சிறுநீரகத்தின் வியத்தகு சுத்திகரிப்பு ஆலை

நமது உடலில் அவரை விதை வடிவில் இரண்டு சிறுநீரகங்கள் (Kidneys) முதுகுத்தண்டின் இருபுறமும் அமைந்துள்ளன. இவை நமது உடலுக்குள் இடைவிடாது இயங்கும் ஓர் அற்புதமான உயிரியல் சுத்திகரிப்பு ஆலை (Biological Filtration and Purification Plant) ஆகும். ஒரு சிறுநீரகம் சுமார் 10 முதல் 12 சென்டிமீட்டர் நீளமும், 130–150 கிராம் எடையும் கொண்டது. உங்கள் கையை இறுக்கமாக மூடினால் எவ்வளவு இருக்குமோ அல்லது நீங்கள் பயன்படுத்தும் ஒரு கணினி மவுஸ் (Computer Mouse) அளவுக்குத்தான் இதன் உருவம் இருக்கும்.

நமது உடலில் சுமார் 5 லிட்டர் இரத்தம் மட்டுமே உள்ளது. ஆனால், இந்த இரண்டு சிறுநீரகங்களும் ஒரு நாளைக்குச் சுமார் 180 லிட்டர் இரத்தத்தை வடிகட்டுகின்றன. அதாவது, நமது உடலின் மொத்த இரத்தமும் ஒரு நாளைக்கு 30 முதல் 50 முறை சிறுநீரகங்களுக்குள் சென்று தூய்மைப்படுத்தப்படுகிறது. வடிகட்டிய திரவத்தில் 99% பயனுள்ள நீரை உடலிலேயே தக்கவைத்துவிட்டு, வெறும் 1.5 முதல் 2 லிட்டர் கழிவு நீரை மட்டுமே சிறுநீராக வெளியேற்றுகிறது.

ஒவ்வொரு சிறுநீரகத்திற்குள்ளும் நெப்ரான்கள் (Nephrons) எனப்படும் சுமார் 10 லட்சம் நுண்ணிய வடிகட்டி அலகுகள் உள்ளன. இவை ஒரு நுண்ணிய தேநீர் வடிகட்டி போலச் செயல்படுகின்றன. இரத்தம் சிறுநீரகத்திற்குள் ரீனல் தமனி (Renal Artery) வழியாக வரும்போது, நெப்ரானின் தொடக்கத்தில் உள்ள குளோமருலஸ் (Glomerulus) என்ற வலைப்பின்னல் போன்ற பகுதி நச்சுக்களையும் அதிகப்படியான நீரையும் பிரிக்கிறது.

இது ஒரு ‘Smart Recycling’ முறை போன்றது: வடிகட்டிய கழிவுகளில் உடலுக்குத் தேவையான குளுக்கோஸ் (Glucose), அமினோ அமிலங்கள் (Amino acids), அத்தியாவசிய தாதுக்கள் (Minerals) இருந்தால், ரீனல் குழாய் (Renal Tubule) வழியாக இரத்தம் செல்லும்போது அவற்றை மட்டும் மீண்டும் உறிஞ்சி இரத்தத்திற்கே அனுப்பிவிடும். உடலுக்குத் தேவையில்லாத யூரியா (Urea), யூரிக் அமிலம் மற்றும் அதிகப்படியான நீர் மட்டும் சிறுநீராக (Urine) மாறி சிறுநீர்க்குழாய் (Ureter) வழியாகச் சிறுநீர்ப்பையை (Urinary Bladder) அடைகிறது. சுத்திகரிக்கப்பட்ட நல்ல இரத்தம் ரீனல் சிறை (Renal Vein) வழியாக மீண்டும் உடலின் சுழற்சிக்குத் திரும்புகிறது.

வீடுகளில் இருக்கும் பெரிய ரிவர்ஸ் ஆஸ்மோசிஸ் (Reverse Osmosis – RO) இயந்திரம் தண்ணீரை மட்டுமே சுத்திகரிக்கும்; ஆனால் இந்தச் சிறிய உறுப்புகள் பல வேலைகளை ஒரே நேரத்தில் செய்கின்றன. ரெனின் (Renin) போன்ற ஹார்மோன்களைச் சுரந்து இரத்த அழுத்தத்தை சீராக வைக்கிறது. இரத்தத்தில் சோடியம், பொட்டாசியம் மற்றும் அமிலத் தன்மையை மிகச் சரியான அளவில் பராமரித்து, கார-அமில சமநிலையை (Acid-Base & Electrolyte Balance) நிலைநிறுத்துகிறது. மேலும், எலும்பு மஜ்ஜை புதிய இரத்தச் சிவப்பணுக்களை உருவாக்கத் தூண்டும் எரித்ரோபொய்ட்டின் (Erythropoietin) ஹார்மோனை உற்பத்தி செய்கிறது.

சிறுநீரகங்கள் செயலிழந்தால், இரத்தத்தைச் சுத்திகரிக்க மருத்துவமனைகளில் பெரிய டயாலிசிஸ் (Dialysis) இயந்திரங்களின் உதவி தேவைப்படுகிறது. ஆனால், உள்ளங்கைக்குள் அடங்கும் இந்தச் சிறு உறுப்பு எந்தவித இயந்திர ஓசையுமின்றி வாழ்நாள் முழுவதும் நம்மை ஆரோக்கியமாகப் பாதுகாக்கிறது. இந்தச் சிறுநீரகத்தின் வியத்தகு செயல்பாடுகள் மனித உடலின் மாபெரும் பொறியியல் அற்புதம்.