மெத்தை வாங்கிய ஆயிஷா (ரலி) — வாசற்படியிலேயே நின்றுவிட்ட நபி (ஸல்)

“இந்த உருவப் படங்களை வரைந்தவர்கள் மறுமை நாளில் வேதனை செய்யப்படுவார்கள்”

நபி(ஸல்) அவர்களின் துணைவியாரான ஆயிஷா(ரலி) அறிவித்தார் நான் சிறியமெத்தை ஒன்றை விலைக்கு வாங்கினேன். அதில் உருவப் படங்கள் வரையப்பட்டிருந்தன. (வீட்டுக்கு வந்த) இறைத்தூதர்(ஸல்) அவர்கள் அதைக் கண்டதும் வாசற்படியிலேயே நின்றுவிட்டார்கள்; உள்ளே வரவில்லை. அவர்களின் முகத்தில் அதிருப்தியி(ன் அறிகுறி)யினை நான் அறிந்து கொண்டு, ‘இறைத்தூதர் அவர்களே! நான் அல்லாஹ்விடமும் அவனுடைய தூதரிடமும் மன்னிப்புக் கோருகிறேன். நான் என்ன குற்றம் செய்துவிட்டேன்?’

என்று கேட்டேன். அதற்கு இறைத்தூதர்(ஸல்) அவர்கள் , ‘இது என்ன மெத்தை?’ என்று கேட்டார்கள். அதற்கு நான், ‘தாங்கள் இதில் அமர்ந்துகொள்வதற்காகவும், தலை சாய்த்துக் கொள்வதற்காகவும் இதைத் தங்களுக்காகவே நான் விலைக்கு வாங்கினேன்” என்றேன். அப்போது இறைத்தூதர்(ஸல்) அவர்கள் , ‘இந்த உருவப் படங்களை வரைந்தவர்கள் மறுமைநாளில் வேதனை செய்யப்படுவார்கள். மேலும் அவர்களின் ‘நீங்கள் படைத்தவற்றுக்கு (நீங்களே) உயிர் கொடுங்கள்’ என (இறைவன் தரப்பிலிருந்து இடித்து)க் கூறப்படும்” என்று சொல்லிவிட்டு, ‘உருவப்படங்கள் உள்ள வீட்டில் நிச்சயமாக (இறைவனின் கருணையைக் கொண்டுவரும்) வானவர்கள் நுழைவதில்லை” என்று கூறினார்கள். 117

அறிவிப்பவர்: ஆயிஷா (ரலி)

நூல் – (புகாரி: 5181) ➚

நேசத்தோடும் நல்லெண்ணத்தோடும்தான் ஆயிஷா (ரலி) அந்த மெத்தையை வாங்கினார்கள் — நபி (ஸல்) அவர்கள் அமர்ந்து ஓய்வெடுக்கட்டும் என்பதே அவர்களின் நோக்கம். ஆனாலும் நோக்கம் நல்லதாக இருந்த மாத்திரத்தில் ஒரு தவறு சரியாகிவிடாது என்பதை நபி (ஸல்) அவர்களின் அமைதியான மறுப்பே காட்டுகிறது.

உருவப்படங்கள் உள்ள வீட்டில் வானவர்கள் நுழைவதில்லை என்று சேர்த்துச் சொன்னார்கள் நபி (ஸல்) அவர்கள். நம் வீடு வெறும் சுவர்களும் பொருள்களும் அல்ல; அதற்கென்று ஒரு தனி சூழல் இருக்கிறது. வெளியே நடக்கும் செயல்களைப் போலவே, நம் வீட்டிற்குள் நாம் கொண்டு வருவதும் அதே அளவு முக்கியம்.