இரு ஆண் பிள்ளைகளை இழந்த தந்தைக்கு அபூஹுரைரா (ரலி) சொன்ன ஆறுதல்

“தன் தந்தையின் ஆடையைப் பிடித்துக்கொள்ளும் அந்தச் சிறு பிள்ளை — இருவரையும் சொர்க்கத்திற்குள் கொண்டுசெல்லும் வரை விடாது”

அபூஹஸ்ஸான் (முஸ்லிம் பின் அப்தில்லாஹ் – ரஹ்) அவர்கள் கூறியதாவது: நான் அபூஹுரைரா (ரலி) அவர்களிடம், “என்னுடைய ஆண் குழந்தைகள் இருவர் இறந்துவிட்டனர். நாங்கள் இழந்துவிடும் குழந்தைகள் தொடர்பாக எங்கள் உள்ளங்களுக்கு ஆறுதல் அளிக்கும் வகையில் அல்லாஹ்வின் தூதர் (ஸல்) அவர்கள் சொன்ன ஹதீஸ் ஒன்றை எனக்கு நீங்கள் அறிவிக்கக் கூடாதா?” என்று கேட்டேன். அபூஹுரைரா (ரலி) அவர்கள் “ஆம்” என்று கூறிவிட்டு, “குழந்தைகள், சொர்க்கத்தின் நுண்ணுயிர்கள் ஆவர்.அக்குழந்தைகளில் ஒன்று தனது தந்தையை, அல்லது பெற்றோரைச் சந்திக்கும்போது அவரது ஆடையை, அல்லது அவரது கையைப் பிடித்துக்கொள்ளும்.

-(அபூஹஸ்ஸானே!) நான் உங்களுடைய இந்த ஆடையின் ஓரத்தைப் பிடித்துக் கொண்டிருப்பதைப் போன்று- பிறகு தன்னையும் தன் பெற்றோரையும் அல்லாஹ் சொர்க்கத்திற்குள் நுழைவிக்கும்வரை விடாது; அல்லது விலகாது” என்று சொன்னார்கள். இந்த ஹதீஸ் மூன்று அறிவிப்பாளர் தொடர்களில் வந்துள்ளது. அவற்றில் சுவைத் பின் சயீத் (ரஹ்) அவர்களது அறிவிப்பில், “நாங்கள் இழந்துவிடும் குழந்தைகள் தொடர்பாக எங்கள் உள்ளங்களுக்கு ஆறுதல் அளிக்கும் வகையில் தாங்கள் அல்லாஹ்வின் தூதர் (ஸல்) அவர்களிடமிருந்து ஏதேனும் செவியுற்றீர்களா?” என்று கேட்டார்கள். அதற்கு அபூஹுரைரா (ரலி) அவர்கள் “ஆம் என்றார்கள்” என இடம் பெற்றுள்ளது.

அறிவிப்பவர்: அபூஹுரைரா (ரலி)

நூல் – (முஸ்லிம்: 5132) ➚

இரு பிள்ளைகளை இழந்த அந்தத் தந்தை கேட்டது ஒரு உபதேசத்தை அல்ல, தன் நெஞ்சுக்கு ஆறுதல் தரும் ஒரு வார்த்தையை. அபூஹுரைரா (ரலி) அவர்களும் அவரை வெறுங்கையோடு அனுப்பவில்லை; வருத்தத்தைப் புறக்கணிக்காமல், அந்த வலியை மென்மையாகத் தாங்கும் ஒரு உண்மையை அவரிடம் ஒப்படைத்தார்கள்.

தன் ஆடையின் ஓரத்தைப் பிடித்துக் காட்டி அபூஹுரைரா (ரலி) அவர்கள் விவரித்த அந்தச் சிறு காட்சி, வெறும் வார்த்தைகளை விட ஆழமாக நெஞ்சில் பதிகிறது. பிள்ளையை இழந்த பெற்றோரின் இரவுகளை, விடாப்பிடியாகப் பிடித்திருக்கும் அந்தச் சிறு கை உருவம்தான் தாங்கிநிற்க வைக்கும்.