தர்மத்தின் சிறப்புகளும் ஒழுங்குகளும்
கண்ணியத்திற்குரிய சகோதர, சகோதரிகளே, எல்லாம் வல்ல அல்லாஹ்வின் நல்லடியார்களே! எல்லாம் வல்ல அல்லாஹ்வின் அருளும், அன்பும் நம் அனைவரின் மீதும் நிலவட்டுமாக என்று பிரார்த்தனை செய்தவனாக இந்த உரையை ஆரம்பிக்கிறேன்.
இந்த உலக வாழ்க்கைக்குச் செல்வம் தேவை என்பதால் இரவு பகலாக உழைத்துச் செல்வத்தைச் சேர்க்கிறோம். உழைத்துச் சம்பாதிப்பதை இஸ்லாம் ஒரு போதும் குறை கூறவில்லை. ஆனால் நாம் சம்பாதிக்கும் ஒவ்வொரு பொருளும் எல்லாம் வல்ல அல்லாஹ் நம்மிடம் ஒப்படைத்த அமானிதம் என்பதை மறந்து விடக் கூடாது.
நாம் பூட்டி வைத்துச் சேர்த்தவை அனைத்தும் இந்த உலகத்தோடு முடிந்து விடும். அல்லாஹ்வின் பாதையில் நாம் செலவிட்டவை மட்டுமே மறுமைக்காக நமக்கு முன்னால் சென்று சேரும். எனவே தான் தர்மத்தை இஸ்லாம் இவ்வளவு வலியுறுத்துகிறது.
தர்மம் செய்வோருக்கு அல்லாஹ் வாக்களித்துள்ள மகத்தான கூலிகள் என்ன, தர்மம் செய்யும் போது நாம் கடைப்பிடிக்க வேண்டிய ஒழுங்குகள் என்ன என்பதை இந்த உரையில் தெரிந்துக் கொள்வோம்.
தர்மம் செய்வோருக்குக் கிடைக்கும் கூலியை எல்லாம் வல்ல அல்லாஹ் ஓர் அழகிய உவமை மூலம் விளக்குகின்றான்.
“தமது செல்வங்களை அல்லாஹ்வின் பாதையில் செலவிடுவோருக்கு உதாரணம் ஒரு தானியம். அது ஏழு கதிர்களை முளைக்கச் செய்கிறது. ஒவ்வொரு கதிரிலும் நூறு தானியங்கள் உள்ளன. தான் நாடியோருக்கு அல்லாஹ் இன்னும் பன்மடங்காகக் கொடுக்கிறான். அல்லாஹ் தாராளமானவன்; அறிந்தவன்.”
ஒரு விதையை விதைத்தால் அதில் ஏழு கதிர்கள் முளைக்கின்றன. ஒவ்வொரு கதிரிலும் நூறு தானியங்கள் இருக்கின்றன. அதாவது ஒன்று எழுநூறாகப் பெருகுகிறது. நாம் கொடுப்பது சிறு தொகையாக இருந்தாலும் அல்லாஹ்விடம் அது இப்படிப் பன்மடங்காக வளர்கிறது.
அத்துடன் நிறுத்தி விடாமல், தான் நாடியோருக்கு இன்னும் அதிகமாகவும் வழங்குவதாக அல்லாஹ் கூறுகிறான். இது போன்ற லாபம் தரும் வியாபாரம் இந்த உலகில் வேறு எதுவும் இல்லை.
“நீங்கள் விரும்புவதிலிருந்து (நல்வழியில்) செலவிடாத வரை நன்மையை அடைந்து கொள்ளவே மாட்டீர்கள். நீங்கள் எப்பொருளை (நல்வழியில்) செலவிட்டாலும் அல்லாஹ் அதை அறிந்தவன்.”
பழைய துணிகளையும், நமக்குத் தேவையற்றுக் கிடக்கும் பொருட்களையும் கொடுத்து விட்டுப் பெரிய தர்மம் செய்து விட்டதாக நாம் எண்ணிக் கொள்கிறோம். ஆனால் நாம் நேசிக்கும் பொருளிலிருந்து கொடுக்கும் போது தான் உண்மையான நன்மையை அடைவோம் என்று அல்லாஹ் கூறுகிறான். நாம் எதைச் செலவிட்டாலும் அதை அல்லாஹ் அறிந்து கூலி தருகிறான்.
أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ وَهُوَ عَلَى المِنْبَرِ، وَذَكَرَ الصَّدَقَةَ، وَالتَّعَفُّفَ، وَالمَسْأَلَةَ: ” اليَدُ العُلْيَا خَيْرٌ مِنَ اليَدِ السُّفْلَى، فَاليَدُ العُلْيَا: هِيَ المُنْفِقَةُ، وَالسُّفْلَى: هِيَ السَّائِلَةُ
அப்துல்லாஹ் பின் உமர்(ரலி) கூறியதாவது. நபி(ஸல்) அவர்கள் மிம்பர் மீதேறி, தர்மம், சுயமரியாதை, யாசகம் ஆகியவற்றைப் பற்றி உபதேசம் செய்துவிட்டு, ‘உயர்ந்த கை தாழ்ந்த கையை விடச் சிறந்ததாகும்; உயர்ந்த கை என்பது தர்மம் செய்யக்கூடியதும்; தாழ்ந்த கை என்பது யாசிக்கக் கூடியது’ என்றும் கூறினார்கள்.
அறிவிப்பவர்: அப்துல்லாஹ் பின் உமர் (ரலி)
உயர்ந்த கை என்பது கொடுக்கும் கை; தாழ்ந்த கை என்பது வாங்கும் கை. கொடுப்பவரையே இஸ்லாம் உயர்ந்தவராகக் கருதுகிறது. எனவே பிறரிடம் கை ஏந்தும் நிலையை விட்டு, கொடுக்கும் கையாக உயர்வதற்கே ஒவ்வொருவரும் முயற்சி செய்ய வேண்டும்.
தர்மம் செய்தால் நமது செல்வம் குறைந்து விடுமோ என்ற அச்சம் பலருக்கு உண்டு. அந்த அச்சத்தை நபி(ஸல்) அவர்கள் அடியோடு அகற்றுகிறார்கள்.
«مَا نَقَصَتْ صَدَقَةٌ مِنْ مَالٍ، وَمَا زَادَ اللهُ عَبْدًا بِعَفْوٍ، إِلَّا عِزًّا، وَمَا تَوَاضَعَ أَحَدٌ لِلَّهِ إِلَّا رَفَعَهُ اللهُ»
அல்லாஹ்வின் தூதர் (ஸல்) அவர்கள் கூறினார்கள்: தர்மம் செல்வத்தைக் குறைப்பதில்லை. மன்னிப்பதால் ஓர் அடியாருக்கு அல்லாஹ் கண்ணியத்தையே அதிகப்படுத்துகிறான். அல்லாஹ்வுக்காக ஒருவர் பணிவு காட்டினால் அவரை அல்லாஹ் உயர்த்தாமல் இருப்பதில்லை. இதை அபூஹுரைரா (ரலி) அவர்கள் அறிவிக்கிறார்கள்.
அறிவிப்பவர்: அபூஹுரைரா (ரலி)
தர்மம் செல்வத்தைக் குறைக்காது என்று நபி(ஸல்) அவர்கள் உறுதியாகக் கூறுகிறார்கள். கணக்குப் படி பார்த்தால் கொடுத்தது குறைவது போலத் தோன்றினாலும், அல்லாஹ் அந்தச் செல்வத்தில் பரக்கத்தை அதிகமாக்குகிறான்.
“எனது இறைவன் தனது அடியார்களில் தான் நாடியோருக்குச் செல்வத்தைத் தாராளமாக வழங்குகிறான். அதை அளவோடும் கொடுக்கிறான். நீங்கள் எப்பொருளை (நல்வழியில்) செலவிட்டாலும் அவன் அதற்கான பிரதிபலனை அளிப்பான். அவன் வழங்குவோரில் சிறந்தவன் என்று கூறுவீராக!”
நாம் எதைச் செலவிட்டாலும் அதற்குப் பகரமாக அல்லாஹ் வேறு ஒன்றைத் தருகிறான். வழங்குவோரில் மிகச் சிறந்தவனாகிய அல்லாஹ்வே இந்த வாக்குறுதியைத் தருவதால், எந்த அச்சமும் இல்லாமல் நாம் தர்மம் செய்யலாம்.
مَا مِنْ يَوْمٍ يُصْبِحُ العِبَادُ فِيهِ، إِلَّا مَلَكَانِ يَنْزِلاَنِ، فَيَقُولُ أَحَدُهُمَا: اللَّهُمَّ أَعْطِ مُنْفِقًا خَلَفًا، وَيَقُولُ الآخَرُ: اللَّهُمَّ أَعْطِ مُمْسِكًا تَلَفًا
இறைத்தூதர்(ஸல்) அவர்கள் கூறினார்கள்: ஒவ்வொரு நாளும் இரண்டு வானவர்கள் இறங்குகின்றனர். அவ்விருவரில் ஒருவர், ‘அல்லாஹ்வே! தர்மம் செய்பவருக்குக் பிரதிபலனை அளித்திடுவாயாக!’ என்று கூறுவார். இன்னொருவர் அல்லாஹ்வே! (தர்மம் செய்யாமல் பொருளைத்) தடுத்து வைத்துக் கொள்பவர்களுக்கு அழிவை ஏற்படுத்துவாயாக!’ என்று கூறுவார். என அபூ ஹுரைரா(ரலி) அறிவித்தார்.
அறிவிப்பவர்: அபூ ஹுரைரா (ரலி)
ஒவ்வொரு நாள் காலையிலும் இரண்டு வானவர்கள் இறங்குகிறார்கள். ஒருவர் தர்மம் செய்வோருக்குப் பகரம் கொடுக்குமாறு பிரார்த்திக்கிறார். மற்றொருவர் கொடுக்காமல் இறுகப் பிடித்துக் கொள்வோருக்கு அழிவைத் தருமாறு பிரார்த்திக்கிறார். இந்த இரண்டு பிரார்த்தனைகளில் எதற்கு நாம் உரியவராக ஆவது என்பது நமது கையில் தான் இருக்கிறது.
“தர்மங்களை நீங்கள் வெளிப்படையாகச் செய்தால் அது நல்லதே. அதை(ப் பிறருக்கு) மறைத்து ஏழைகளுக்கு வழங்கினால் அது உங்களுக்கு மிகச் சிறந்தது. உங்கள் தீமைகளுக்கு (அல்லாஹ் இதைப்) பரிகாரமாக ஆக்குகிறான். நீங்கள் செய்வதை அல்லாஹ் நன்கறிந்தவன்.”
வெளிப்படையாகத் தர்மம் செய்வதும் நல்லதே. ஆனால் ஏழைகளுக்கு இரகசியமாகக் கொடுப்பது அதை விடச் சிறந்தது என்று அல்லாஹ் கூறுகிறான். இரகசியமாகக் கொடுக்கும் போது வாங்குபவரின் மானம் காக்கப்படுகிறது; கொடுப்பவரின் உள்ளத்தூய்மையும் காக்கப்படுகிறது. அத்துடன் அது நமது தீமைகளுக்குப் பரிகாரமாகவும் அமைகிறது.
سَبْعَةٌ يُظِلُّهُمُ اللَّهُ تَعَالَى فِي ظِلِّهِ يَوْمَ لاَ ظِلَّ إِلَّا ظِلُّهُ: إِمَامٌ عَدْلٌ، وَشَابٌّ نَشَأَ فِي عِبَادَةِ اللَّهِ، وَرَجُلٌ قَلْبُهُ مُعَلَّقٌ فِي المَسَاجِدِ، وَرَجُلاَنِ تَحَابَّا فِي اللَّهِ، اجْتَمَعَا عَلَيْهِ وَتَفَرَّقَا عَلَيْهِ، وَرَجُلٌ دَعَتْهُ امْرَأَةٌ ذَاتُ مَنْصِبٍ وَجَمَالٍ فَقَالَ: إِنِّي أَخَافُ اللَّهَ، وَرَجُلٌ تَصَدَّقَ بِصَدَقَةٍ فَأَخْفَاهَا حَتَّى لاَ تَعْلَمَ شِمَالُهُ مَا تُنْفِقُ يَمِينُهُ، وَرَجُلٌ ذَكَرَ اللَّهَ خَالِيًا، فَفَاضَتْ عَيْنَاهُ
இறைத்தூதர்(ஸல்) அவர்கள் கூறினார்கள்: தனது நிழலைத் தவிர வேறு நிழலே இல்லாத (மறுமை) நாளில் தன்னுடைய நிழலில் அல்லாஹ் ஏழு பேருக்கு மட்டும் நிழல் கொடுப்பான். அவர்கள்: நீதிமிக்க அரசன். அல்லாஹ்வின் வணக்கத்தில் திளைத்திருக்கும் இளைஞன். பள்ளிவாசல்களுடன் பிணைக்கப்பட்ட இதயத்தை உடையவன். அல்லாஹ்வுக்காகவே நேசித்து, அவனுக்காகவே ஒன்றிணைந்து, அவனுக்காகவே பிரிந்த இருவர், அழகும் அந்தஸ்தும் உள்ள ஒரு பெண் தன்னை (தவறுக்கு) அழைத்தபோது ‘நான் அல்லாஹ்வுக்கு பயப்படுகிறேன்’ எனக் கூறியவன். தன்னுடைய இடக்கரத்துக்குத் தெரியாமல் வலக் கரத்தால் இரகசியமாக தர்மம் செய்பவன், தனித்திருந்து அல்லாஹ்வை நினைத்து கூர்ந்து (அவனுடைய அச்சத்தால்) கண்ணீர் வடித்தவன் ஆகியோராவர். என அபூ ஹுரைரா(ரலி) அறிவித்தார்.
அறிவிப்பவர்: அபூ ஹுரைரா (ரலி)
வேறு எந்த நிழலும் இல்லாத மறுமை நாளில் அல்லாஹ் தனது நிழலில் இடம் தரும் ஏழு பேரில் ஒருவர், வலக்கை கொடுப்பது இடக்கைக்குத் தெரியாத அளவுக்கு மறைத்துத் தர்மம் செய்தவர் ஆவார். இரகசியமான தர்மத்திற்கு எத்தனை பெரிய மதிப்பு!
«اتَّقُوا النَّارَ وَلَوْ بِشِقِّ تَمْرَةٍ»
இறைத்தூதர்(ஸல்) அவர்கள் கூறினார்கள்: பேரீச்சம் பழத்தின் சிறு துண்டையேனும் (தர்மம்) செய்து நரகத்திலிருந்து (உங்களைப்) பாதுகாத்துக் கொள்ளுங்கள். என அதீ இப்னு ஹாத்திம்(ரலி) அறிவித்தார்.
அறிவிப்பவர்: அதீ இப்னு ஹாத்திம் (ரலி)
பேரீச்சம் பழத்தின் சிறு துண்டையேனும் தர்மம் செய்து நரக நெருப்பிலிருந்து தப்பித்துக் கொள்ளுங்கள் என்று நபி(ஸல்) அவர்கள் கூறுகிறார்கள். கொடுப்பது சிறியது என்பதற்காக எந்தத் தர்மத்தையும் தட்டிக் கழிக்கக் கூடாது. கொடுக்கும் மனமே அல்லாஹ்விடம் மதிப்புப் பெறுகிறது.
“நம்பிக்கை கொண்டோரே! அல்லாஹ்வையும், இறுதி நாளையும் நம்பாது மக்களுக்குக் காட்டுவதற்காக தனது செல்வத்தைச் செலவிடுபவனைப் போல், உங்கள் தர்மங்களைச் சொல்லிக் காட்டியும், தொல்லை தந்தும் பாழாக்கி விடாதீர்கள்! இவனுக்கு உதாரணம் மேலே மண் படிந்திருக்கும் வழுக்குப் பாறை. அதன் மேல் மழை விழுந்ததும் மேலே ஒன்றுமில்லாமல் ஆக்கி விடுகிறது. தாம் பாடுபட்ட எதன் மீதும் அவர்கள் சக்தி பெற மாட்டார்கள். (தன்னை) மறுக்கும் கூட்டத்திற்கு அல்லாஹ் நேர்வழி காட்ட மாட்டான்.”
செய்த உதவியைச் சொல்லிக் காட்டுவதும், வாங்கியவரை வார்த்தையால் நோவினை செய்வதும் தர்மத்தின் கூலியை அடியோடு அழித்து விடும். பிறருக்குக் காட்டுவதற்காகச் செய்யும் தர்மமும் இப்படியே வீணாகி விடும்.
அப்படிப்பட்டவரின் தர்மத்தை, மண் படிந்த வழுக்கைப் பாறையின் மீது பெரும் மழை பெய்ததற்கு அல்லாஹ் ஒப்பிடுகிறான். மழை நின்றதும் பாறையில் மண் ஒட்டாமல் போனது போல், அவர்கள் செய்த தர்மத்தில் எந்தப் பலனும் அவர்களுக்குக் கிடைக்காது.
“உங்களுக்கு மரணம் வருவதற்கு முன் நாம் உங்களுக்கு வழங்கியவற்றிலிருந்து (நல்வழியில்) செலவிடுங்கள்! “இறைவா! குறைந்த காலம் வரை எனக்கு நீ அவகாசம் அளித்திருக்கக் கூடாதா? தர்மம் செய்து நல்லவனாக ஆகியிருப்பேனே” என்று அப்போது (மனிதன்) கூறுவான்.”
மரணம் நெருங்கும் போது ஒவ்வொருவரும், என்னைச் சிறிது காலம் தாமதப்படுத்தக் கூடாதா, நான் தர்மம் செய்து நல்லோரில் ஆகி விடுவேனே என்று கெஞ்சுவார்கள். ஆனால் அந்த அவகாசம் யாருக்கும் தரப்படாது. உடலிலும் பொருளிலும் வசதி இருக்கும் இப்போதே தர்மம் செய்வதே அறிவுடைமை.
தர்மம் எழுநூறு மடங்காக வளர்கிறது; செல்வத்தை ஒரு போதும் குறைக்காது; வானவர்களின் பிரார்த்தனையையும் பெற்றுத் தருகிறது. எனவே நாம் விரும்புவதிலிருந்து, முடிந்த வரை இரகசியமாக, சொல்லிக் காட்டாமல், மரணம் வருவதற்கு முன்பே தர்மம் செய்வோம்.
எல்லாம் வல்ல அல்லாஹ் நம் அனைவரையும் வாரி வழங்கும் தாராள உள்ளம் கொண்ட நல்லடியார்களாக ஆக்கி அருள் புரிவானாக!
வாஆகிறு தஃவானா அனில்ஹம்துலில்லாஹி ரப்பில் ஆலமீன்.