உடலின் ஆற்றல் தொழிற்சாலை: ஏ.டி.பி சின்தேஸ்

நமது உடலின் ஒவ்வொரு செல்லிலும் மைட்டோகாண்ட்ரியா (Mitochondria) என்ற ஆற்றல் மையம் உள்ளது. இந்த மைட்டோகாண்ட்ரியாவின் உள் சவ்வில் ஏ.டி.பி சின்தேஸ் (ATP Synthase) என்ற ஒரு மிகச் சிறிய நானோ மோட்டார் (Nano Motor) அமைந்துள்ளது. இது உயிரியல் உலகின் மிகச் சிறிய, ஆனால் அதிவேகமாக இயங்கும் ஒரு இயந்திரமாகும்.

இந்த என்சைமின் அகலம் வெறும் 10 நானோமீட்டர் (Nanometers) மட்டுமே. நமது தலையில் உள்ள ஒரு தலைமுடியின் தடிமன் சுமார் 80,000 முதல் 1,00,000 நானோமீட்டர் இருக்கும். அதாவது, ஒரு தலைமுடியை விட 8,000 முதல் 10,000 மடங்கு சிறிய இடத்தில் இந்த அதிநவீன மோட்டார் இயங்குகிறது.

இதன் செயல்பாட்டை ஒரு நீர்மின் நிலையத்துடன் ஒப்பிடலாம். அணையில் தேக்கி வைக்கப்பட்டுள்ள தண்ணீரைப் போல, மைட்டோகாண்ட்ரியல் சவ்வின் ஒரு பக்கத்தில் புரோட்டான்கள் (H+ அயனிகள்) அதிக அழுத்தத்துடன் குவிகின்றன. அணை மதகைத் திறக்கும்போது பாயும் தண்ணீர் டர்பைனைச் சுழற்றுவது போல, இந்த புரோட்டான்கள் பாயும்போது மோட்டாரின் மைய அச்சான ரோட்டர் (Rotor) பகுதியைச் சுழற்றுகின்றன. மோட்டாரைச் சுற்றி உள்ள ஸ்டேட்டர் (Stator) பகுதி அது நகராமல் நிலையாகப் பிடித்துக் கொள்கிறது.

இந்த இயந்திரச் சுழற்சி ஆற்றலானது, தீர்ந்துபோன பேட்டரி போன்ற ஏ.டி.பி (Adenosine Diphosphate) மற்றும் பாஸ்பேட்டை (Phosphate – Pi) ஒன்றாக இணைத்து, முழு ஆற்றல் கொண்ட ஏ.டி.பி (Adenosine Triphosphate) என்ற வேதி ஆற்றலாக மாற்றுகிறது. இந்த நானோ மோட்டார் ஒரு வினாடிக்கு சுமார் 130 முதல் 150 முறை சுழல்கிறது. ஒரு வினாடியில் மட்டும் இது சுமார் 450 ஏ.டி.பி மூலக்கூறுகளை உற்பத்தி செய்கிறது.

மனிதன் உருவாக்கிய அதிநவீன மின்சார மோட்டார்கள் 40% முதல் 50% ஆற்றலை வெப்பமாக வீணடிக்கின்றன. ஆனால், இந்த இயற்கை நானோ மோட்டார் உராய்வே இன்றி கிட்டத்தட்ட 100% செயல்திறனுடன் இயங்குகிறது. நாம் ஓடுவது, சிந்திப்பது, இதயம் துடிப்பது என எல்லாவற்றிற்கும் இந்த ஏ.டி.பி பேட்டரிகளே காரணம். ஒரு நாளில் நமது ஒட்டுமொத்த உடல் எடைக்குச் சமமான அளவுக்கு ஏ.டி.பி-ஐ இந்த சிறிய மோட்டார்கள் உற்பத்தி செய்து மறுசுழற்சி செய்கின்றன.

இந்த நானோ மோட்டாரின் இயக்கம் சில நிமிடங்கள் நின்றால்கூட நமது செல்களுக்கு ஆற்றல் கிடைக்காமல் உடல் இயக்கம் முற்றிலும் நின்றுவிடும். இயற்கையின் தலைசிறந்த உயிரியல் பொறியியல் அற்புதங்களில் இதுவும் ஒன்று.

இத்தகைய நுட்பமான, சிக்கலான, ஆனால் மிகச் சிறப்பாகச் செயல்படும் ஒரு அமைப்பை மனித உடலில் படைத்த இறைவனின் ஆற்றலையும் ஞானத்தையும் எண்ணிப் பாருங்கள். நம்மைச் சுற்றியுள்ள ஒவ்வொரு படைப்பிலும் அவனது வல்லமையின் அடையாளங்கள் நிறைந்துள்ளன.