளை தெளிவானபோது அவர்கள் நின்றுவிடவில்லை.

நபி (ஸல்) அவர்களே தம் நிலையைச் சொன்னார்கள்: குர்பானிப் பிராணி உடன் இருப்பதால் அவர்களால் விடுபட முடியவில்லை; அது தெரிந்திருந்தால் அதைக் கொண்டுவந்திருக்கமாட்டார்கள். தலைவர் தன் சிரமத்தையும் மறைக்காமல் சொல்வதுதான் தோழர்களின் தயக்கத்தைக் கரைக்கிறது.

“செவியேற்று கீழ்ப்படிந்தோம்” — ஜாபிர் (ரலி) அவர்களின் இந்த முடிவுரை சாதாரணமானதல்ல. புரிதல் முழுமையாக வருவதற்கு முன்பே கீழ்ப்படிதல் வந்துவிடுகிறது. அதுவே தோழர்களை தோழர்களாக்கியது.