மறுமை நாளில் ஆடு உருவில் கொண்டுவரப்பட்டு அறுக்கப்படும் மரணம்

“சொர்க்கவாசிகளே, நரகவாசிகளே! இனி நிரந்தரம்; மரணமே இல்லை”

அல்லாஹ்வின் தூதர் (ஸல்) அவர்கள் கூறினார்கள்: மறுமை நாளில் கறுப்பு வெள்ளை ஆடு ஒன்றின் தோற்றத்தில் மரணம் கொண்டுவரப்படும். பிறகு அதைச் சொர்க்கத்திற்கும் நரகத்திற்குமிடையே நிறுத்தப்படும் (என அபூகுறைப் (ரஹ்) அவர்களது அறிவிப்பில் கூடுதலாக இடம்பெற்றுள்ளது). பிறகு “சொர்க்கவாசிகளே! இது (என்னவென்று) உங்களுக்குத் தெரியுமா?” என்று கேட்கப்படும். அப்போது சொர்க்கவாசிகள் தலையைத் தூக்கிப் பார்ப்பார்கள். மேலும், “ஆம்; (தெரியும்) இதுதான் மரணம்” என்று பதிலளிப்பார்கள்.(அவர்கள் அனைவரும் அதை முன்பே பார்த்திருக்கிறார்கள்.)

பிறகு (நரகவாசிகளை நோக்கி), “நரகவாசிகளே! இது (என்னவென்று) உங்களுக்குத் தெரியுமா?” என்று கேட்கப்படும். அவர்களும் தலையைத் தூக்கிப் பார்த்துவிட்டு, “ஆம் (தெரியும்). இதுதான் மரணம்” என்று பதில் சொல்வார்கள். (அவர்கள் அனைவரும் அதை முன்பே பார்த்துள்ளனர்.) உடனே (இறைவனின்) கட்டளைக்கேற்ப அது (ஆட்டின் உருவத்திலுள்ள மரணம்) அறுக்கப் பட்டுவிடும். பிறகு “சொர்க்கவாசிகளே! நிரந்தரம்; இனி மரணமே இல்லை. நரகவாசிகளே! நிரந்தரம்; இனி மரணம் என்பதே இல்லை”என்று கூறப்படும்.

இதை அறிவித்த அபூசயீத் அல்குத்ரீ (ரலி) அவர்கள் கூறுகிறார்கள்: இதைக் கூறிவிட்டு அல்லாஹ்வின் தூதர் (ஸல்) அவர்கள், “(நபியே!) அவர்கள் எண்ணிப் பார்க்காமலும் நம்பிக்கை கொள்ளாமலும் இருக்கும் நிலையில் காரியம் முடிக்கப்பட்டு, துக்கம் ஏற்படும் அந்த நாளைப் பற்றி எச்சரிப்பீராக!” (19:39➚) எனும் இறைவசனத்தை ஓதிக்காட்டியவாறு தமது கரத்தால் இந்தப் பூமியை நோக்கி சைகை செய்தார்கள்.

அறிவிப்பவர்: அபூசயீத் அல்குத்ரீ (ரலி)

நூல் – (முஸ்லிம்: 5475) ➚

சொர்க்கத்திற்கும் நரகத்திற்கும் நடுவே நிறுத்தப்பட்டு, இருதரப்பாரும் அடையாளம் கண்டு உறுதிசெய்த பிறகே மரணம் அறுக்கப்படுகிறது. அந்தத் தருணத்திலிருந்து, துன்பத்திலிருந்தோ இன்பத்திலிருந்தோ தப்பிக்க இனி வழியே இல்லை என்பது இருதரப்பாருக்குமே முழுமையாகத் தெரிந்துவிடும். இன்று நாம் அனுபவிக்கும் ஒவ்வொரு துன்பமும் மரணத்துடன் முடிந்துவிடும் என்ற நம்பிக்கை இருக்கிறது; அன்று அந்த வாயில் என்றென்றைக்கும் மூடப்படும்.

இதைச் சொல்லிவிட்டு இந்த உலகத்தையே நோக்கிச் சைகை செய்தார்கள் நபி (ஸல்) அவர்கள் — இப்போதே கவனிக்காமல் இருந்தால், அன்று வருந்தும் நாளாக மாறிவிடும் என்பதை உணர்த்தவே. அந்த வருத்தம் நமக்கு வராமல் இருக்க, இன்றே நம் நிலையை நேர்மையாக ஆராய்ந்துகொள்வோம்.