இறுதிக் காலத்தில் கஅபா இடிக்கப்படுமா?
மறுமையின் பத்தாவது அடையாளமாக கஅபா இடித்துத் தரைமட்டமாக்கப்படும் என்பது உண்மையா? இதற்கு ஆதாரப்பூர்வமான ஹதீஸ் உள்ளதா?
பதில்
நாங்கள் உரையாடிக் கொண்டிருக்கும் போது எங்களிடம் நபிகள் நாயகம் (ஸல்) அவர்கள் வந்தார்கள். நீங்கள் என்ன உரையாடிக் கொண்டிருக்கின்றீர்கள்? என்று கேட்டார்கள். இறுதி நாளைப் பற்றி உரையாடிக் கொண்டிருந்தோம் என்ற நாங்கள் கூறினோம். அதற்கு நபிகள் நாயகம் (ஸல்) அவர்கள், “அதற்கு முன்னால் பத்து அடையாளங்களை நீங்கள் காணும் வரை அது ஏற்படாது, 1. புகை, 2. தஜ்ஜால், 3. அதிசய மிருகம், 4. சூரியன் மேற்கிலிருந்து உதித்தல், 5. ஈஸா (அலை) இறங்குதல், 6. யஃஜூஜ் மஃஜூஜ், 7,8,9. கிழக்கு, மேற்கு மற்றும் அரபிய தீபகற்பத்தில் ஏற்படும் மூன்று பூகம்பங்கள், 10. இவற்றில் இறுதியாக யமனிலிருந்து மக்களை அவர்களது மறுமையின் பக்கம் துரத்திச் செல்லும் நெருப்பு ஆகியவை ஆகும்” என்று கூறினார்கள்.
அறிவிப்பவர் : ஹுதைஃபா பின் உஸைதுல் கிஃபாரி (ரலி)
கியாமத் நாளின் பத்து அடையாளங்களைக் குறிப்பிடும் ஹதீஸ் இது தான். இந்தப் பத்து அடையாளங்களில் கஅபா இடிக்கப்படுவது குறிப்பிடப்படவில்லை.
எனினும் கஅபா இடிக்கப்படும் என்று தனியாக ஹதீஸ்கள் உள்ளன.
“அபிஸீனியாவைச் சேர்ந்த மெலிந்த கால்களைக் கொண்ட மனிதர்கள் கஅபாவை இடித்து பாழ்படுத்துவார்கள்” என்று அல்லாஹ்வின் தூதர் (ஸல்) அவர்கள் கூறினார்கள்.
அறிவிப்பவர் : அபூஹுரைரா (ரலி)
“(வெளிப்பக்கமாக) வளைந்த கால்களையுடைய கருப்பு நிறத்தவர்கள் ஒவ்வொரு கல்லாகப் பிடுங்கி கஅபாவை உடைப்பதை நான் பார்ப்பது போன்று இருக்கின்றது” என்று அல்லாஹ்வின் தூதர் (ஸல்) அவர்கள் கூறினார்கள்.
அறிவிப்பவர் : இப்னு அப்பாஸ் (ரலி)
இந்த ஹதீஸ்களில் கியாமத் நாள் வரும் போது கஅபா இடிக்கப்படும் என்று கூறப்படாவிட்டாலும் ஒரு காலத்தில் இடிக்கப்படும் என்று சொல்லப்பட்டுள்ளது.
கஅபா இடிக்கப்பட்ட உடன் கியாமத் நாள் ஏற்படாது. இடிக்கப்பட்ட ஆலயம் செப்பனிடப்பட்டு மீண்டும் பழைய நிலைக்கு வரும் என்று தான் கருத முடியும். ஏனெனில் கியாமத் நாளின் இறுதி அடையாளங்களில் ஒன்றான யஃஜூஜ் மஃஜூஜ் வருகைக்குப் பின்னரும் கஅபா இருக்கும் அதில் ஹஜ்ஜும் உம்ராவும் நடைபெறும் என்று நபிகள் நாயகம் (ஸல்) அவர்கள் கூறியுள்ளனர்.
عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «لَيُحَجَّنَّ البَيْتُ وَلَيُعْتَمَرَنَّ بَعْدَ خُرُوجِ يَأْجُوجَ وَمَأْجُوجَ»، تَابَعَهُ أَبَانُ، وَعِمْرَانُ عَنْ قَتَادَةَ، وَقَالَ عَبْدُ الرَّحْمَنِ، عَنْ شُعْبَةَ قَالَ: «لاَ تَقُومُ السَّاعَةُ حَتَّى لاَ يُحَجَّ البَيْتُ»، «وَالأَوَّلُ أَكْثَرُ، سَمِعَ قَتَادَةُ، عَبْدَ اللَّهِ، وَعَبْدُ اللَّهِ، أَبَا سَعِيدٍ»
“யஃஜூஜ், மஃஜூஜ் கூட்டத்தார் வந்த பிறகும் இவ்வாலயத்தில் ஹஜ்ஜும் செய்யப்படும். உம்ராவும் செய்யப்படும்” என்று அல்லாஹ்வின் தூதர் (ஸல்) அவர்கள் கூறினார்கள்.
அறிவிப்பவர் : அபூஸயீத் அல்குத்ரீ (ரலி)
உலகம் அழியக் கூடிய நேரத்தில் கஅபாவில் வணக்கம் நடைபெறும் என்று இந்த ஹதீஸ் கூறுவதால் இடைப்பட்ட காலத்தில் ஒரு முறை கஅபா ஆலயத்தை அபீசீனியர்கள் இடிப்பார்கள் என்றும் பின்னர் அது சரி செய்யப்பட்டு கியாம நாள வரையிலும் இருக்கும் என்றும் தெரிகின்றது.