நபி (ஸல்) தலைக்கு மேல் நடக்கக் கூடாதென மாடி விட்டிறங்கிய அபூஅய்யூப் (ரலி)

“தாங்கள் வெறுப்பதை அல்லது தாங்கள் வெறுத்ததை நானும் வெறுக்கிறேன்”

அபூஅய்யூப் (ரலி) அவர்கள் கூறியதாவது: நபி (ஸல்) அவர்கள் (மக்காவிலிருந்து மதீனாவுக்கு வந்தபோது) எனது வீட்டிலேயே தங்கினார்கள். நபி (ஸல்) அவர்கள் கீழ்த்தளத்திலும் நான் மேல்தளத்திலும் தங்கியிருந்தோம். ஓர் இரவில் நான் உணர்வு பெற்று, “நாம் அல்லாஹ்வின் தூதர் (ஸல்) அவர்களது தலைக்கு மேலே நடமாடுவதா?” என்று சொல்லிக்கொண்டு, (தலைக்கு நேரான பகுதியிலிருந்து) விலகி மற்றொரு பகுதியில் (நானும் வீட்டாரும்) இரவைக் கழித்தோம். பிறகு நபி (ஸல்) அவர்களிடம் (இது குறித்துச்) சொன்னபோது அவர்கள், “கீழ்த்தளமே மிகவும் வசதியானது” என்று கூறினார்கள்.

நான், “நீங்கள் கீழேயிருக்க நான் மேல்தளத்தில் இருக்கமாட்டேன்” என்று சொன்னேன். எனவே, நபி (ஸல்) அவர்கள் மேல் தளத்துக்கும் நான் கீழ்த் தளத்துக்கும் இடம் மாறிக்கொண்டோம். நான் நபி (ஸல்) அவர்களுக்காக உணவு தயாரித்துவந்தேன். அது (நபி (ஸல்) அவர்களிடம் சென்றுவிட்டு) என்னிடம் கொண்டுவரப்பட்டால், (உணவுப் பாத்திரத்தில்) நபி (ஸல்) அவர்களின் விரல்கள்பட்ட இடத்தைப் பற்றிக் கேட்பேன். அவர்களின் விரல்கள் பட்ட இடத்தைக் கண்டறி(ந்து அந்த இடத்தில் நான் சாப்பிடு)வேன்.

இவ்வாறே (ஒரு நாள்) வெள்ளைப் பூண்டு உள்ள ஓர் உணவு தயாரித்தேன். (நபி (ஸல்) அவர்களிடம் சென்றுவிட்டு) அது திருப்பிக் கொண்டுவரப்பட்டபோது, நபி (ஸல்) அவர்களின் விரல்கள் பட்ட இடத்தைப் பற்றிக் கேட்டேன். அப்போது “நபி (ஸல்) அவர்கள் அதை உண்ணவில்லை” என்று என்னிடம் சொல்லப்பட்டது. அதைக் கேட்டு நான் பதறினேன். மேல் தளத்திற்கு ஏறிச்சென்று “அது (வெள்ளைப் பூண்டு) தடைசெய்யப்பட்டதா?” என்று கேட்டேன். அதற்கு நபி (ஸல்) அவர்கள், “இல்லை. ஆயினும், அதை நான் விரும்பவில்லை” என்று பதிலளித்தார்கள்.

நான், “அவ்வாறாயின், தாங்கள் வெறுப்பதை அல்லது தாங்கள் வெறுத்ததை நானும் வெறுக்கிறேன்” என்று சொன்னேன். நபி (ஸல்) அவர்களிடம் (வானவர்களும் வேத அறிவிப்பும்) வந்துகொண்டிருந்தன.

அறிவிப்பவர்: அபூஅய்யூப் (ரலி)

நூல் – (முஸ்லிம்: 4174) ➚

நபி (ஸல்) அவர்களை நேசித்த அளவுக்கு, அவர்களுடைய விருப்பு வெறுப்புகளையும் தன் சொந்த விருப்பாக மாற்றிக் கொண்டார்கள் அபூஅய்யூப் (ரலி). நேசிப்பவர் விரும்புவதைத் தானும் விரும்பவும், அவர் தவிர்ப்பதைத் தானும் தவிர்க்கவும் முன்வருவதிலேயே உண்மையான அன்பு வெளிப்படுகிறது.

தலைக்கு மேல் நடப்பதைக் கூடத் தாங்கிக்கொள்ள முடியாத அளவு நபி (ஸல்) அவர்கள் மீது அபூஅய்யூப் (ரலி) கொண்டிருந்த மரியாதை, விருந்தினரை உபசரிப்பதில் நாம் எத்தனை நுணுக்கமாக நடந்துகொள்ள வேண்டும் என்பதைக் கற்பிக்கிறது.