“இவர்கள் என் தோழர்கள்” என்ற நபிக்கு, “மார்க்கம் மாறியவர்கள்” என வந்த பதில்

“இறைவா, இவர்கள் என் தோழர்கள்!” — “நீ பிரிந்ததிலிருந்து திரும்பிச் சென்றுவிட்டார்கள்” என்ற பதில்

இறைத்தூதர்(ஸல்) அவர்கள், ‘நீங்கள் (மறுமை நாளில்) காலில் செருப்பணியாதவர்களாகவும், நிர்வாணமானவர்களாகவும் விருத்தசேதனம் செய்யப்படாதவர்களாகவும் எழுப்பப்படுவீர்கள்’ என்று கூறிவிட்டு, பிறகு, ‘எழுதப்பட்ட ஏடு சுருட்டப்படுவதைப் போல் நாம் வானத்தை சுருட்டும் அந்நாளில், நாம் முதலில் எவ்வாறு படைக்கத் தொடங்கினோமோ அவ்வாறே நாம் மீட்டுவோம். இது நம்முடைய பொறுப்பிலுள்ள ஒரு வாக்குறுதியாகும. அதனை நாம் நிறைவேற்றியே தீருவோம்’ என்னும் (அல்குர்ஆன்: 21:104)➚ இறைவசனத்தை ஓதினார்கள்.

முதலாவதாக ஆடை அணிவிக்கப்படுபவர்கள் இப்ராஹீம்(அலை) அவர்கள் ஆவார்கள். பிறகு, என் தோழர்களில் சிலர் (சொர்க்கத்திற்காக) வலப்பக்கமும், (சிலர் நரகத்திற்காக) இடப்பக்கமும் கொண்டு செல்லப்படுவார்கள். நான், ‘இவர்கள் என் தோழர்கள்’ என்று கூறுவேன். ‘இவர்களை விட்டு நீங்கள் பிரிந்ததிலிருந்து இவர்கள், தம் கால் சுவடுகளின் வழியே (எங்கிருந்து) வந்தார்களோ அந்த மதத்திற்குத்) திரும்பிச் சென்று கொண்டிருந்தார்கள்’ என்று சொல்லப்படும். அதற்கு நான் நல்லடியாரான மர்யமின் மகன் ஈசா(அலை) அவர்கள் சொன்னதைப் போன்றே, ‘(இறைவா!)

நான் இவர்களிடையே (உயிருடன்) வாழ்ந்து வந்த வரை நான் இவர்களைக் கண்காணித்துக் கொண்டிருந்தேன். நீ என்னைத் திரும்ப அழைத்தபோது நீயே இவர்களைக் கண்காணிப்பவனாகிவிட்டாய். ஒவ்வொரு விஷயத்தையும் நீ பார்த்துக் கொண்டிருக்கிறாய். நீ அவர்களைத் தண்டித்தாலும் அவர்கள் உன் அடிமைகள் தாம். (அதற்கும் உனக்கும் முழு உரிமையுண்டு.) அவர்களை நீ மன்னித்துவிட்டால் (அது உன் கருணையாகும். ஏனெனில்,) நீ வல்லோனும் விவேகம் மிக்கோனும். ஆவாய்’ (அல்குர்ஆன்:)➚, 118) என்று சொல்வேன்.

என இப்னு அப்பாஸ்(ரலி) அறிவித்தார். கபீஸா இப்னு உக்பா(ரஹ்) கூறினார்: தம் கால் சுவடுகளின் வழியே (பழைய மதத்திற்குத்) திரும்பிச் சென்றவர்கள் யாரெனில், அபூ பக்ர்(ரலி) அவர்களின் காலத்தில் மதமாறியவர்கள் தாம்! அபூ பக்ர்(ரலி) (போராடி) அவர்களை வீழ்த்திவிட்டார்கள்.

அறிவிப்பவர்: இப்னு அப்பாஸ் (ரலி)

நூல் – (புகாரி: 3447) ➚

மறுமை நாளில் நபி (ஸல்) அவர்களே தம் தோழர்கள் என அடையாளம் காட்டிய சிலரைப் பற்றி, அவர்கள் நபிக்குப் பின் மார்க்கத்தை விட்டு விலகிவிட்டார்கள் என்று பதில் வருகிறது. இது நமக்கு அச்சுறுத்தும் ஒரு உண்மையைச் சொல்கிறது — நபியைப் பார்த்திருந்தது மட்டும், அவருடன் பழகியிருந்தது மட்டும் யாரையும் காப்பாற்றிவிடாது; கடைசி வரை நிலைத்திருப்பதே முக்கியம்.

இன்று நாம் பிறந்தே முஸ்லிமாக இருக்கலாம், தொடர்ந்து பள்ளிக்குச் செல்பவராக இருக்கலாம். ஆனால் இந்தச் சம்பவம் கேட்பது ஒரே கேள்விதான் — கடைசி மூச்சு வரை மார்க்கத்தில் மாறாமல் இருப்போமா? தொடங்கிய இடத்தில் நிற்பது பெரிய விஷயமல்ல; முடியும் இடம் வரை நேர்மையாக நடப்பதே உண்மையான வெற்றி.